यूहन्ना 21

तिबिरियुसेरे समुन्दरेरे बन्ने चेलन पुड़ बांदू भोनू

1बादे मां यीशुए एप्पू एक्‍की फेरे फिरी अपने चेलन पुड़ तिबिरियुस सुमन्दरेरो बन्ने एन्च़रे बांदो भोव। 2शमौन पतरस, थोमा ज़ैस जो दिदुमुस ज़ोतन, नतनएल ज़ै गलीलेरे काना नगर मां रहतो थियो, ते जेब्देरू मट्ठू ते होरे चेले भी तैड़ी थिये। 3शमौन पतरसे तैन सेइं ज़ोवं, “अवं मेछ़ली ट्लाने गाताईं।” तैनेईं ज़ोवं, “अस भी तीं साथी च़लतम।” तैना तैट्ठां निस्से ते किश्ती मां च़ेढ़तां जे, पन तैस राती तैन किछ न मैल्हू।

4झ़ेझ़ां सुबेलो यीशु बन्ने पुड़ एइतां खड़ो भोव, पन चेलेईं न पिशानो कि ऐह यीशुए। 5तैखन यीशुए तैन ज़ोवं, “हे बच्‍चव, कुन तुसन कां किछ खाने जो आहे?” तैनेईं जुवाब दित्तो, “नईं।” 6यीशुए ज़ोवं, “ज़ाल किश्तरे देइने पासे छ़डथ त तुसन किछ मेछ़ली मैल्हनिन।” तैनेईं ज़ाल छ़ड्डू ते मेछ़ली एत्री ज़ाले मां लेगि कि ज़ाल खिचोने न लगू। 7तैखन यीशु ज़ैस चेले सेइं प्यार केरतो थियो तैनी पतरसे सेइं ज़ोवं, “ऐह त प्रभुए।” ज़ेरू शमौन पतरसे शुन्नू कि प्रभुए, तैनी अपनो चोगो, ज़ै कम केरनेरे लेई खोल्‍लोरो थियो लाव ते पैनी मांजो छाल मारी। 8होरे चेले ज़ैना किश्ती मां थिये ज़ाल ज़ैना मेछ़लेईं सेइं भेरतां थियूं तैनेईं खिचतां आनू, किजोकि तैना 100 मीटर दूर थिये।

9ज़ैखन तैना बन्ने पुड़ ओस्से, त तैनेईं मूरन पुड़ मेछ़ली रेखोरिन ते ड्लेखी रोट्टी भी लेही। 10यीशुए तैन सेइं ज़ोवं, “ज़ैना मेछ़ली तुसेईं ट्लेतोरिन तैन मरां किछ इरां आनां।” 11शमौन पतरस किश्ती मां च़ढ़ो ते ज़ाल ड्लेखी पुड़ खिचतां आनू ज़ैस मां 153 मेछ़ली लेगोरी थी, ते फिरी भी ज़ाल नईं छ़िंदोरू। 12यीशुए तैन सेइं ज़ोवं, “एज्जा केलोव खाथ।” पन चेलन मरां केन्ची हिम्मत न अई कि पुछ़न, “कि तू कौन आस?” तैना ज़ानते थिये कि ऐह प्रभुए। 13यीशुए रोट्टी ट्लाती ते तैना भी दित्ती ते मेछ़ली भी दित्ती। 14यीशु मुड़दन मरां ज़ींतो भोनेरां पत्ती ट्लेइयोवं फेरे अपने चेलन पुड़ बांदो भोइ जेव।

यीशु ते पतरस

15ज़ैखन तैनेईं केलोव खाव, त यीशुए शमौन पतरसे सेइं ज़ोवं, “शमौन,” यूहन्नारे मट्ठा, “कुन तू होरि चेलन करां जादे मीं सेइं प्यार केरतस?” तैनी ज़ोवं, “हाँ प्रभु तू त मीं ज़ानतस कि अवं तीं सेइं प्यार केरताईं।” यीशुए ज़ोवं, “मेरां गबड़ां च़ार।” 16यीशुए फिरी तैन सेइं ज़ोवं, “शमौन, यूहन्नारे मट्ठा, कुन तू मीं सेइं प्यार केरतस?” तैनी ज़ोवं, “हाँ प्रभु, अवं तीं सेइं प्यार केरताईं।” यीशुए तैस सेइं ज़ोवं, “मेरी भैड्डां सम्भाल।” 17तैनी ट्लेइयोवं फेरे फिरी पुछ़ू, “शमौन यूहन्नारे मट्ठा, कुन तू मीं सेइं प्यार केरतस?” पतरसे दुखी भोइतां ज़ोवं, “प्रभु तू एप्पू सैरी गल्‍लां ज़ानतस, तू ज़ानतस, कि अवं तीं सेइं प्यार केरताईं,” यीशुए, ज़ोवं, “मेरी भैड्डां च़ार।” 18अवं तीं सेइं सच़ ज़ोताईं, ज़ैखन तू नौजुवान थियो त अपनु मज़ एप्पू बंधतो थियो, ते ज़ैड़ी चातो थियो, एप्पू गातो थियो, पन ज़ैखन तू बुढो भोल्हो, त अपने हथ अग्रोवं केरेलो, ते होरो तेरू मज़ बन्धेलो ज़ैड़ी तू न चालो तैड़ी तीं नेले। 19यीशुए ऐह गल ज़ोइतां इशारो कियो कि पतरस कोस मौतां मेरतां परमेशरेरी महिमा बांदी केरेलो। तैखन यीशुए ज़ोवं, “मीं पत्ती च़ल!”

यीशु ते तैसेरो ट्लारो चेलो

20पतरसे फिरतां तक्‍कू, कि यीशु सेइं प्यार केरनेबालो चेलो तैस पत्ती च़लोरोए थियो, ऐह तै चेलो थियो ज़ैनी रोट्टी खाते यीशुएरे पासे लिकतां पुछ़ेरू थियूं, “हे प्रभु तै कौने, ज़ै तीं ट्लुवालो?” 21पतरसे तैसेरे पासे तेकतां यीशुए पुछ़ू, “हे प्रभु एस चेले सेइं कुन भोल्हु।” 22यीशुए जुवाब दित्तो, अगर अवं चैई कि, “अगर मेरे वापस एजने तगर ज़ींतो राव त एसमां तीं कुन? तू मीं पत्ती च़ल।” 23एन्च़रे ढ्लान मां ऐह गल सेभीए फैली जेई, कि ऐह चेलो न मरेलो, पन यीशुए एन न थियूं ज़ोवरू, कि तै न मरेलो अगर अवं चैई कि, “अगर मेरे वापस एजने तगर ज़ींतो राव, त एसमां तीं कुन?”

आखरी हिस्सो

24ई तै चेलोए, ज़ै इना गल्‍लां केरि गवाही देते, ते ज़ैनी एना गल्‍लां लिखोरिन, असां ज़ानतम कि तैसेरी गवाही सच़्चीए।

25यीशुए होरां भी बड़ां कम्मां कियोरां थियां, अगर सेब्भी केरे बारे मां लिखनू भोए त अवं समझ़ताईं, कि तैना किताबां अज़ भोथी त तैन केरे लेई इस दुनियाई मां ठार न थी भोनी।

Currently Selected:

यूहन्ना 21: BHDNT

Highlight

Copy

Compare