यूहन्ना 20

खाली कब्र

(मत. 28:1-8;मरक. 16:1-8;लूक. 24:1-12)

1हफतेरी पेइली दिहैड़ी झ़ेझ़ां हेजू आंधरू थियूं मगदलीन ड्लंव्वेरी मरियम कब्री पुड़ आई, तैसां हेरू कि कब्री करां घोड़ भी खड़ो कियोरोए। 2ते दौड़ती शमौन पतरस ते होरि चेले कां पुज़ी ज़ै यीशु सेइं प्यार केरतो थियो, ज़ोने लगी, “तैनेईं प्रभुएरी लाश कब्री मरां केढतां नीयोरीए, ते असन नईं पतो तै कोड़ि रखोरीए।” 3एना शुन्तां पतरस त अक होरो चेलो कब्रारे पासे च़ले। 4ते दूईये साथी-साथी दौड़तां च़लोरे थिये, पन तै होरो दूइयोवं चेलो पतरसे करां अग्रोवं निस्सी जेव, ते तैस करां पेइलो कब्री पुड़ पुज़्ज़ो। 5तैनी लिकतां तक्‍कू ते कफन लाव ते अन्तर न जेव। 6तैखन शमौन पतरस भी पत्ती-पत्ती तैड़ी पुज़्ज़ो ते सिद्धो कब्री मां जेव तैनी हेरू कि तैड़ी लिगड़ां थियां। 7ते कफनेरो तै रूमाल भी ज़ै यीशुएरे दोग्गे सेइं पलेटोरो थियो, लिगड़न मां नईं पन अलग ठैरी थियो। 8तैखन तै होरो चेलो भी ज़ै कब्री पुड़ पेइलो पुज़ोरो थियूं अन्तर जेव तैस भी लेहितां याकीन भोवं। 9किजोकि तैनेईं पवित्रशास्त्रेरी ऐह गल न थी समझ़ोरी ज़ेसेरे बारे मां यीशुएरू मुड़दन मरां ज़ींतू भोनू ज़रूरी थियूं। 10तैखन एना चेले वापस घरजो च़ले जे।

मरियम मगदलीनी पुड़ बांदू भोनू

(मत. 28:9-10;मरक. 16:9-11)

11पन मरियम कब्री करां बेइर लेरां देंती थी। लेरां देंती-देंती तैसां लिकतां कब्री मांजो तक्‍कू। 12त तैड़ी तैसां दूई स्वर्गदूत लाहे ज़ैन छ़ित्तां लिगड़ां लग्गोरां थियां, ज़ैड़ी यीशुएरी लाश रख्खोरी थी तैड़ी अक शिरेइंते ते होरो पेइंसे बिश्शोरे लाहे। 13तैनेईं तैस पुछ़ू, “हे कुआन्शे तू किजो लगोरिस लेरां देने?” मरियमा ज़ोवं, “तैनेईं मेरे प्रभुएरी लाश नेवरीए ते पतो नईं कोड़ि रखोरोए।” 14एना ज़ोंते तै पत्रोवं बेदलोई त तैड़ी यीशु खड़खड़ो लाव, पन तैस पिशान न आई कि ऐह यीशुए। 15यीशुए ज़ोवं, “हे कुआन्शे तू किजो लेरां देने लगोरिस? तू केस तोपने लगोरिस?” तैसां समझ़ू कि कोई बागबाने, तैसां ज़ोवं, “हे जनाब अगर तीं तै नियोरोए त ज़ो कि तीं कोड़ि रखोरोए ते अवं तैस नेइ।” 16यीशुए तैस सेइं ज़ोवं, “मरियम!” तैसां तैसेरे पासे फिरतां इब्रानी मां ज़ोवं, “रब्बूनी!” ज़ेसेरो मतलबे हे गुरू। 17यीशुए ज़ोवं, “मीं सेइं न हुरा किजोकि अवं बाजी कां बाह हेजू नईं जेवरो, पन मेरे ढ्लान गेइतां ज़ो कि अवं अपने बाजी ते तुश्शे बाजी ते अपने परमेशर ते तुश्शे परमेशरे कां बा च़लोरोईं।” 18मरियम मगदलीनी तैट्ठां च़ली जेई ते चेलन कां गेइतां तैन पतो दित्तो, “मीं प्रभु लाहोरोए ते तैनी मीं सेइं एना गल्‍लां की।”

चेलन पुड़ बांदू भोनू

(मत. 28:16-20;मरक. 16:14-18;लूक. 24:36-49)

19तैस्से दिहैड़ी ज़ै हफतेरी पेइली दिहाड़ी थी ड्लोझ़रे मौके सारे चेले एक्‍की ठैरी थिये, ते यहूदी लोकां केरे प्रधानां केरे डरे सेइं दार बन्द केरतां बिश्शोरे थिये, तैखन यीशु अव ते मझ़ाटे खड़ो भोइतां ज़ोने लगो, “तुसन शान्ति मैलती राए।” 20एन ज़ोइतां तैनी अपने हथ ते अपनि देल्‍लोड़ी तैन हिराई, चेले तैस हेरतां खुशी भोए। 21यीशुए फिरी ज़ोवं, “तुसन शान्ति मैलती राए, ज़ेन्च़रे बाजी अवं भेज़ोरोईं, तेन्च़रे अवं भी तुसन भी इस दुनियाई मां भेज़ताईं।” 22एन ज़ोइतां तैनी तैन जो फुक दित्ती ते ज़ोवं, “पवित्र आत्मा नेथ। 23ज़ैन केरे पाप तुस माफ़ केरेले त तैन केरे पाप माफ़ भोल्हे, ज़ैन केरे तुस रखेले तैना राले।”

थोमा पुड़ बांदू भोनू

24पन बादे मां 12 चेलन मरां अक मैन्हु मतलब थोमा ज़ैस दिदुमुस ज़ोतन, ज़ैखन यीशु अव त तै तैन साथी न थियो। 25ज़ैखन होरि चेले तैस सेइं ज़ोवं, “कि असेईं प्रभु लाव,” तैखन तैनेईं ज़ोवं, “ज़ांतगर अवं तैसेरे हथ्थन मां कीला करां गत्तन मां एंगलोई न छ़ेड्डी, तांतगर विश्वास न केरि।”

26अठ दिहैड़ना बाद यीशुएरे चेले एक्‍की बार फिरी तैस्से ठैरी बिश्शोरे थिये, ते थोमा भी तैड़ी थियो ते दार भी बंद थियूं, ते यीशु एइतां तैन मझ़ाटे खड़ो भोव, ते तैन जो ज़ोने लगो, “तुसन शान्ति मैल्हे।” 27फिरी तैनी थोमा जो ज़ोवं, “अपनि अंगलोइ आन ते मेरो हथ हेर ते अपने हथ्थे सेइं मेरी दल्‍लोड़ी हेर, शक न केर बल्के मीं पुड़ विश्वास केर।” 28थोमा तैस जो ज़ोवं, “हे मेरे प्रभु हे मेरे परमेशर!” 29यीशुए तैस जो ज़ोवं, “तीं लेहितां तीं मीं पुड़ विश्वास कियो, धन तैना ज़ैना बगैर लहने मीं पुड़ विश्वास केरन।”

इस किताबरो मकसद

30यीशुए अपने चेलां केरे सामने होरे भी बड़े चमत्कार कियोरे थिये, ज़ैना इस किताबी मां नईं लिखोरे। 31पन ज़ैना लिखोरन, एल्हेरेलेइ लिखोरेन, कि तुस विश्वास केरथ, कि यीशु परमेशरेरू मट्ठू, मसीहे, ते विश्वास केरतां तैसेरे नंव्वे सेइं हमेशारी ज़िन्दगी हासिल केरथ।

Currently Selected:

यूहन्ना 20: BHDNT

Highlight

Copy

Compare