यूहन्ना 2
2
गलील इलाकेरे काना नगरे मां यीशु पेइलो चमत्कार केरते।
1तैल्ला पत्ती, ट्लेइयोवं दिहाड़े गलील इलाकेरे काना नगरे मां केन्चेरो ड्लाह थियो। यीशुएरी अम्मा भी तैड़ी थी। 2यीशु ते तैसेरे चेलन भी धाम कियोरी थी। 3ज़ैखन दाछ़रो रस मुक्को, त यीशुएरी अम्मा तैस सेइं लगी ज़ोने, “एन कां दाछ़रो रस मुक्कोरोए।” 4यीशु लगो ज़ोने, “अम्मा, मीं तीं सेइं कुन कम? हेजू मेरो वक्त नईं एवरो।”
5तैसेरे अम्मा नौकरन सेइं ज़ोवं, “ज़ैन किछ यीशु तुसन सेइं ज़ोए, तैन्ने केरथ।” 6तैड़ी नेड़े घोड़ां केरे शा (बड्डे) घड़े रखोरे थिये, ज़ैन मां दूई-दूई ट्लाई-ट्लाई मन (पानी) लगतू थियूं। यहूदी लोक अपने रुवाज़ेरे मुताबिक (अपने आपे त कने चीज़न) धोनेरे लेई एन घड़े (मां पानी भेरतां) इस्तेमाल केरते थिये। 7यीशुए नौकरन सेइं ज़ोवं, “घड़न मां पानी भरा।” तैनेईं पूरे घड़े भरे। 8तैखन यीशुए तैन सेइं ज़ोवं, “हुन्ना, घड़े मरां किछ पानी केढतां धांमरे प्रधाने कां (च़खनेरे लेई) देथ। तैनेईं तैस कां नेव। 9ज़ैखन धांमरे प्रधाने तैन पानी च़ख्खू, ज़ैन दाछ़रो रस बनोरू थियूं, तै न थियो ज़ानतो कि एन कोट्ठां एवरूए, पन नौकर ज़ानते थिये, ज़ैनेईं तैन केढतां आनेरू थियूं। एल्हेरेलेइ धांमरे प्रधाने लाड़ो कुजव, ते तैस सेइं ज़ोवं, 10‘हर कोई मैन्हु (आम तौरे, धामी मां) पेइलो रोड़ो दाछ़रो रस देते, त ज़ैखन लोक पीतां रज़्ज़तन, त बादे मां घट रोड़ो ज़ेरो दाछ़रो रस देते, पन तीं रोड़ो हेजू पत्रोवं रखोरो थियो!’”
11गलील इलाकेरे काना नगरे मां यीशुए पेइलो चमत्कार कियो। एन केरतां तैनी अपनि महिमा बांदी की, त तैसेरे चेलेईं तैस पुड़ (होरो भी जादे) विश्वास कियो कि तै मसीह आहे।
12तैल्ला पत्ती यीशु त तैसेरी अम्मा ते तैसेरे ढ्ला ते कने तैसेरे चेले कफरनहूम नगरे मां जे, ते किछ दिहाड़े तैड़ी राए।
यीशु मन्दरेरे अंगने मरां बुपैरन कढते।
(मत. 21:12-13;मरक. 11:15-17;लूक. 19:45-46)
13ज़ेइस यहूदी लोकां केरू फ़सह तिहार नेड़े अऊं, त यीशु यरूशलेम नगरे जो च़लो जेव। 14त तैड़ी मन्दरेरे अंगने मां तैनी (बलिदानेरे लेई) दांत, भैड्डां त कबूतर बेच़ने बाले लाहे त कने पेइंसे बदलने बाले भी अपने मेज़न पुड़ बिश्शोरे लाहे। 15तैखन तैनी रेस्सरो अक कोड़ो बनेइतां, तैन्न सेब्भन त भैड्डां त दांत मन्दरे मरां बेइर कढे, त बुपारी केरे पेइंसे (इरां उरां) शारे, त तैन केरे मेज़ उलटाए। 16त कबूतर बेच़नेबालन सेइं ज़ोवं, “इना इट्ठां नेइ गाथ! मेरे बाजी केरे मन्दरे बुपारी लोकां केरू घर न बनाथ!” 17ज़ैखन तैसेरे चेलेईं एन शुनू, त तैन्न याद अऊं कि (परमेशरेरी किताबी मां) लिखेरूए कि (मसीहे परमेशरे सेइं ज़ोवं) “तेरे घरेरे लेई मेरी भक्ति, (हे परमेशर) मेरे अन्तर अग्गरी ज़ेरि ज़लतीए!”
18तैखन यहूदी लोकां केरे किछ लीडर तैस सेइं ज़ोने लग्गे, “तू असन कोई निशान (चमत्कार) हिरा कि मन्दरेरे अंगने मरां लोकन कढनेरे लेई तीं कां परमेशरेरे तरफां अधिकार आहे?” 19यीशुए तैन जुवाब दित्तो, “एस मन्दरे डोला, ते अवं ट्लेइ दिहैड़न मां एस (दुबारो) बनेइलो।” 20यहूदी लोकेईं यीशु जुवाब दित्तो, “कुन इस मन्दरे बन्ने मां 46 साल लगोरेन, कुन तू एस ट्लेइ दिहैड़न मां (दुबारो) बनेइ सकतस?” 21तैनेईं गलत समझ़ू यीशुए ज़ैस मन्दरेरी गल कियोरी थी, तै तैसेरी अपनि जान थी। 22एल्हेरेलेइ (बादे मां) ज़ैखन यीशु (क्रूसे पुड़ मरो त) मुड़दन मरां ज़ींतो भोव, त तैखन तैसेरे चेलन याद अऊं कि यीशुए (अपने मौत त कने ज़ींतो भोनेरे बारे मां) असन ई गल ज़ोवरी थी। त (एसेरे वजाई सेइं) तैनेईं पवित्रशास्त्रे मां लिखोरी गल्लन पुड़ त कने यीशु मसीहेरी ज़ोवरी गल्लन पुड़ होरो भी जादे विश्वास कियो।
यीशु सेब्भी मैन्हु केरे मने ज़ानते।
23ज़ताली यीशु फ़सह तिहारेरे मौके यरूशलेम नगरे मां थियो, त बड़े लोकेईं तैसेरे चमत्कार, ज़ैना तैनी किये, लेहितां तैस पुड़ विश्वास कियो। 24पन फिरी भी यीशुए तैन पुड़ भरोसो न कियो, किजोकि तै सेब्भी केरि सोच ज़ानतो थियो। 25तैस ऐह ज़रूरत न थी कि कोई मैन्हु तैस केन्ची होरि मैन्हेरे बारे मां ज़ोए, किजोकि तै (पेइले) मैन्हु केरि सोच ज़ानतो थियो।
Currently Selected:
यूहन्ना 2: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
