यूहन्ना 1

यीशु परमेशरेरू वचन आहे।

1(दुनियारे रच़नेरे पेइलो) शुरुआती मां वचन थियूं। तैन वचन परमेशरे सेइं साथी थियूं। तैन वचन परमेशर थियूं। 2शुरुआती मां परमेशरे सेइं साथी तैन वचने थियूं। 3सब किछ वचनेरे ज़िरिये बनाव जेव। त ज़ैन किछ बनाव ज़ोवं, तैस मरां कोई भी चीज़ तैसेरे बगैर न बनाई जेई। 4तैस (वचने) मां ज़िन्दगी थी; ते तै ज़िन्दगी सारे मैन्हन लौ देचे। 5त तै लौ आंधरे मां (हमेशा) चमकचे, त आंधरू लोई कधी कैबू न केरि सके।

6परमेशरेरी तरफां अक मैन्हु भेज़ो जेव, ज़ेसेरू नवं यूहन्ना थियूं। 7तै तैस लौअरे बारे मां ज़ोने एवरो थियो, ताके सब लोक तैसेरे ज़िरिये सेइं (तैस लौई पुड़) विश्वास केरन। 8तै एप्पू लौ न थियो, पन लौअरे बारे मां लोकन गवाही देने एवरो थियो। 9सच़्च़ी लौ ज़ै हर एक्‍की मैन्हु (परमेशरेरे बारे मां ज़ान्नेरी) लौ देचे, तै दुनियाई मां एजनेबाली थी।

10तैन वचन दुनियाई मां (एवरू) थियूं, त दुनिया तैसेरे ज़िरिये बनाई जेई, पन दुनियारे लोकेईं तैन न पिशानू (कि तै कौन आहे)। 11तै अपने लोकन कां अव, पन तैसेरे अपने लोकेईं तै कबूल न कियो। 12पन ज़ेत्रे लोकेईं तै कबूल कियो, तैनी तैन्न परमेशरेरे बच्‍चे भोनेरू हक दित्तू; यानी सारे लोकन ज़ैना तैसेरे नंव्वे पुड़ विश्वास केरतन। 13तैना न हाज-बव्वे सेइं, न मैन्हु केरे मेर्ज़ी सेइं, न तैस मैन्हेरे मेर्ज़ी सेइं ज़ै बच्‍चे पैदा केरनेरी इच्छा रखते, बल्के परमेशरेरे मेर्ज़ी सेइं पैदा भोरेन!

14तैन वचन मैन्हु बेनतां किछ वक्ते असन सेइं साथी रावं, ते (इस दुनियाई मां) डेरो कियो। तैनी असन पुड़ बड़ो अनुग्रह कियो ते परमेशरेरे बारे मां सारी सच़्च़ाई हिराई। (ज़ताली तै इड़ी थियो, तैखन) असेईं तैसेरी महिमा लाही। (ज़ेन्च़रां की) तै अपने बाजी परमेशरे करां अव, त तैसेरी ज़ेरि महिमा कोन्ची मां नईं थी। 15यूहन्ने तैसेरे बारे मां गवाही दित्ती, ते ज़ोरे सेइं लोकन सेइं ज़ोवं, “ई तै आहे, ज़ेसेरे बारे मां मीं ज़ोवरू थियूं, कि ज़ै मेरे बाद एज्जी राओरोए, तै मीं करां बड़ो महाने, किजोकि तै मीं करां पेइलो थियो। 16तैसेरी भरपूरी सेइं (यानी, तैसेरे सारे अनुग्रह ते सच़्च़ाई सेइं) असन सेब्भन आशिर्वाद पत्ती आशिर्वाद मैल्हू। 17मूसा नेबेरे ज़िरिये असन कानून मैल्हो, पन यीशु मसीहेरे ज़िरिये असन कां (परमेशरे करां) अनुग्रह ते सच़्च़ाई पुज़्ज़ी। 18परमेशर केन्चे कधी भी नईं लावरो, पन तैसेरू अक्‍के मट्ठू (यीशु) ज़ैन बाजी परमेशरेरे कुम्मे मां आहे, तैन्ने असन परमेशर हिराव।”

यूहन्ना बपतिस्मो देनेबालो यीशुएरे लेई लोकन तियार केरते।

(मत. 3:1-12;मरक. 1:1-8;लूक. 3:1-18)

19यूहन्ने यीशु मसीहेरे बारे मां ई गवाही दित्ती, (एक्सां) ज़ैखन यहूदी लोकां केरे लीडरेईं यरूशलेम नगरेरां यूहन्ना कां किछ याजक त लेवी भेज़े, त तैनेईं तैस पुछ़ू, “तू कौन आस?” 20यूहन्ने तैन सेइं सच़ ज़ोवं ते किछ भी छ़ुपानेरी कोशिश न की, त तैनी तैन सेइं ज़ोवं, “अवं मसीह नईं।” 21तैखन तैनेईं तैस पुछ़ू, “फिरी तू कौन आस? कुन तू एलिय्याह नबी आस?” यूहन्ने तैन्न जुवाब दित्तो, “अवं तै नईं।” तैनेईं फिरी पुछ़ू, “कुन तू कोई नबी आस?” तैनी जुवाब दित्तो, “नईं।” 22तैखन तैनेईं तैस पुछ़ू, “फिरी तू कौन आस? (असन ज़ो) ताके अस तैन्न जुवाब देम ज़ैनेईं अस भेज़ोरेम। तू अपने बारे मां कुन ज़ोतस?” 23तैनी जुवाब दित्तो, “ज़ेन्च़रे यशायाह नेबे (मेरे बारे मां) ज़ोवरूए, तेन्च़रे अवं सुनसान ठैरी मां लोकन हक देइतां ज़ोताईं कि, ‘तुसन कां प्रभु एजनेबालो आहे, तैसेरेलेइ बत तियार केरा।’ (यानी, प्रभुएरे लेई तुस अपने दिल साफ केरा)”

24फरीसी लोकां केरे तरफां किछ मैन्हु यूहन्ना कां भेज़ोरे थिये। 25तैनेईं यूहन्ना पुछ़ू, “अगर तू न मसीह आस, न एलिय्याह, त न नबी, त फिरी (तीं कुन अधिकारे) लोकन बपतिस्मो किजो देतस?” 26यूहन्ने जुवाब दित्तो, “अवं त (लोकन) पैनी सेइं बपतिस्मो देताईं, पन तुसन सेइं साथी रानेबालो अक एरो आहे, ज़ैस तुस हकीक्ति मां न पिशानथ। 27ई तै आहे, ज़ै मेरे बाद एजनेबालोए, तै मीं करां महान आहे। अवं त तैसेरो गुलाम भोनेरे काबल भी नईं कि तैसेरे बूटेरे तसमे खोल्‍ली।”

28एना गल्‍लां, यरदन दरियारे पार बैतनिय्याह नगरे मां भोइ, ज़ैड़ी यूहन्ना लोकन बपतिस्मो देतो थियो।

परमेशरे अपनु मट्ठू यीशु भेज़ू कि तै इश्शे पापां केरे लेई बलिदान भोए।

29एग्री दिहाड़े यूहन्ने यीशु अपने पासे एइतो लाव, त तैनी यीशुएरे बारे मां लोकन सेइं ज़ोवं, “तक्‍का, परमेशरे तरफां भेज़ोरू (बलिदानेरू) गबड़ू, ज़ैन सैरी दुनियारे लोकां केरे पाप नेते! 30ई तै आहे, ज़ेसेरे बारे मां मीं ज़ोवरू थियूं कि, ‘अक मैन्हु मेरे बाद एजनेबालो आहे, ज़ै मीं करां बड़ो महान आहे, किजोकि तै मीं करां पेइलो थियो।’ 31हुन्ना तगर अवं त एप्पू भी तैस पिशानतो न थियो। पन एल्हेरेलेइ अवं (इड़ी) एजतां लोकन पैनी सेइं बपतिस्मो देताईं, ताके तै मैन्हु इस्राएलेरे लोकन मां बांदो भोए।”

32तैखन यूहन्ने लोकां केरे सामने गवाही दित्ती, “मीं पवित्र आत्मा कबूतरेरे शक्ली मां अम्बरेरां एइतो लाव, ते तै तैस पुड़ बिश्शो। 33अवं त एप्पू पिशानतो न थियो कि यीशु हकीक्ति मां कौन थियो, पन परमेशरे ज़ैनी अवं लोकन पैनी सेइं बपतिस्मो देने भेज़ो, तैनी मीं सेइं ज़ोवं, ‘ज़ैस पुड़ तू पवित्र आत्मा एइतो त बिशतो लाहेलो, तैए लोकन पवित्र आत्मा सेइं बपतिस्मो देनेबालो आहे।’ 34तै मीं लाव, त अवं तुसन गवाही देताईं, कि ऐह मैन्हु परमेशरेरू मट्ठू आहे!”

यीशुएरे पेइले चेले विश्वास केरतन कि तै परमेशरेरू मट्ठू ते मसीह आहे।

35दूइयोवं दिहाड़े, फिरी यूहन्ना त तैसेरे चेलन मरां दूई तैड़ी खड़े भोवरे थिये, 36त यीशु तैलमेइं च़लोरो थियो। ज़ैखन यूहन्ने यीशु लाव, त तैनी यीशुएरे बारे मां अपने चेलन सेइं ज़ोवं, “तक्‍का, इन परमेशरे तरफां भेज़ोरू (बलिदानेरू) गबड़ू आहे!” 37ज़ैखन यूहन्नारे दूईये चेलेईं एन शुनू, त तैना यीशु पत्ती च़ले। 38यीशुए बेदलोइतां तैना एइते लाहे ते तैन पुछ़ू, “तुस केस लगोरेथ तोपने?” तैनेईं ज़ोवं, “हे गुरू, तू कोड़ि रहतस?” 39तैनी तैन ज़ोवं, “च़ला तुस एप्पू हेरेले।” तैखन तैनेईं गेइतां तैसेरे रानेरी ठार हेरी, ते तैस दिहाड़े तैना तैस साथी राए। तै कोई ड्लवझ़ी च़ेवरे बज़ां केरो मौको थियो।

40तैन दूई चेलन मरां, ज़ैना यूहन्नारी गल्‍लां शुन्तां यीशु पत्ती च़लोरे थिये, अक अन्द्रियास थियो, ज़ै शमौन-पतरसेरो ढ्ला थियो। 41तैनी पेइलू एन कम कियूं कि अपने ढ्ला शमौन-पतरस तोपतां तैस सेइं ज़ोवं, “असन मसीह मैल्होरोए!” #1:41 मसीह: यूनानी भाषाई मां मसीहेरो मतलब “ख्रिस्त” आए। (एसेरो मतलब “परमेशरेरां तरफां भेज़ोरो राज़ो।)” 42तैखन अन्द्रियासे यीशु कां शमौन आनो। यीशुए तैसेरे पासे तक्‍कू ते ज़ोवं, “तू यूहन्नारू मट्ठू शमौन आस। पन अज़्ज़ेरे बाद तेरू नवं कैफा भोल्हु।” यूनानी भाषाई मां कैफारो मतलब “पतरस” आहे। (एसेरो मतलब घोड़।)

43होरसां दूइयोवं दिहाड़े यीशुए गलील इलाके मां गानू चाव। तैनी फिलिप्पुस लेइतां तैस सेइं ज़ोवं, “मीं सेइं साथी च़ल (ते मेरो चेलो बन)।” (फिलिप्पुस यीशु सेइं साथी च़लो।) 44फिलिप्पुस बैतसैदा नगरे मां रहतो थियो, ज़ैड़ी अन्द्रियास त पतरस भी रहते थिये। 45तैल्‍ला पत्ती फिलिप्पुस गेइतां नतनएले सेइं मिलो त ज़ोने लगो, “असन मसीह मैल्होरोए, ज़ेसेरे बारे मां (बड़े पेइले) मूसेरे कानूने मां लिखोरोए त कने नेबेईं भी अपनि किताबी मां लिखेरूए। तै यूसुफेरू मट्ठू नासरत नगरे बालो यीशु आहे, ज़ै नासरत नगरेरो आहे!” 46नतनएले तैस सेइं ज़ोवं, “कुन नासरते मरां कोई रोड़ी चीज़ निस्सी सकतीए?” फिलिप्पुसे ज़ोवं, “एइतां एप्पू हेर।” (त नतनएल फिलिप्पुसे सेइं साथी च़लो।)

47यीशुए नतनएल अपने पासे एइतो लाव ते तैनी तैसेरे बारे मां एन ज़ोवं, “ई असली इस्राएली मैन्हु आहे, एसमां कोई पाखंड नईं!” 48नतनएले यीशु पुछ़ू, “तू मीं केन्च़रे ज़ानतस?” यीशुए तैस जुवाब दित्तो, “फिलिप्पुस तीं कुजाने करां पेइले ज़ैखन तू फैगेरे बुट्टे हैठ थियो, मीं तू तैड़ी लावरो थियो।” 49तैखन नतनएले ज़ोवं, “हे गुरू, (हुन्ना अवं ज़ानतां कि) तू परमेशरेरू मट्ठू आस! तू इस्राएली लोकां केरो राज़ो आस!” 50यीशुए तैस जुवाब दित्तो, “कुन तू मीं पुड़ एल्हेरेलेइ विश्वास केरतस कि मीं तीं सेइं एन ज़ोवं, कि मीं तू फैगेरे बुट्टे हैठ लाहोरो थियो? तू इस करां भी बेड्डी-बेड्डी गल्‍लां लाहेलो!” 51फिरी तैल्‍ला पत्ती यीशुए ज़ोवं, “अवं तुसन सेइं सच़-सच़ ज़ोताईं कि, तुस सुर्ग खुल्‍लू त कने परमेशरेरे स्वर्गदूतन उबरे गाते त मैन्हेरे मट्ठे पुड़, यानी मीं पुड़ उतरते लाहेले।”

Currently Selected:

यूहन्ना 1: BHDNT

Highlight

Copy

Compare