यूहन्ना 15

यीशु सच़्च़ी दाछ़रू बड़ह

1यीशुए ज़ोवं “अवं दाछ़रू सच़्च़ू बड़ह अव्वें आईं, ते मेरो बाजी बागबाने। 2ज़ै डालड़ी मीं मां आहे, ते तैस फल न लगे, तै कट्टी गानीए, ते ज़ैस फल लगते तैस छांटते कि जादे फल लगे। 3तुस तैस शिक्षाई सेइं ज़ै मीं तुसन दित्तोरीए शुद्ध आथ। 4तुस मीं मां बनोरे राथ, ते अवं तुसन मां, ज़ेन्च़रे डालड़ी अगर बड़हे सेइं बनोरी न राए, त अपने आप सेइं तैस फल न लगे। तेन्च़रे तुसन भी अगर मीं मां बनोरे न राले त तुस फलदार न भोइ सकेले। 5अवं दाछ़रू बड़ह आईं, तुस डैलड़ी आथ, ज़ै मीं मां बनोरो रहते तैस खूब फल लगते, किजोकि मीं करां अलग भोइतां तुस किछ न केरि सखत। 6अगर कोई मीं मां बनोरो न राए, त तैस डेलड़रो ज़ेरोए ज़ैस केटतां शारतन, ते शुक्‍की गाचे, ते लोक घेरतां अग्गी मां फुक्‍की छ़डतन। 7अगर तुस मीं मां बनोरे रहतथ ते मेरी गल्‍लां तुसन मां बेनोरी रैतिन त ज़ैन चाहेले ते मगेले तुसन दित्तू गालू। 8मेरे बाजेरी महिमा एसमां आहे कि तुस हछो फल आनां, फिरी तुस मेरे चेले भोल्हे। 9ज़ेन्च़रे बाजे मीं सेइं प्यार कियो, तेन्च़रे मीं भी तुसन सेइं प्यार कियो। मेरे प्यारे मां बनोरे राथ। 10अगर तुस मेरे हुक्म मन्नेले, त मेरे प्यारे मां बनोरे राले, ज़ेन्च़रे मीं अपने बाजेरे हुक्म मन्ने, ते तैसेरे प्यारे मां बनोरो राव। 11मीं एना गल्‍लां एल्हेरेलेइ तुसन ज़ोवरिन, कि मेरी खुशी तुसन मां बनोरी राए।”

12“मेरो हुक्मे ईए ज़ेन्च़रे मीं तुसन सेइं प्यार कियो, तुस भी एक्‍की होरि सेइं प्यार केरा। 13एस करां जादे प्यार केन्चे नईं कियोरो, कि कोई अपने दोस्तां केरे लेई अपनि जान दे। 14ज़ै हुक्म अवं देताईं, अगर तुस तैस मन्नथ, त मेरे दोस्त आथ। 15अज़्ज़ेरे बाद अवं तुसन जो नौकर न ज़ोइलो, किजोकि नौकर न ज़ांने कि तैसेरो मालिक कुन केरते। मीं तुसन जो दोस्त ज़ोवरूए, किजोकि ज़ैन किछ मीं बाजी करां शुनोरूए तुसन भी शुनावरू आहे। 16तुसेईं अवं नईं च़ुनोरो पन मीं तुस च़ुनोरेथ ते ठहरावरे भी आथ, ताके तुस गेइतां फल आनथ, ते तुश्शो फल बनोरो राए, कि तुस मेरे नंव्वे सेइं बाजी करां ज़ैन किछ मगथ, तै तुसन देलो किजोकि तुस मेरे चेलेथ। 17अवं इन गल्‍लां केरो हुक्म एल्हेरेलेइ देताईं, कि तुस एक्‍की होरि सेइं प्यार केरा।”

दुनियारो बैर

18“अगर दुनियारे लोक तुसन सेइं दुश्मनी रखतन, त याद रखा कि तैनेईं पेइले मीं सेइं दुश्मनी रख्खोरी। 19अगर तुस दुनियारे भोथे, त दुनिया अपने लोकन सेइं प्यार केरती, पन हुनी तुस दुनियारे लोक नईं किजोकि मीं तुस दुनियाई मरां च़ुनोरेथ तांए दुनियारे लोक तुसन सेइं दुश्मनी रखतन। 20तै गल ज़ै मीं तुसन सेइं ज़ोवरी थी याद रखा, नौकर अपने मालिके करां बड्डो न भोए, अगर दुनियां अवं सतेवरोइं त तैना तुसन भी सताले, अगर तैनेईं मेरी गल्‍ली पुड़ अमल कियूं त तुश्शी गल्‍ली पुड़ भी अमल केरेले। 21पन तैना लोक तुसन सेइं एरो ज़ेरो बर्ताव केरेले, किजोकि तुस मेरे चेलेथ। तैना मेरे भेज़ने बाले परमेशरे न ज़ानन। 22अगर मीं एइतां तैन सेइं गल्‍लां न भोथी कियोरी त तैना पापी न थिये भोने, पन हुनी तैन केरे पापेरो तैन कां कोई बहानो नईं। 23ज़ै मीं सेइं दुश्मनी रखते, ते तै मेरे बाजी सेइं भी दुश्मनी रखते। 24अगर मीं तैन केरे सामने तैना चमत्कार न भोथे कियोरे, ज़ैना कधी होरे केन्चे नईं कियोरे त तैना पापी न थिये भोने, पन हुनी तैनेईं सब किछ लाव, ते मीं भी ते बाजी सेइं दुश्मनी रख्खी। 25पन एन एल्हेरेलेइ भोवं कि तैन केरे कानूने मां लिखोरी तै गल पूरी भोए, तैनेईं मीं सेइं खामखा दुश्मनी रख्खी। 26पन ज़ैखन तै मद्दतगार एज्जेलो ज़ैस अवं अपने बाजेरे तरफां भेज़ेलो, मतलब सच़्च़ेरो आत्मा, ज़ै बाजी केरि तरफां एइतीए, तै मेरी गवाही देली। 27ते तुस भी गवाह आथ किजोकि तुस भी शुरू करां मीं सेइं साथी थिये।”

Currently Selected:

यूहन्ना 15: BHDNT

Highlight

Copy

Compare