यूहन्ना 12

यीशुएरे पव्वन पुड़ इत्र उलटानो

(मत. 26:6-13;मरक. 14:3-9)

1फ़सह तिहारे करां शा दिहाड़े पेइले यीशु बैतनिय्याह ड्लाव्वें मांजो च़लो अव, ज़ैड़ी लाज़र रहतो थियो, ज़ै यीशुए मुड़दन मरां ज़ींतो कियोरो थियो। 2तैड़ी तैनेईं यीशुएरी खातरदारी केरनेरे लेई धाम बनाई। ते मार्था सेवा लगोरी थी केरने, लाज़र भी तैन मरां अक थियो ज़ैना यीशु सेइं साथी रोट्टी खाने बिश्शोरे थिये। 3तैखन मरियमा जटामासी सेइं बनोरो अध्धो लीटर खुशबूदार इत्र ज़ै बड़ो कीमती थियो, यीशुएरे पव्वन मल्‍लो, ते अपने दोग्गेरे बालन सेइं पोंछ़ने लगी, ते सारू घर खुशबू सेइं भेरोई जेव। 4पन तैसेरे चेलन मरां अक यहूदा इस्करियोती नव्वेंरो अक चेलो, ज़ैनी यीशु ट्लुवेवरो थियो ज़ोने लगो, 5“ई इत्र 300 दीनारन मां बेच़तां गरीबन किजो न दित्तो?” 6तैनी एना गल्‍लां एल्हेरेलेइ न थी ज़ोवरी, कि तैस गरीबां केरो खियाल थियो, पन एल्हेरेलेइ ज़ोवं कि तै च़ोर थियो, तैस कां पेइंसां केरि झोली भोती थी, ते ज़ैन किछ तैस मां रखते थी तै कढतो थियो। 7यीशुए ज़ोवं, “एस तंग न केरा, एसां वक्तेरे पेइले मेरी जान दब्बनेरी तियारी कियोरीए। 8किजोकि गरीब लोक त तुसन सेइं साथी सदा रहतन, पन अवं तुसन सेइं साथी सदा नईं रानो।”

लाज़रेरे खलाफ साज़िश

9मैन्हु केरि बड़ी भीड़ी तैड़ी आई ज़ैखन तैनेईं शुनू कि यीशु तैड़ी अव। तैना सिर्फ यीशु नईं बल्के लाज़रे भी हेरने एवरे थिये, ज़ै तैनी मुड़दन मरां ज़ींतो कियोरो थियो। 10तैखन प्रधान याजके लाज़र भी मारनेरी सलाह की। 11किजोकि बड़े लोक यहूदी लीडरन करां च़ले जे, ते तैनेईं यीशु पुड़ विश्वास कियो।

यरूशलेमे मां ज़ींत दाखल

(मत. 21:1-11;मरक. 11:1-11;लूक. 19:28-40)

12होरसां मैन्हु केरि बड़ी भीड़ तिहारे मां आई। ज़ैखन तैनेईं शुनू कि यीशु भी यरूशलेम नगरे मां एजनेबालोए, 13त तैनेईं खजूरां केरि डैलड़ी हथ्थन मां रेखतां नहरे देते तैस सेइं मिलनेरे लेई निस्से ते ज़ोने लगे, “होशाना (तारीफ़) धने इस्राएलेरो राज़ो, ज़ै प्रभुएरे नंव्वे सेइं एइते।” 14ज़ैखन यीशु अक गधेरो बच्‍चो मैल्हो, ते तै तैस पुड़ बिशतां यरूशलेम नगरे मांजो अव, ज़ेन्च़रे पवित्रशास्त्रे मां लिखेरूए तेन्च़रे एन भोवं,

15“हे सिय्योनेरी कुई (यरूशलेमेरे लोक),

तू न डर, हेर,

तेरो राज़ो एज्जी राओरोए,

ते तै गधेरे बच्‍चे पुड़ च़ेढ़तां एज्जी राओरोए।”

16पेइलू त यीशुएरे चेलेईं किछ न समझ़ू, पन ज़ैखन यीशुएरी महिमा बांदी भोइ, तैनेईं तैना सैरी गल्‍लां याद की, एन सब गल्‍लां तैसेरे बारे मां लिखोरी थी, ते लोकेईं एरो ज़ेरो सलूख कियोरो थियो। 17तैखन भीड़रे लोकेईं ज़ैना तैस सेइं थी, ई गवाही दित्ती, कि तैनी लाज़र कब्री मरां कुजव, ते मुड़न मरां ज़ींतो कियो। 18एल्हेरेलेइ लोक तैस सेइं मिलनेरे लेई आए, किजोकि तैनेईं शुनोरू थियूं, तैनी ई चमत्कार कियोरे। 19फरीसी लोक एन हेरतां एक्‍की होरि सेइं ज़ोने लगे, “सोचा, तुस लोक किछ नईं केरि लगोरे बटने, हेरा सारी दुनिया एस पत्ती च़ली।”

यूनानी यीशु तोपतन

20ज़ैना लोक फ़सह तिहारे मां यरूशलेम नगरे मां आराधना केरने एवरे थिये, तैन मां किछ यूनानी थिये। 21तैना फिलिप्पुसे कां जे ज़ै गलीलेरे नगर बैतसैदा मां रहतो थियो, तै ज़ोवले हथ केरतां ज़ोने लगे, “जनाब अस यीशु सेइं मिलनू चातम।” 22फिलिप्पुसे अन्द्रियासे सेइं ज़ोवं, ते अन्द्रियास फिलिप्पुसे सेइं साथी जेव ते यीशु सेइं ज़ोवं। 23यीशुए तैन जुवाब दित्तो, “कि मैन्हेरे मट्ठेरी यानी मेरी महिमा बांदी भोनेरो वक्त एवरोए। 24अवं तुसन सेइं सच़-सच़ ज़ोताईं, कि ज़ांतगर गेहुं केरो गलेव मित्ती मां न मर्रे, तै अक्‍के रहते, पन ज़ैखन मरते त बड़ो फल आनते, (तेन्च़रे मीं सेइं साथी भोनूए)#12:24 यीशु अपने बारे ज़ोने लोरो थियो, कि केन्च़रां तैसेरे मरने ते ज़ींते भोनेरे वजाई सेइं होरि कौमां केरे लोक तैस पुड़ विश्वास केरेले। । 25ज़ै अपनि जान ट्लारी रखते ते अपनि जान गुवाते, पन ज़ै अपनि जानी सेइं बैर रखते ते अक हमेशारी ज़िन्दगी बच़ालो। 26ज़ै कोई मेरी सेवा केरनि चाते त तैसेरेलेइ ज़रूरीए तै मेरो चेलो बने, ताके ज़ैड़ी अवं आईं तैड़ी मेरो सेवक भी भोए, ज़ै मेरी सेवा केरते मेरो बाजी परमेशर तैस इज़्ज़त देलो।”

क्रूसेरे मौतरो इशारो

27“हुना मेरो दिल बड़ो उदास भोवरोए। एल्हेरेलेइ अवं कुन ज़ोईं? ‘हे बाजी इस दुखेरी घेड़ी करां मीं बच़ा,’ पन अवं इस दुनियाई मां एल्हेरेलेइ एवरोईं कि दुख झ़ेल्‍ली। 28हे बाजी तू केत्रो महिमा बालोस इन बांदू केर।” तैखन सुर्गेरां अक आवाज़ अई, “मीं तेरी केत्री महिमा बांदी कियोरीए ते फिरी भी केरेलो। 29तैखन तैड़ी ज़ैना मैन्हु खड़े भोइतां शुनी राहोरे थिये, तैनेईं ज़ोवं, गुड़ने लगोरूए,” ते होरेईं ज़ोवं, “केन्चे स्वर्गदूते तैस सेइं गल की।” 30यीशुए ज़ोवं, “ई आवाज़ मेरे फैइदेरे लेई नईं बल्के तुश्शे लेई आहे। 31इस वक्त परमेशर दुनियारे लोकां केरो न्याय केरेलो, ते अवं इस शैतानेरी शक्ति नाश केरेलो ज़ै इस दुनियाई पुड़ राज़ केरते। 32ते ज़ैखन अवं ज़मीनी पुड़ां उच्‍चे च़ाढ़ो गालो, तैखन अवं सैरी लोकन एप्पू कांजो आनेलो।” 33एन ज़ोइतां तैनी साफ च़ारे बांदू कियूं, ते तै केन्च़रां मरने बालो। 34एस पुड़ लोकेईं ज़ोवं, “असेईं मूसेरे कानूने मां ई गल शुनोरीए, कि मसीह हमेशा रानोए, फिरी तू केन्च़रे ज़ोतस कि मैन्हेरू मट्ठू उच्‍चे पुड़ च़ढ़नू ज़रूरीए? एन मैन्हेरे मट्ठे कौने?” 35यीशुए तैन सेइं ज़ोवं, “लौ#12:35 लौ: यीशु अपने बारे मां ज़ोने लोरो थियो। तुसन कां थोड़े च़िरे तगरे, ज़ांतगर लौ तुसन साथीए, तांतगर च़लते राथ, एरू न भोए आंधरू तुसन घेरे, ज़ै आंधरे मां च़लते तै न ज़ाने तै कोरहां च़लरोए। 36ज़ांतगर लौ तुसन सेइं साथीए, त लोई पुड़ विश्वास केरा ताके तुस लौअरे बच्‍चे बनथ।” इना गल्‍लां ज़ोइतां यीशु छ़ेप्पी जेव।

यहूदी केरू अविश्वासे मां बनोरो रानू

37तैनी तैन केरे सामने बड़े चमत्कार हिराए, फिरी भी तैनेईं विश्वास न कियो। 38ताके यशायाह नेबेरू ज़ोवरू वचन पूरू भोए,

“हे प्रभु, केन्चे इश्शे खुशखेबरी पुड़ विश्वास न कियो,

ते बड़े लोकेईं परमेशरेरी शक्ति हेरतां भी कबूल न की।”

39एल्हेरेलेइ तैना विश्वास न केरि सके यशायाह एक्‍की होरि ठैरी ज़ोते:

40“तैनी तैन केरि एछ़्छ़ी केनि की, ते मन सखत कियोरोए,

एरू न भोए कि तैना एछ़्छ़न सेइं लहन ते मने सेइं बुझ़न,

ते माफ़ी मघन ते अवं तैन बज़्झ़ेई।”

41यशायाह नबी एल्हेरेलेइ ज़ोतो थियो, कि तैनी यीशुएरी एजनेबाली महिमा लाहोरी थी, ते तैसेरे बारे मां गल भी की। 42फिरी भी लीडरन मरां बड़ेईं यीशु पुड़ विश्वास कियो, पन फरीसी लोकां केरे वजाई सेइं बांदे मां न थिये मन्ते, एरू न भोए कि असन प्राथना घरे मरां कढन। 43किजोकि मैन्हु केरि बडीयाई तैन परमेशरेरी बडीयाई करां जादे रोड़ी लगती थी।

यीशुएरे वचन, न्यायेरो आधार

44तैखन यीशुए ज़ोरे सेइं ज़ोवं, “ज़ै कोई मीं पुड़ विश्वास केरते तै मीं पुड़ नईं पन मेरे भेज़ने बाले परमेशरे पुड़ विश्वास केरते। 45ते ज़ै मीं हेरते तै मेरे भेज़ने बाले हेरते। 46अवं दुनियाई मां अक लौ बेनतां एवरोईं, ताके ज़ै मीं पुड़ विश्वास केरे तै आंधरे मां न रालो। 47अगर कोई मेरी गल्‍लां शुन्तां तैन पुड़ अमल केरे, त अवं तैस दोष न लेइलो, अवं दुनियारे लोकन पुड़ दोष लाने नईं पन मुक्ति देने एवरोईं। 48ज़ै मेरो इन्कार केरते ते मेरी गल्‍लां कबूल न केरे, तैस पुड़ दोष लानेबालो अक्‍के, मतलब ज़ैन वचन मीं ज़ोवरूए, तैन आखरी दिहाड़े तैस दोषी ठैरालू। 49किजोकि मीं अपने अधिकारे सेइं किछ नईं ज़ोवरू, पन बाजी ज़ैने अवं भेज़ोरोईं तैनी मीं हुक्म दित्तोरोए, कि कुन-कुन ज़ोईं ते कुन-कुन शुनेईं? 50ते अवं ज़ानताईं कि तैसेरो हुक्म मन्ने सेइं हमेशारी ज़िन्दगीए मैलतीए, एल्हेरेलेइ अवं तुसन सेइं तैन्ने ज़ोताईं ज़ैन ज़ोनेरो हुक्म मेरे बाजे मीं दित्तोरोए।”

Currently Selected:

यूहन्ना 12: BHDNT

Highlight

Copy

Compare