यूहन्ना 11

लाज़रेरी मौत

1मरियम ते तैसेरी बेइन मार्थारे ड्लाव्वें बैतनिय्याह मां लाज़र नव्वेंरो अक मैन्हु थियो 2ई तैए मरियम थी ज़ैसां बादे मां प्रभु पुड़ इत्र छ़ेडतां अपने बालन सेइं तैसेरे पव पूंछ़ोरे थी, एसेरो ढ्ला लाज़र बिमार थियो। 3तैखन तैसेरी बेइने यीशु कां अक बिस्तार भेज़ो, “हे प्रभु, ज़ैस सेइं तू प्यार केरतस तै बिमारे।” 4ज़ैखन यीशुए एन शुनू त ज़ोवं, “ऐह बिमारी मरनेरे लेई नईं बल्के परमेशरेरी महिमारे लेई आहे, ताके तैसेरे ज़िरिये परमेशरेरे मट्ठेरी महिमा भोए।”

5यीशु मार्था ते तैसेरी बेइन मरियम ते लाज़रे सेइं प्यार केरतो थियो। 6ज़ैखन यीशुए शुनू कि, लाज़र बिमारे, पन फिर भी दूई दिहाड़े तैड़ी बिश्शो ज़ैड़ी तै थियो। 7दूई दिहैड़ना बाद यीशुए अपने चेलन सेइं ज़ोवं, “एज्जा, अस फिरी यहूदिया इलाके मां गाम।” 8चेले ज़ोने लगे, “हे गुरू, थोड़े च़िर पेइले यहूदी लीडर तीं घोड़ेईं बाते थिये, ते तू फिरी तैड़ी गानू चातस?” 9यीशुए जुवाब दित्तो, “कुन दिहैड़ी मां 12 घंटे न भोन? ज़ै दीसां च़लते तैस ठोकर न लगे, एल्हेरेलेइ कि तै दुनियारी लौई मां च़ेलि सकते। 10पन अगर तै राती च़लते त आंधरे मां तैस ठोकर लगचे, किजोकि तैस कां लौ नईं।” 11तैनी एना गल्‍लां ज़ोई, ते अपने चेलन सेइं ज़ोने लगो, “इश्शो दोस्त लाज़र झ़़ुलोरोए पन अवं तैस बींझ़ांने च़लोरोईं।” 12तैसेरे चेले ज़ोने लगे, “हे प्रभु अगर तै झ़़ुलोरोए त तै बींझ़ेलो।” 13यीशुए लाज़रेरे मरनेरे बारे मां ज़ोवरू थियूं, पन तैसेरे चेलेईं बुझ़ू कि तैसेरो मतलब निड्लरे बारे मां कि झ़़ुलोरोए, पन अवं तैस बींझ़ांने च़लोरोईं। 14तैखन यीशुए रोड़ेच़ारे ज़ोवं, “लाज़र मेरि जेवरोए। 15अवं खुशी आईं कि तुश्शे लेई फैइदोए, कि अवं तैड़ी न थियो ज़ैस सेइं विश्वास केरथ। हुनी एज्जा अस तैड़ी गाम।” 16तैखन थोमा ज़ैस जो दिदुमुस ज़ोतन, होरि चेलन सेइं ज़ोने लगो, “एज्जा, अस भी तैस सेइं साथी मरनेरे लेई गाम।”

यीशु कयामत ते ज़िन्दगी आहे

17ज़ैखन यीशुए बैतनिय्याह ड्लाव्वें मां पुज़्ज़ो त तैस पतो लगो, कि लाज़र दब्बोरे च़ेवरे दिहाड़े भोरेन 18बैतनिय्याह यरूशलेम नगरेरां कोई ट्लाई किलोमीटर दूर थियूं। 19बड़े यहूदी लोक मार्था ते मरियमी कां तैन केरे ढ्ला लाज़रेरे मरनेरां पत्ती तैना तसल्‍ली देने एवरे थिये। 20ज़ैखन मार्था शुनू कि यीशु एवरोए तै तैस सेइं मिलनेरे लेई बेइर निस्सी, पन मरियम बेइर न निस्सी। 21मार्था यीशुए सेइं ज़ोने लगी, “हे प्रभु, अगर तू इड़ी भोथो त मेरो ढ्ला न थियो मरनो। 22पन अवं ज़ानती, हुनी ज़ैन किछ तू परमेशरे करां मगेलो, ते परमेशर तीं देलो।” 23यीशुए तैस ज़ोवं, “तेरो ढ्ला ज़ींतो भोइ गानोए।” 24मार्था तैस सेइं ज़ोवं, “अवं ज़ानती तै आदालतरे दिहाड़े ज़ेइस सारे लोक ज़ींते भोनेन, तेइस तै भी ज़ींतो भोइ गानोए।” 25यीशुए तैस ज़ोवं, “मैन्हन मुड़दन मरां ज़ींते केरनेबालो अव्वें आईं। ज़ै मीं पुड़ विश्वास केरते तै मरनेरां बाद भी ज़ींतो रालो। 26ते ज़ै कोई ज़ींतोए, ते मीं पुड़ विश्वास केरते, तै कधे न मरेलो, कुन तू इस पुड़ विश्वास केरचस?” 27मार्था जुवाब दित्तो, “हाँ प्रभु, मेरो विश्वास तीं पुड़े, कि तू परमेशरेरू मट्ठू मसीह ज़ैन दुनियाई मां एजनेबालू थियूं।”

यीशुए लेरां दित्ती

28ज़ैखन तैसां ऐह गल ज़ोई त तै वापस च़ली जेई, ते अपनि बेइन मरियम कनारे कुजेइतां ज़ोने लगी, “गुरू जी एवरेन ते तीं कुजाने लगोरेन।” 29तै एन शुन्तां लूशी उट्ठतां यीशु सेइं मिलने च़ली आई। 30यीशु हेजू ड्लाव्वें मां न थियो पुज़ोरो, पन तै तैड़ी थियो ज़ैड़ी मार्था तैस सेइं मिलोरी थी। 31तैखन तैना यहूदी लोक ज़ैना मरियमी तसल्‍ली देने एवरे थिये मरियम लूशी खड़ी उट्ठतां बेइर जेई, त तैना भी तैस पत्ती बेइर जे, कि भोइ सकते ऐह लेरां देने कब्री पुड़ च़लोरीए। 32ज़ैखन मरियम तैस ठारी पुज़ी ज़ैड़ी यीशु थियो त तैस लेइतां तै तैसेरे पव्वन पुड़ बिछ़ड़ी जेई ते ज़ोने लगी, “हे प्रभु अगर तू इड़ी भोथो त मेरो ढ्ला न थियो मरनो।” 33ज़ैखन यीशुए तै ते तैस सेइं साथी एजने बाले यहूदी लोक लेरां देते लाहे, तै आत्माई मां उदास भोइतां बड़ो दुखी भोव। 34ते पुछ़ू, “तुसेईं लाज़र कोड़ि रखोरोए?” तैना ज़ोने लगे, “हे प्रभु, असन सेइं साथी एइतां एप्पू हेर।” 35यीशु लेरां देने लगो। 36तैखन यहूदी लोक ज़ोने लगे, “हेरा, ऐह लाज़रे सेइं केत्रो प्यार केरतो थियो।” 37पन तैन मरां किछ ज़ोने लगे, “कुन ज़ैनी कानेरी एछ़्छ़न लौ दित्ती, इन भी न केरि बटु, कि ऐह मैन्हु न मरेथो?”

यीशु लाज़रे ज़ींतो केरते

38यीशु दुखी दिले सेइं कब्री कां अव, तै अक कुढ थी, ज़ैस पुड़ अक घोड़ छ़डोरो थियो। 39यीशु ज़ोने लगो, “घोड़ खड़ो केरा।” मार्था ज़ै लाज़रेरी बेइन थी तै ज़ोने लगी, “हे प्रभु एस मरां त मुशक लगोरी एजने, किजोकि एस च़ेवरे दिहाड़े मर्रे भोवरेन।” 40यीशुए तैस सेइं ज़ोवं, किजो, “मीं तुसन न थियूं ज़ोवरू कि अगर तेरो विश्वास भोल्हो, त तू परमेशरेरी महिमा हेरेली।” 41तैखन तैनेईं तै घोड़ घिसव, ते यीशुए उबरे तेकतां ज़ोने लगो, “हे बाजी, अवं तेरू शुक्र केरतां कि तीं मेरी शुनी। 42अवं ज़ानतो थियो, कि तू मेरी प्राथना शुन्तस पन अवं एन लोकां केरे लेई ज़ैना च़ेवरे पासन खेड़ोरेन एन ज़ोवरू थियूं कि एना भी विश्वास केरन, कि तीं अवं भेज़ोरोईं।” 43एन ज़ोनेरां पत्ती यीशुए ज़ोरे सेइं ज़ोवं, “लाज़र बेइर निस!” 44ते तै मुओरो लाज़र बेइर निस्सो ज़ेसेरे हथ पव कफने सेइं बन्धोरे थिये ते दोग्गे अक कपड़ो बंधोरो थियो। यीशुए तैन सेइं ज़ोवं, “एस खोल्‍ला ते एस गाने देथ।”

यीशुएरे खलाफ साज़िश

(मत. 26:1-5;मरक. 14:1-2;लूक. 22:1-2)

45बड़े यहूदी लोक ज़ैना मरियम सेइं मिलने एवरे थिये। ते तैसेरां इन्ना कम्मां हेरतां तैस पुड़ विश्वास कियो। 46पन तैन मरां किछेईं फरीसन कां गेइतां सब शुनावं ज़ैना कम्मां यीशुए कियेरू थियूं। 47एस पुड़ प्रधान याजकन ते फरीसी लोक महासभारे लोक अकोट्ठे किये ते ज़ोने लगे, “अस कुन केरम? ए मैन्हु त इड़ी बड़े चमत्कार लगोरोए केरने। 48अगर अस एस हुन्ना न रोकमेले त सारे लोक तैस पुड़ विश्वास केरेले, कि ऐह मसीह आहे, ते फिरी रोमेइं इड़ी एइतां इश्शे मन्दरे ते इश्शी कौमी दूईने नाश केरेले।” 49तैखन तैन केरे टोली मरां अक ज़ेसेरू नवं कैफा थियूं, ज़ै तैस साल मन्दरेरो महायाजक थियो ज़ोने लगो, “तुस लोक किछ न ज़ानथ, 50तुसन इन न समझ़थ कि, तुश्शे लेई रोड़ूए, इश्शे लोकां केरे लेई अक मैन्हु मरे, न कि इश्शे सारे लोक।” 51ऐह गल तैनी अपने आपे सेइं न थी ज़ोवरी, पन तैस साल महायाजक भोइतां भविष्यिवाणी, कि यीशु इस्राएलेरे सारे लोकां केरे लेई अपनि जान देलो। 52तै सिर्फ इस्राएलेरे लोकां केरे लेई नईं, पन एल्हेरेलेइ भी कि ज़ैना परमेशरे बच्‍चे तितर-बितर भोरेन तैन अकोट्ठे केरतां अक बनाए। 53बस्सा, यहूदी लीडरेईं तैस दिहाड़ेरे बाद यीशु मारेरो इरादो कियो।

54एल्हेरेलेइ यीशुए तैस वक्ते करां यहूदन मां बांदे मां न फिरो, पन जंगलेरे नेड़े एप्रैम नगरे मां जेव, ते अपने चेलन सेइं साथी तैड़ी राने लगो।

55तेइस यहूदी केरू फ़सह तिहार नेड़े अव, ते बड़े लोक आसे पासेरे इलाकन मरां यरूशलेम नगरे मांजो च़ले जे, ताके अपनो आप शुद्ध केरन। 56तैना यीशु तोपते थिये तेइस तैना मन्दरे मां अकोट्ठे भोए, ते एक्‍की होरि सेइं ज़ोने लगे, “तुस कुन समझ़तथ? कोई पत्तोए कुन तै इड़ी फ़सह तिहारे मां एज्जेलो कि नईं?” 57ते प्रधान याजकेईं ते फरीसी लोकेईं हुक्म दित्तोरो थियो कि अगर केन्ची पतो लगे कि यीशु कोड़िए त ज़ोथ ताके असां तैस गिरफ्तार केरम।

Currently Selected:

यूहन्ना 11: BHDNT

Highlight

Copy

Compare