यशायाह 48

यहोवा एजने बाले मौकेरो मालिक

1हे याकूबेरे खानदानेरे लोक, ई गल शुना, तुसां ज़ैन जो इस्राएली ज़ोतथ ते यहूदारे पैनेरे नागे मरां पैदा भोवरेथ; ते ज़ैना यहूदारे नंव्वेरी कसम खातथ ते इस्राएलेरे यहोवारी चर्चा केरतथ, पन सच़्च़ैई सेइं ते धार्मिकताई सेइं न केरथ। 2किजोकि तुसां ज़ैना पवित्र नगरेरे रानेबाले ज़ोतथ, ते इस्राएलेरे परमेशरे पुड़ भरोसो केरतथ, ज़ेसेरू नवं सेना केरो यहोवाए।

3यहोवा इस्राएली लोकन सेइं ज़ोवं, “भोने बैली गल्‍लां त अवं पुराने ज़माने करां ज़ोताईं, ते तैन केरि चर्चा मेरे ज़बना निस्सी, मीं अचानक तैन बांदू कियूं ते तैना गल्‍लां सच़्च़े भोइ। 4अवं ज़ानतो थियो कि तू ज़िद केरनेबालो आस, ते तेरो मेट्टू लोंहेरी नस ते तेरू तुत्तर पितलरू ज़ेरूए। 5एल्हेरेलेइ मीं एना गल्‍लां बड़े च़िरे पेइले तीं सेइं ज़ोई, एन गल्‍लां केरे भोने करां पेइले मीं तीं ज़ोवं, एरू न भोए कि तू इन ज़ोस कि इन मेरे देबतेरू कम्मे, मेरी घड़ाई कियोरी ते ढालोरी मूरती केरे हुक्मे सेइं इन भोवं।

6“तीं शुनेरूए, हुनी इन सब गल्‍लन पुड़ ध्यान दे; ते हेरा, कुन तुस तैसेरो प्रचार न केरेले? हुन्ना करां अवं तीं नेव्वीं-नेव्वीं गल्‍लां ते एरी राज़ेरी गल्‍लां शुनेइलो ज़ैन तू न ज़ानस।#प्रका. 1:19. 7तैना पुराने ज़माने करां नईं बल्के मसां हुन्ना रेच़ोरिन, अज़ करां पेइले तीं तैना शुनोरी भी न थी, एरू न भोए कि तू ज़ोस कि अवं एन ज़ानतो थियो। 8हाँ! सच़्च़े तीं न त तैना शुनोरी थी, ते न ज़ानतो थियो, ते न एस करां पेइले तेरे कन खुलोरे थिये। किजोकि अवं एन ज़ानतो थियो कि तू ज़रूर धोखो केरेलो, ते गर्भे ही मरां तेरू नवं अपराधी पेवं।

9“ते अपने नंव्वेरे खातर अवं क्रोध केरने मां च़िर लाताईं, ते एपनी महिमारे खातर अवं तैस रोकतां रखताईं, एरू न भोए कि अवं तीं केटतां छ़ेडी। 10हेर, मीं तू साफ त कियो पन चैंदरो ज़ेरो नईं; मीं तू दुखेरी भेट्ठी मां पेरखतां च़ुनोरोस।#भज. 66:10;1 पत. 1:7. 11अपने खातर हाँ अपने खातर मीं एन कियोरूए, मेरू नवं किजो अपवित्र ठहरे? अपनि महिमा अवं होरी कोन्ची न देइलो।

इस्राएले छुटानेरे लेई यहोवारी योजना

12“हे याकूब, ते मेरो कुजेवरो इस्राएल, मेरी गल ध्याने सेइं शुन! अवं तैए आईं, अव्वें पेइलो ते अव्वें आखर आईं। 13पक्‍की मेरे हथ्थे धेरतरी बुनीयाद रख्खी, ते मेरे ही देइने हथ्थे अम्बर बनाव; ज़ैखन अवं तैन कुजाताईं, तैना हाज़र भोतन।”#इब्रा. 1:10.

14“तुसां सारे अकोट्ठे भोइतां शुना! तैन मरां केनी कधे एन गल्‍लां केरि खबर दित्ती? यहोवा तैस सेइं प्यार केरते; तै बाबेले पुड़ अपनि मर्ज़ी पूरी केरेलो, ते कसदी लोकन पुड़ तैसेरो हथ पेलो। 15मीएं, हाँ मीएं एन ज़ोवरूए ते तै कुजावरोए, ते मीं तै आनोरोए, ते तैसेरू नवं कामयाब भोल्हु। 16मीं कां नेड़े एइतां एना गल्‍लां शुना, शुरू करां लेइतां हुन्ना तगर मीं कोई भी गल छ़ुपेइतां न ज़ोवं; ज़ैखन करां तैन भोवं तैखन करां अवं तैड़ी आईं।” ते हुनी प्रभु यहोवा ते तैसेरी आत्मा अवं भेज़ोरोईं।

परमेशरेरी योजना

17यहोवा ज़ै तेरो छुटानेबालो ते इस्राएलेरो पवित्र परमेशरे, तै एन ज़ोते, “अव्वें तेरो परमेशर यहोवा आईं ज़ै तेरे फैइदेरे लेई तीं शिक्षा देताईं, ते ज़ैस बत्तां तीं च़लनूए अवं तैस्से बत्तां च़लाताईं। 18रोड़ू भोथू कि तू मेरे हुक्म ध्याने सेइं शुनतो भोथो! त तेरे शान्ति दरियारे ज़ेरि ते तेरी धार्मिकता समुन्दरेरी छ़ेल्‍ली केरे ज़ेरि भोथी; 19ते तेरो वंश रेतरे सिक्‍कां केरू ज़ेरू बड़ू भोथू, तैन केरू नवं मेरे सामनेरां कधी न कट्टू ते मिटवं गाथू।”

20हुनी बाबेल मुल्खे मरां निस्सी एज्जा, ते कसदी लोकन मरां नेश्शी गाथ; जयजयकार केरते इस गल्‍लरो प्रचार केरतां शुनाथ, धेरतरे कूने तगर ऐह चर्चा फैलाथ; ज़ोते राथ, “यहोवा अपनो दास याकूब छुटेवरोए!” 21ज़ेइस यहोवा अपने लोक गैर आबाद मुल्खे मां निये, तैस वक्ते तैना ट्लिशोरो न राए; किजोकि तैनी तैन केरे लेई चट्टानी मरां पानी कढू; तैनी चट्टान च़ीरी ते तैस मरां पानी कढू। 22“दुष्टां केरे लेई शान्ति नईं।” यहोवारू एन ज़ोनूए।

Currently Selected:

यशायाह 48: BHDNT

Highlight

Copy

Compare