यशायाह 47

बाबेलेरी हार

1यहोवा एन ज़ोते, हे बाबेलेरी कुवारी कुइये#47:1 कुवारी कुइये मतलब बाबेल नगरी, उन्ढी एई ते धूड़ी पुड़ बिश; हे कसदी केरि कुइये तू बगैर तखते ज़मीनी पुड़ बिश! किजोकि हुनी तींजो लोक कोमल ते सुकुमार न ज़ोले। 2हिड्लाट आन ते अट्टू पी, अपनु घुंघट हटा ते घैघरो उबरे केर ते नेग्गी ज़ंघन सेइं दरिया पार केर। 3तेरू नग्गू पन सेभन पुड़ बांदू कियूं गालू, सब तेरी शर्म बांदी भोल्ही। अवं बदलो नेइलो ते कोन्ची मैन्हु न बखशेलो।

4असन छुटकारो देनेबालेरू नवं सेना केरो यहोवा ते तैए इस्राएलेरो पवित्र परमेशरे।

5यहोवा इन भी ज़ोते, हे कसदी केरे कुइये, च़ुपच़ारे आंधरे मां बिशोरी रा; किजोकि हुनी तीं मुल्खां केरि महा रानी न ज़ोले। 6मीं अपने लोकन पुड़ क्रोध थियो, ते अपनि विरासत अपवित्र ठहराई; ते तैना तेरे हथ्थे मां सौंफी दित्ते, ते तीं तैन पुड़ दया न की; इड़ी तगर बुढन पुड़ भी अपनो भारी जुओ रख्खो। 7तीं ज़ोवं, “अवं हमेशा तगर मालिकन बेनतां राली!” एल्हेरेलेइ तीं एन गल्‍लन पुड़ ध्यान न दित्तू ते एन भी न सोचू कि तैन केरो कुन फल भोल्हो।

8एल्हेरेलेइ शुन, तू ज़ै एशे मां रानेबाली निडर भोइतां मसत बेनतां बिशोरी रातिस ते अपने दिले मां ज़ोतिस कि “अव्वें आईं, मेरे अलावा होरो कोई नईं; अवं कधे विधवारी ज़ेरि न बिशेली ते न बेऔलाद भोल्ही।”#सप. 2:15;प्रका. 18:7. 9पन शुन, एना दूईये दुख मट्ठां केरू मरनू ते विधवा भोनू, अचानक एक्‍की दिहाड़े तीं पुड़ इनां दुख एज्जेले। तेरे सैरी जैदू केरे वजाई सेइं भी एना सैरी आफतां तीं पुड़ पूरी भोल्ही।#प्रका. 18:8,23.

10तीं अपने बुरैई पुड़ भरोसो रख्खो, तीं ज़ोवं, “मीं कोई न लाहे;” तेरी अक्लां ते तेरे ज्ञाने तू टपलाई ते तीं अपने मने मां ज़ोवं, “अव्वें आईं ते मेरे सिवा कोई होरो नईं।” 11एल्हेरेलेइ तीं पुड़ आफत एज्जेली, ज़ेसेरू मन्ट्ल तू न ज़ानस ते तीं पुड़ एरी आफत पेली कि तू तैसेरो हरज़ानो न देइ सकेली; अचानक विनाश तीं पुड़ एज्जेलो ज़ेसेरो तीं कोई भी पतो न लग्गेलो।#1 थिस. 5:3.

12तैखन तू अपने जैदू टूने ते बड़ां मन्ट्लां ज़ैना तीं बचपनेरां देतां इस्तेमाल कियोरां थियां, भोइ सकते तू तैन सेइं फैइदो उठास या तैन केरे भोइ सकते तू अपने दुश्मन्न डरेई सकस। 13तू त योजना बनेई-बनेई थेकी जेई; हुनी तेरे जोष्टी तारन ध्याने सेइं हेरतन ते नंव्वे-नंव्वे चाँदे हेरतां एजने बाले वक्ते ज़ोतन, तैना खड़े भोइतां तीं तैन करां बच़ान ज़ैना तीं पुड़ एज्जेली।

14हेर, तैना बाबेलेरे जोष्टी भूंसेरे ज़ेरे अग्गी सेइं भस्म भोइ गाले; तैना अपने आपे लप्पी करां न बच़ेइ बटेले, एना अगरां तपनेरे लेई नईं; तै अग एरी भोल्ही ज़ेसेरे सामने कोई न बिश्शी सखे। 15ज़ैन केरे लेई तू मेहनत केरती एवरी आस तैना सब तेरे लेई तेरहे भोल्हे, ते ज़ैना तेरे जुवैनरे देंते तीं सेइं बुपार केरते एवरेन, तैन मरां हर अक अपने-अपने पासे च़ले गाले; तेरो बच़ानेबालो कोई न रालो।

Currently Selected:

यशायाह 47: BHDNT

Highlight

Copy

Compare