निर्गमन 17

चट्टानी मरां पानी कढनू

1फिरी इस्राएली लोकां केरि सारी मण्डली सीन नव्वेंरे बियाबान ठैरी मरां च़ली जेई, ते तैन लोकेईं यहोवारे हुक्मेरे मुताबिक अग्रोवं च़ेलतां रपीदीम नंव्वेरे जगाई मां अपने डेरे लाए, ते तैड़ी तैन लोकन पीनेरे लेई पानी न मैल्हू। 2एल्हेरेलेइ तैना लोक मूसे सेइं बेंस केरतां ज़ोने लगे, “असन पीने जो पानी दे।” मूसे तैन जुवाब दित्तो, “तुस मीं सेइं किजो बेंस केरने लगोरेथ? ते यहोवारी अज़मैइश किजो केरतथ?” 3फिरी तैन लोकन बड़ी ट्लिश लगी, तैखन तैना मूसे पुड़ शिकायत केरतां ज़ोने लगे, “तीं अस बाल-बच्‍चन ते जानबरन समेत ट्लिशी सेइं मारनेरे लेई मिस्र मुल्खे मरां किजो आनोरेम?” 4तैखन मूसे यहोवा कां बिनती केरतां ज़ोवं, “इन लोकन सेइं अवं कुन केरि? एना त सब मीं घोड़ेईं बाने जो तियारन।” 5यहोवाए मूसे सेइं ज़ोवं, “इस्राएली केरे बुज़ुर्ग लोकन मरां किछ एप्पु सेइं साथी ने, ते ज़ैस सोटी सेइं तीं नील दरियाए पुड़ बाहोरी थी, तैस अपने हथ्थे मां नेइतां लोकन अग्री-अग्री च़ल। 6हेर अवं तीं करां पेइलो गेइतां होरेब पहाड़ेरी एक्‍की चट्टानी पुड़ खड़ो भोल्हो, ते तू तैस चट्टानी पुड़ बैइयां, तैखन तैस मरां पानी निसेलू, ज़ैस एना लोक पीएले।” तैखन मूसे इस्राएली केरे बुज़ुर्ग लोकां केरे सामने एन कियूं। 7ते मूसे तैस जगारू नवं मस्सा #17:7 मस्सा मतलब अज़मैइशते मरीबा #17:7 मरीबा मतलब शिकायतरख्खू, किजोकि इस्राएली लोकेईं तैड़ी बेंस कियोरी थी ते यहोवारी अज़मैइश इन ज़ोइतां कियोरी थी, “कुन यहोवा असन सेइं साथी आहे या नईं?”

अमालेकी लोकन पुड़ ज़ीत

8तैखन अमालेकी लोक एइतां रपीदीमे मां इस्राएली लोकन सेइं लड़ने लगे। 9तैखन मूसे यहोशू #17:9 यहोशू यहोशू मूसेरे हुक्मेरे मुताबिक सेनापति थियोसेइं ज़ोवं, “इश्शे लेई किछ मड़द च़ुनतां अलग केर, ते बेइर गेइतां अमालेकी लोकन सेइं लड़, ते अवं कालां परमेशरेरी सोटी हथ्थे मां नेइतां पहाड़ेरे च़ोटी पुड़ खड़ो भोल्हो।” 10मूसेरे इस हुक्मेरे मुताबिक यहोशू अमालेकी लोकन सेइं लड़ने लगो; तैखन मूसो, हारून ते कने हूर पहाड़ेरे च़ोटी पुड़ जे। 11ते ज़ैखन मूसो अपनो हथ खड़ो केरतां रखतो थियो, तैखन इस्राएली कामयाब भोते थिये, पन ज़ैखन-ज़ैखन तै हथ उन्ढो केरतो थियो तैखन-तैखन अमालेकी सेना कामयाब भोती थी। 12ते ज़ैखन मूसेरे हथ थेकी जे, तैखन हारूने ते हूरे अक घोड़ एन्हतां मूसेरे हेठोरां रख्खो, ते तै तैस पुड़ बिश्शो, ते हारून ते हूर अक एक्‍की पासेरां ते होरो होरी पासेरां तैसेरे हथ ठेमतां रख्खे, ताके तैसेरे हथ दिहाड़ो डुबने तगर खड़े रान। 13ते यहोशूए अमालेकी तैन केरे सैथन सने तलवारारे ताकती सेइं हाराए।

14तैखन यहोवाए मूसे सेइं ज़ोवं, “इस गल्‍ली यादरे लेई किताबी मां लिखतां रखा, ते यहोशू शुनेई छ़ड कि अवं आसमाने हेठोरां अमालेकी लोकां केरू नवं निशान पूरे तरीके सेइं मिटेइलो।” 15तैखन मूसे अक वेदी बनाई ते तैसेरू नवं, “यहोवा निस्सी#17:15 यहोवा निस्सी यहोवा मेरो झण्डो रख्खू।” 16फिरी तैने ज़ोवं, “अमालेके यहोवारे राज़ गेद्दरे खलाफ हथ खड़ो कियोरोए एल्हेरेलेइ यहोवाए कसम खेवरीए कि यहोवा अमालेकी लोकन सेइं पीढ़ी-पीढ़ी तगर लड़तो रालो।”

Currently Selected:

निर्गमन 17: BHDNT

Highlight

Copy

Compare