निर्गमन 16

मन्ना ते बटेर

1फिरी इस्राएली लोकां केरि मण्डली एलीमेरां अपने डेरे खड़े केरतां सीन नंव्वेरे बियाबान ठैरी पुज़्ज़ी, ज़ैन एलीम ते सीनै पहाड़ेरे मझ़ाटे। तैना मिस्र मुल्खेरां निसनेरां पत्ती दूइयोवं महीनेरे परहनोवं दिहाड़े पुज़्ज़े। 2बियाबान ठैरी मां इस्राएली लोकां केरि सारी मेण्डलरे लोक मूसे ते हारूनेरे खलाफ गल्‍लां केरने लगे। 3ते इस्राएली तैन सेइं ज़ोने लगे, “ज़ैखन अस मिस्र मुल्खे मां मासेरे भांडन कां बिशतां मन पसंद चीज़ां खाते थिये, तैखन अगर अस यहोवारे हथ्थे सेइं मारे भी गाथे त रोड़ू थियूं, पन तुसेईं अस इस जंगले मां एल्हेरेलेइ आनोरेम कि असन नियन्ने मारथ।”

4तैखन यहोवाए मूसे सेइं ज़ोवं, “हेरा, अवं तुश्शे लेई अम्बरेरां खानेरी चीज़ां बखेइलो; ते इना लोक रोज़ बेइर गेइतां रोज़ेरे लेई रोट्टी अकोट्ठी केरेले, एन्च़रे सेइं अवं तैन अज़मालो, कि एना मेरे कानूने पुड़ च़लेले कि नईं। 5ते एरू भोल्हु कि हर हफते शेइयोवं दिहाड़े#16:5 हफते शेइयोवं दिहाड़े शुकरे ड्लवझ़ी करां शन्चरेरे ड्लवझ़ी तगर। खाने जो होरि दिहाड़न करां दुगनू अकोट्ठू केरनू भोल्हु, एल्हेरेलेइ ज़ैन किछ तैना तैस दिहाड़े अकोट्ठू केरेले तैस तियार केरतां रखन।” 6तैखन मूसे ते हारूने इस्राएली लोकन सेइं ज़ोवं, “ड्लवझ़ी तुस ज़ानेले कि ज़ैने तुस मिस्र मुल्खे मरां केढतां आनोरेथ तै यहोवा आए। 7ते झ़ेझ़ां तुसन यहोवारी महिमा लेइहोनीए, किजोकि तुस ज़ैन यहोवारे खलाफ गल्‍लां केरतथ तैना तैनी शुनोरिन ते अस कौन अहम कि तुस इश्शे खलाफ गल्‍लां केरतथ?” 8फिरी मूसे ज़ोवं, “इन तैखन भोनूए ज़ैखन यहोवा ड्लवझ़ी तुसन खानेरे लेई मास ते झ़ेझ़ां मन पसंद रोट्टी देलो; किजोकि तुस ज़ैना तैसेरे खलाफ गल्‍लां केरतथ तैन तै शुनते, ते अस कौन अहम? तुस इश्शे खलाफ नईं पन यहोवारे खलाफ गल्‍लां केरतथ।”

9फिरी मूसे हारूने सेइं ज़ोवं, “इस्राएली केरि सारी मेण्डली हुक्म दे, कि यहोवारे सामने हाज़र भोइ गान, किजोकि तैनी तैना गल्‍लां शुनोरिन ज़ैना तैनेईं तैसेरे खलाफ कियोरिन।” 10ते एरू भोवं कि ज़ैखन हारून इस्राएली केरि मेण्डली सेइं गल्‍लां केरि राहोरो थियो, कि तैनेईं बियाबान ठैरारे पासे तक्‍कू, ते तैनेईं यहोवारी महिमा बिदलारी मां लाही। 11तैखन यहोवाए मूसे सेइं ज़ोवं, 12“इस्राएली केरि शिकायत केरनि मीं शुनोरीए, तैन सेइं ज़ो, कि दिहाड़ी डुबनेरे मौके तुस मास खाएले ते झ़ेझ़ां तुस रोट्टी सेइं रज़्ज़ेले, ते तुस एन ज़ानेले कि अवं तुश्शो परमेशर यहोवा आईं।” 13तैखन एरू भोवं कि ड्लवझ़ां बटेरां एइतां सारे डेरन पुड़ बिश्शी जेई, ते राती डेरां केरे च़ेवरे पासन ओश पेई। 14ते ज़ैखन ओश शुक्‍की जेई त तैना कुन हेरतन, कि जंगले मांमेइं निक्‍के-निक्‍के हिंवेरे गलेवां केरे ज़ेरे झ़ड़ोरे थिये। 15ज़ैखन इस्राएली लोकेईं इन हेरू त एक्‍की होरि सेइं ज़ोने लगे, ई त मन्ना आए, मतलब कि ई कुन चीज़े? किजोकि तैना न थिये ज़ानते कि एन कुने। तैखन मूसे तैन सेइं ज़ोवं, “ई तै चीज़े ज़ै यहोवाए तुसन खानेरे लेई दित्तोरीए। 16यहोवा ई हुक्म दित्तोरोए कि तुस खानेरे लेई तेत्रू नेइयथ ज़ेत्री ज़रूरते। तुश्शे डेरे मां ज़ेत्रे लोकन तैन सेब्भी केरे लेई अक-अक ओमेर#16:16 ओमेर 2.3 लीटर हर मैन्हेरे हिसाबे सेइं। अकोट्ठू केरथ।” 17ते इस्राएली लोकेईं तेरहु कियूं; ते न कोन्चे जादे, ते न कोन्चे घट अकोट्ठू कियूं। 18पन ज़ैखन तैनेईं तैन ओमेरे सेइं नापू, तैखन ज़ैस कां जादे थियूं तैस कां किछ जादे न निस्सू, ते ज़ैस कां थोड़ू थियूं तैस कां घट न निस्सू; किजोकि हर एक्‍की मैन्हे अपने खानेरे हिसाबे सेइं अकोट्ठू कियोरू थियूं। 19फिरी मूसे तैन सेइं ज़ोवं, “कोई एस मरां झ़ेझ़ां तगर न रख्खे।” 20फिरी भी तैन मरां किछ लोकेईं मूसेरी गल न मन्नी; एल्हेरेलेइ तैखन किछ मैन्हेइं झ़ेझ़ां तगर रख्खू, त तैस मां कीड़े लगे ते मुशक च़लने लग्गी, तैखन मूसो सेरकोव। 21तैना रोज़ झ़ेझ़ां अपने-अपने ज़रूरतरे मुताबिक अकोट्ठू केरते थिये, ते ज़ैखन धुप लगती थी, तैखन तैन गेली गातू थियूं।

22फिरी एरू भोवं कि शेइयोवं दिहाड़े तैनेईं दुगनू, मतलब हर मैन्हेरे लेई दूई-दूई ओमेर सल्‍लू, ते मेण्डलरे सब प्रधानेईं एइतां मूसे सेइं इस गल्‍लरे बारे मां ज़ोवं। 23तैनी तैन सेइं ज़ोवं, “ई त तै गल्‍ले ज़ै यहोवा ज़ोवरीए, कि कालां पवित्र आराम, मतलब यहोवारे लेई पवित्र थैकरी दिहाड़ी भोनोए, एल्हेरेलेइ तुसेईं ज़ैन तंदूरे मां पकानु भोए तैस पकाथ, ते ज़ैन उबालनु भोल्हु तैन उबाला, ते एस मरां ज़ेत्रू बंच़े तैस मरां झ़ेझ़ां जो रेखत।” 24तैखन तैनेईं तैन मूसेरे इस हुक्मेरे मुताबिक झ़ेझ़ां तगर रख्खू, त तैखन तैन न ट्लकू, ते न तैस मां कीड़े लगे। 25तैखन मूसे ज़ोवं, “अज़ तैस्से खाथ, किजोकि अज़ यहोवारे लेई थैकरी दिहाड़ीए, एल्हेरेलेइ अज़ तुसन तैन मैइदाने मां नईं मैल्हनू। 26हफतेरे शा दिहाड़े त तुस अकोट्ठू केरि सकतथ, पन सत्तोवं दिहाड़ी थैकरी दिहाड़ीए, तैस मां तुसन किछ नईं मैल्हनू।” 27फिरी भी लोकन मरां किछ सत्तोवं दिहाड़े भी अकोट्ठू केरनेरे लेई बेइर जे, पन तैन किछ न मैल्हू। 28तैखन यहोवाए मूसे सेइं ज़ोवं, “तुस लोक मेरे हुक्मन ते कानून मन्ने करां केइस तगर इन्कार केरेले? 29हेरा, यहोवा ज़ै थैकरी दिहाड़ी तुसन दित्तोरीए, एल्हेरेलेइ तै शेइयोवं दिहाड़े तुसन दुगनू खानेरे लेई देते, एल्हेरेलेइ तुस अपने-अपने कां बिशथ, सत्तोवं दिहाड़े कोई अपने डेरे मरां बेइर न निस्से।” 30फिरी लोकेईं सत्तोवं दिहाड़े आराम कियो।

31इस्राएली लोकेईं तैस खानेरी चीज़रू नवं मन्ना#16:31 मन्ना इसेरो मतलब कुने। रख्खू; ते तैन धानेइयरू ज़ेरू छ़ित्तू ते तैसेरो सुवाद मैछ़ेरे बेनोरी चीज़रो ज़ेरो थियो। 32फिरी मूसे ज़ोवं, “यहोवा ज़ै हुक्म दित्तोरोए तै ईए, कि इस मरां ओमेर भेरतां अपने खानदानेरे पीढ़ी-पीढ़रे लेई रेखी छ़डा, ज़ैस सेइं तैन पतो लग्गे, कि यहोवा असन मिस्र मुल्खेरां केढतां बियाबान ठैरी मां केन्च़रे रोट्टी खुवातो थियो।” 33तैखन मूसे हारूने सेइं ज़ोवं, “अक भांड नेइतां तैस मां ओमेर भेरतां मन्ना नेइयां ते तैस यहोवारे सामने रख, कि तै तुश्शे एजने बैली पीढ़ी केरे लेई रखोरो राए।” 34ज़ेरो हुक्म यहोवा, मूसे दित्तोरो थियो, तैसेरे मुताबिक हारूने तैन केरे गवैहीयरे सन्दूखेरे#16:34 गवैहीयरे सन्दूखेरे ई वाधेरो सन्दूखे इसेरे बारे मां रोड़ेच़ारे पज़ा अध्यायरे दशे करां बारहे दरमियाने मां आए, 24:10-12 वचन पढ़ा। एगरोरां रेखी छ़डो, कि तै तैड़ी राए। 35इस्राएली लोक 40 सालन तगर मन्ना खाते राए, तैना ज़ांतगर कनान मुल्खेरी सरहद्दी कां न पुज़्ज़े तांतगर मन्ना खाते राए। 36अक ओमेर त एपारो#16:36 एपा लगभग 23 लीटर भोथू थियो। दशोवं हिस्सो भोते।

Currently Selected:

निर्गमन 16: BHDNT

Highlight

Copy

Compare