सभोपदेशक 7

इस्तेमाल भोनेबालू ज्ञान

1रोड़ू नवं कीमती इत्रे करां कने मौतरी दिहैड़ी ज़रमनेरे दिहैड़ी करां रोड़ीए।

2मौतरे घरे मां गानू धांमरे घरे मां गाने करां जादे रोड़ूए;

किजोकि मौत इन्सानेरी असली बत्ते,

ते ज़ै ज़ींतोए तै मन लेइतां इस गल्‍ली सोचेलो।

3हसने करां दुख केरनो रोड़ोए, किजोकि ई तुत्तरे उदास केरि सकते पन समझ़ी बद्धाते।

4अक्लमन्दा केरो दिल मातमेरे घरेरे पासे लगोरो रहते,

पन बेवकूफां केरो दिल आनन्द केरनेबालां केरे घरे लग्गोरो रहते।

5बेवकूफां केरां गीतां शुन्ने करां अक्लमन्दा केरि झ़िड़क शुन्नी ठीके।

6किजोकि ज़ेन्च़रे च़ुल्‍ली मां कंटे चड़चड़ केरतन, तेन्च़रे बेवकूफेरू हस्सनू भोते,

इन भी बेकारे।

7ज़ुलमेरे कमैई सेइं अक्लमन्द बेवकूफ बेनि गाते;

ते रिश्पती सेइं अक्ल नाश भोतीए।

8कोन्ची भी कम्मेरे शुरुआती करां जादे रोड़ो तैसेरो अन्त भोते,

ते सबर केरनेबालो मड़द घमण्ड केरनेबाले करां रोड़ोए।

9तू अपने दिले लूशी सरक न एजने दे,

किजोकि सरक बेवकूफां केरे दिले मां रहतीए।

10तू एन न ज़ोइयां, “कि पुराने दिहाड़े इन नव्वें दिहाड़न करां जादे रोड़े थिये।”

किजोकि तू इन अक्ली सेइं न पुछ़स।

11अक्ल विरासती सेइं साथी रोड़ी भोतीए,

बल्के इस दुनियाई मां रानेबालां केरे लेई फैइदामन्द आहे।

12किजोकि अक्ल एन्च़रे हिफाज़त केरतीए ज़ेन्च़रे रुपेइये;

पन ज्ञानेरी खासयत ई आहे कि तै अक्ल रखनेबालां केरि जानरी हिफाज़त केरचे।

13ज़ैन किछ परमेशरे कियोरूए तैस पुड़ ध्यान केर; ज़ैन तैनी टारू बनेवरूए, तैस कौन सिद्धे केरि सकते?

14सुखेरे दिहाड़े खुशी मना, ते दुखेरे दिहाड़े सोच;

किजोकि परमेशरे दूईये चीज़ां साथी रेखोरिन, ज़ैस सेइं मैन्हु अपने बाद भोने बाली कोन्ची गल्‍ली न सेमझ़ी सके।

15मीं एपनी बेकार ज़िन्दगी मां एन सब किछ लाहेरूए;

कोई धर्मी अपनु धर्मेरू कम केरते-केरते भी नाश भोइ गाते,

ते कोई दुष्ट अपनि बुराई केरते-केरते लम्मी उमर ज़ीते।

16हद्दी करां जादे अपनो आप धर्मी न बना, ते न हद्दी करां जादे अक्लमन्द बेना; तू किजो अपने नाशेरी वजा भोस? 17हछो दुष्ट भी न बन, ते न हछो बेअक्ल भो; तू किजो परमेशरेरे ठहरावरे वक्ते करां पेइलो मरस? 18रोड़ू त आहे कि तू एस गल्‍ली ट्लेइतां रख्खस; ते तैस गल्‍ली पुड़ेरां भी हथ न खड़ो केरस; किजोकि ज़ै परमेशरेरो डर मन्ते, तै एन मुश्किलन मां भी पार निस्सी गाते।

19अक्ली सेइं अक मैन्हु नगरेरे दश हाकिमन करां जादे शेक्ति बालो बनते। 20इस मां कोई शक नईं कि धेरती पुड़ एरहो कोई धर्मी मैन्हु नईं, कि ज़ै सिर्फ भलियाई केरे ते ज़ैस करां कोई पाप न भोए भोवरो।

21तू लोकां केरि सेभी गल्‍लन पुड़ ज़ैना तैना ज़ोतन कन लेइतां न शुना, एरू न भोए कि तू शुनस, कि तेरो नौकर तीं पुड़ लानत देते। 22किजोकि तू अपने दिले मां ज़ानतस, कि काई फेरेईं तीं भी होरन पुड़ लानत दित्तोरीए।

23एन सब मीं अक्ली सेइं अज़मेवरूए, ते मीं ज़ोवं, “अवं अक्लमन्द भोइ गालो;” पन एन मीं करां दूरे रावं। 24तैन ज़ैन दूर, ते हछु डुग्घू आहे, तैसेरो भेद कौन ज़ैनी सकते? 25मीं अपनो मन लव, कि अक्लरे बारे मां ज़ैनी सेखी, कि तोप केरि ते तैसेरो भेद ज़ान्नेरी कोशिश केरि, ते पतो केरि कि बुराई बेवकूफी ते बेवकूफी पागलपने। 26ते मीं मौती करां भी जादे दुख देनेबाली अक चीज़ मैल्ही, मतलब तै कौन्श, ज़ेसारो मन फंदो ते जाले ते ज़ेसारे हथ हथकेड़ीन; ते ज़ैस मैन्हु पुड़ परमेशर खुशी भोते, तैए तैस करां बच़ेलो, पन पापी त तैसेरो शिकार बनेलो। 27हेर, उपदेश देनेबालो ज़ोते, मीं ज्ञानेरे लेई अलग-अलग गल्‍लां मिलेइतां पेरखी, ते ईए गल निस्सी, 28ज़ैस मेरो मन अज़ तगर तोपतो राव, पन न मैल्हो। हज़ारे मां मीं अक धर्मी मड़द मैल्हो, पन तैन सेभन मां मीं अक भी धर्मी कौन्श न मैल्ही। 29हेरा, मीं सिर्फ अक गल मैल्होरीए, कि परमेशरे मैन्हु सिद्धो बनेवरोए, पन तैनेईं बेड़ि योजना केढोरिन।

Currently Selected:

सभोपदेशक 7: BHDNT

Highlight

Copy

Compare