प्रेरितां केरां कम्मां 9

शाऊलेरो मन बेदलोनो

(प्रेरित. 22:6-16;26:12-18)

1शाऊल प्रभुएरे चेलन धमकाने ते मारने मां मघन थियो, ते तै महायाजके कां जेव। 2ते तैस करां दमिश्क नगरेरे प्राथना घरां केरे लेई चिट्ठी मेग्गी, कि चाए कोई मड़द भोए या कुआन्श ज़ै यीशु पत्ती च़लनेबालो भोए, तैस ट्लेइतां यरूशलेम नगरे मां आने। 3ज़ैखन तै च़लतो-च़लतो दमिश्क नगरेरे नेड़े पुज़्ज़ो, त अचानक अम्बरेरां लौ आई ते तैसेरे च़ेवरे पासन चमकने लगी। 4ते शाऊल ज़मीनी पुड़ खिरको, ते तैस प्रभुएरी आवाज़ आई, “हे शाऊल, हे शाऊल तू मीं किजो सतातस?” 5शाऊले एन पुछ़ू, “हे प्रभु, तू कौन आस?” तैनी ज़ोवं, “अवं यीशु आईं, ज़ैस तू सतातस। 6हुनी उठ ते नगरे मां गा, तैड़ी तीं सेइं ज़ोवं गालू, कि तीं कुन केरनूए।” 7ज़ैना लोक तैस सेइं साथी थिये, तैना च़ुपच़ारे रेइजे, तैन आवाज़ त शुनोती थी, पन लेइहोतू किछ भी न थियूं। 8तैखन शाऊल ज़मीनी पुड़ां खड़े उठो, त तैनी अपनि एछ़्छ़ी घैड़ी त तैस किछ भी न लगू लेइहोने, ते तै तैसेरे सैथेईं हथ्थेरां ट्लेइतां दमिश्क नगरे मां पुज़व। 9ते तैनी ट्लाई दिहाड़न तगर न लेही बटु, ते न तैनी किछ खाव ते पिव।

10दमिश्क नगरे मां यीशुएरो अक चेलो रहतो थियो, प्रभु यीशुए तैस दर्शन देइतां ज़ोवं, “हे हनन्याह!” तैनी ज़ोवं, “हाँ प्रभु ज़ो।” 11तैखन प्रभुए तैस जो ज़ोवं, “उस गेली मां गा ज़ैस जो ‘सिद्धी’ ज़ोतन, ते यहूदारे घरे गा तैड़ी शाऊल नव्वेंरो अक मैन्हुए, ज़ै तरसुस नगरेरो रानेबालोए, तू तैसेरे बारे मां पुछ़ा, किजोकि हेरा तै प्राथना केरने लगोरोए। 12तैनी हनन्याह नव्वेंरो अक मैन्हु अन्तर एइतो लाव, ते एप्पू पुड़ हथ रखतो लाहोरोए कि तै अपनि एछ़्छ़ेईं सेइं फिरी लाहे।” 13हनन्याहे जुवाब दित्तो, “हे प्रभु, मीं एस मैन्हेरे बारे मां लोकन करां बेड़ि गल्‍लां केरती शुनोरिन, ते एन भी कि एनी तेरे लोकन सेइं यरूशलेम नगरे मां कुन-कुन बुरू कियोरूए। 14एस प्रधान याजकन करां अधिकार मैल्होरोए, कि इड़ी भी ज़ैना लोक तीं पुड़ विश्वास केरतन, तैन गिरफ्तार केरतां यरूशलेम नगरे जो ने।” 15पन प्रभुए तैस सेइं ज़ोवं, “तू गा किजोकि मीं तै मैन्हु च़ुनोरोए, कि तै गैर कौमन, राज़न, ते इस्राएलेरे लोकन मेरे बारे मां प्रचार केरे, ते तै मीं च़ुनोरोए कि तै मेरी सेवा केरे। 16ते अवं तैस ज़ोइलो, लोकन मेरे बारे मां ज़ोनेरे वजाई तैस केरहो-केरहो दुख झ़ैलनो पेनोए।” 17तैखन हनन्याह तैस घरे मां जेव, ज़ैड़ी शाऊल थियो, ते तैस पुड़ हथ रेखतां ज़ोवं, “हे ढ्ला शाऊल, प्रभु, मतलब यीशु, ज़ैस बत्तां तू एवरोस ते तीं लेइहोरो थियो, तैनी अवं भेज़ोरोईं, कि तू फिरी लहस ते पवित्र आत्माई सेइं भेरोस।” 18ते तैखन तैसेरे एछ़्छ़न मरां ज़ेरां शेकड़ां झ़ड़ा ते तै लहने लगो, ते खड़े उठतां बपतिस्मो नियो। 19ते किछ रोट्टी खेइतां तैस हिम्मत आई, ते किछ दिहाड़े तै चेलन सेइं साथी दमिश्क नगरे मां राव।

दिमश्के मां शाऊलेरे ज़िरिये प्रचार

20तैसेरां बाद अकदम तै दिमश्क नगरेरे प्राथना घरन मां प्रचार केरने लगो, कि यीशु परमेशरेरू मट्ठूए। 21सब शुन्ने बाले हैरान भोइतां ज़ोने लग्गे, “कुन ई तैए मैन्हु नईं, ज़ै यरूशलेम नगरे मां ज़ैना यीशु मसीह पुड़ विश्वास केरते थिये मारतो थियो? ते इड़ी भी एल्हेरेलेइ एवरो थियो, कि एन लोकन ट्लेइतां प्रधान याजकां केरे हवाले केरे?” 22पन एसेरां बाद शाऊल होरो भी शेक्ति सेइं प्रचार केरतो राव, ते एस गल्‍लरू सबूत देइ-देइ कि यीशु ही मसीहे, दमिश्क नगरेरे रानेबालां यहूदी केरू आशी बंद केरतो राव।

23ज़ैखन शाऊले दश्मिके मां बड़ो वक्त बीतो त यहूदेईं मिलतां तैस मारनेरो मुशोरो कियो। 24पन शाऊले एस गल्‍लरो पतो लगो, तैना त तैस मारनेरे लेई रात दिहैड़ी दारन पुड़ रहते थिये। 25पन राती तैसेरे चेलेईं तै टोकरे मां रख्खो, ते नगरेरे दिवारी पुड़ां रस्से सेइं टोकरी मां ओसैलतां बुन पुज़व।

यरूशलेम नगरे मां शाऊल

26ज़ैखन शाऊल यरूशलेम नगरे मां पुज़्ज़ो त तैनी चेलन सेइं मिलनेरो इंतज़ाम कियो, पन सब तैस करां डरते थी कि तै भी चेलोए। 27पन बरनबासे शाऊल एप्पू सेइं साथी प्रेरितन कां आनो ते तैन ज़ोवं, कि केन्च़रे दमिश्क नगरेरे बत्तां च़लते-च़लते एस प्रभु यीशु लेइहोरोए, ते प्रभुए एस सेइं गल्‍लां कियोरिन, ते एनी केत्रे दिलेरी सेइं दमिश्क नगरे मां यीशुएरे नव्वेंरो प्रचार कियोरोए। 28प्रेरितेईं बरनबासेरी गल्‍लां केरो विश्वास कियो, ते शाऊल तैन सेइं साथी राव, ते यरूशलेम नगरे मां गातो राव। 29ते यूनानी भाषा केरनेबाले यहूदन सेइं भी गलबात केरतो थियो, दिलेर भोइतां प्रभुएरो प्रचार केरतो थियो, पन तैना तैस मारनेरी कोशिश मां रहते थी। 30एल्हेरेलेइ विश्वासी ढ्लाएईं तै कैसरिया नगरे मांजो नियो, ते तैट्ठां तरसुसे नगरे जो भेज़ो।

31त सारे यहूदिया इलाके मां ते गलील इलाके ते सामरिया इलाकेरी कलीसियान मां चैन भोव, ते तरक्‍की भोती जेई, ते तै प्रभुएरे डरे मां ते पवित्र आत्मारे शैन्ति मां च़लती ते बड़े लोकेईं यीशु मसीह पुड़ विश्वास कियो।

लुद्दा ते याफा मां पतरस

32फिरी एरू भोवं कि पतरस सारे इलाके मां हंठतो फिरो, ते तैन पवित्र लोकन साथी भी पुज़ो, ज़ैना लुद्दा नगरे मां रहते थिये। 33त तैस तैड़ी ऐनियास नव्वेंरो अक मैन्हु मैल्हो, तैस अधरंग थियो, ते अठे सालां केरो देंतो खट्टी पुड़ राहोरो थियो। 34पतरसे तैस जो ज़ोवं, “हे ऐनियास! यीशु मसीह तीं बझ़ाते, उठ अपनु बिछ़ान खड़ू केर,” तैखने तै बेझ़ोइतां खड़ो भोव। 35तैखन लुद्दा नगरेरे ते शारोनेरे रानेबालेईं एन हेरतां प्रभु यीशु पुड़ विश्वास कियो।

36याफा नगरे मां अक कुआन्श थी, ज़ेसारू नवं तबीता थियूं (यूनानी भाषाई तैसेरू दोरकास थियूं, ज़ेसेरो मतलब हिरनी) तै विश्वासी थी, ते रोड़ां-रोड़ां कम्मां केरती ते गरीबां केरि मद्दत केरती थी। 37तैने दिहाड़न मां ज़ेइस पतरस लुद्दा मां थियो, तै बिमार भोइतां मेरि जेई, ते तैसारी लाश नेइतां दोपरेरे कमरे मां रख्खोरी थी। 38लुद्दा याफारे नेड़े थियूं, ते ज़ैखन चेलेईं शुनू कि पतरस लुद्दा मां आए, त दूई मैन्हु भेज़तां मिन्नत की, “कि असन कां एजने मां ठढ न ला।” 39तैखन पतरस तैन सेइं साथी च़लो जेव, ते ज़ैखन तैड़ी पुज़्ज़ो त तै बा तैस कमरे मां नियो, सैरी विधवां कुआन्शां लेरां देती थी, ते तैस ड्लखमेइं खेड़ि थी, ते तैना लिगड़ां ज़ैना दोरकास सियोरां थियां हिराने लेगि। 40पतरसे तैना सब बेइरोवं कढे, ते एप्पू ज़ैधू केरे भारे प्राथना केरने लगो, फिरी तैनी लाशरे पासे तुत्तर फिरेइतां ज़ोवं, “हे तबीता, उठ।” तैखन तैसां अपनि एछ़्छ़ी खोल्‍ली, ते पतरसे तेकतां खड़ी भोइ। 41पतरसे हथ्थेरां ट्लेइतां खड़ी की, ते विश्वासी ते विधवां कुआन्शां कुजेइतां ज़ींती ते होशी मां तैन केरे सुपुर्द की। 42एस गल्‍लरी खबर सारे याफा नगरे मां फैली जेई, ते बड़े लोकेईं प्रभु यीशु पुड़ विश्वास कियो। 43पतरस किछ च़िरे तगर याफा नगरे मां शमौन नव्वेंरो एक्‍की मैन्हेरे कां राव, ज़ै चमड़ेरू कम केरतो थियो।

Currently Selected:

प्रेरितां केरां कम्मां 9: BHDNT

Highlight

Copy

Compare