प्रेरितां केरां कम्मां 8

कलीसियाई पुड़ ज़ुलम

1शाऊल तैसेरी मौती सेइं राज़ी थियो। तैस्से दिहाड़े यरूशलेम नगरेरे कलीसियाई पुड़ ज़ुलम भोने लाव ते प्रेरितां केरे अलावा सारे लोक यहूदिया ते सामरियारे इलाकन मांजो तितर-बितर भोए। 2किछ परमेशरेरे भक्त मैन्हेईं स्तिफनुस नेइतां देबतां छ़डो, ते तैसेरे मरने पुड़ बड़ो शोग कियो। 3पन शाऊल कलीसियाई सताने लगोरो थियो, ते तै घर-घर गातो थियो, ते विश्वासी मड़दन ते कुआन्शन बेइरोवं घसीटतो थियो, ते कैद केरतां छ़डतो थियो।

सामरिया मां फिलिप्पुसेरो प्रचार

4पन ज़ैना विश्वासी तितर-बितर भोते थिये तैना खुशखबरी शुनाते च़ले। 5ते फिलिप्पुस सामरियारे एक्‍की नगरे मां गेइतां मसीहेरो प्रचार केरने लगो। 6ज़ैना गल्‍लां तैन लोकेईं फिलिप्पुसेरी करां शुनी, ते ज़ैना निशान तै हिरातो थियो, तैन हेरी-हेरी, तैनेईं अक भोइतां मन लाव। 7ज़ैखन फिलिप्पुसे हुक्म दित्तो, त बड़े लोकन मरां भूतां चिन्डां मैरतां निस्सी जेआं, ते बड़े लोक अधरंगी ते टोन्टे बेज़्झ़ोइ जे। 8ते तैन केरे वजाई सेइं नगरेरे बड़े लोक खुश भोइजेइ।

जैदूगिर शमौन

9शमौन नव्वेंरे एक्‍की मैन्हे सामरियारे नगरे मां सारे लोक अपने जैदेइं सेइं हैरान कियोरे थिये, ते अपने आपे बड्डो खास मैन्हु बनातो थियो। 10निक्‍के बडे सब तैसेरे पासे भोइतां ज़ोने लगे, “ऐह मैन्हु परमेशरेरी तै शक्ति आहे ज़ैस ज़ो महान ज़ोतन।” 11तैनी अपने जैदू सेइं बड़े च़िरेरां देंते सब हैरान कियोरे थिये, एल्हेरेलेइ तैना लोक तैसेरी बड़ी इज़्ज़त केरते थिये। 12पन ज़ैखन फिलिप्पुसे परमेशरेरे राज़्ज़ेरे बारे मां ते यीशु मसीहेरी खुशखबरी प्रचार की त लोकेईं विश्वास कियो, ते मड़देइं कुआन्शेईं बपतिस्मो नेव। 13तैखन शमौने भी फिलिप्पुसेरे प्रचारे पुड़ विश्वास कियो, ते बपतिस्मो नेइतां फिलिप्पुसे सेइं साथी राने लगो ते तै बड़े चमत्कार ते निशान हेरतां हैरान रेइ जेव।

सामरिया मां पतरस ते यूहन्ना

14ज़ैखन यरूशलेम नगरे मां प्रेरितेईं शुनू कि सामरियारे लोकेईं परमेशरेरू वचन कबूल कियोरूए ते तैनेईं पतरस त यूहन्ना तैन कां भेज़े। 15ज़ैखन तैना तैड़ी पुज़्ज़े त तैनेईं तैन लोकां केरे लेई प्राथना की, कि एन पुड़ पवित्र आत्मा उतरे। 16एल्हेरेलेइ कि तैन पुड़ पवित्र आत्मा हेजू न थी उतरोरी, तैनेईं सिर्फ प्रभु यीशु मसीहेरे नंव्वे सेइं बपतिस्मो नीयोरो थियो। 17तैखन यूहन्ना ते पतरसे तैन पुड़ हथ रेखतां प्राथना की, ते तैन भी पवित्र आत्मा उतरी। 18ज़ैखन शमौने हेरू कि प्रेरितां केरे हथ रखने सेइं पवित्र आत्मा उतरतीए, त शमौने पेइंसे एन्हतां प्रेरितन कां पेश किये। 19ते शमौन ज़ोने लगो, “मीं भी शक्ति देथ, कि अवं भी ज़ैस पुड़ हथ रेखी त तैस पुड़ पवित्र आत्मा उतरे।” 20पतरसे तैस सेइं ज़ोवं, “तेरे पेइंसे तीं सेइं साथी गर्क भोन, किजोकि तू पेंइसन सेइं परमेशरेरू दान घिन्नू चातस। 21एस सेवाई मां तेरो कोई भी हिस्सो नईं किजोकि तेरो मन परमेशरे कां साफ नईं। 22तू अपनि इस बुरैई करां मन फिरा, ते प्रभु कां प्राथना केर, शैइद प्रभु तेरे इस बुरे खियाले माफ़ केरे। 23मन फिरा अवं हेरताईं कि तू बड़े जलनी ते पापेरी गुलैमी मां आस।”

24तैखन शमौने जुवाब दित्तो, “मेरे लेई प्रभु कां प्राथना केरा, कि ज़ैन किछ तुसेईं ज़ोवरूए, तैन मीं पुड़ न एज्जे।” 25ते पतरस ते यूहन्ना गवाही देइतां ते प्रभु यीशुएरू वचन शुनेइतां यरूशलेम नगरे मां वापस आए, ते एइते बार सामरी लोकां केरे बड़े ड्लाव्वन मां खुशखबरी शुनाई।

फिलिप्पुस ते कूश मुल्खेरो अधिकारी

26फिरी एरू भोवं कि परमेशरे एक्‍की स्वर्गदूते फिलिप्पुसे सेइं ज़ोवं, “उठ ते दक्षिणेरे बत्तां गा, ज़ै यरूशलेम नगरेरां गाज़ा नगरे जो गातीए। ई रेगिस्तानी बत्ते।” 27तै उठो ते च़लो जेव, ते बत्ती मां तैस अक कूश मुल्खेरो खोजो मैल्हो, ज़ै कूशी केरि रानी कन्दाकारो मंत्री ते खज़ानची थियो, तै आराधना केरने यरूशलेम नगरे मां एवरो थियो। 28तै अपने रथे पुड़ च़ेढ़तां अपने मुल्खे जो वापस एवरो थियो, ते यशायाह नेबेरी किताब ज़ोरे-ज़ोरे सेइं पढ़ने लग्गोरो थियो। 29पवित्र आत्मा फिलिप्पुसे सेइं ज़ोवं, “नेड़े गेइतां रथे सेइं साथी च़ल।” 30फिलिप्पुस देवड़तां रथे कां नेड़े पुज़्ज़ो, त तैस करां यशायाह नेबेरी किताब पढ़ती शुनी, ते तैस पुछ़ू, “तू ज़ैन पढ़ने लगोरोस कुन तैन समझ़तस?” 31तैनी ज़ोवं, “ज़ांतगर कोई मीं न समझ़ाए त अवं केन्च़रे सेमझ़ी?” ते तैनी फिलिप्पुसे कां मिन्नत की, कि एई रथे पुड़ बिश।

32पवित्रशास्त्रे मरां ज़ैन तै पढ़ने लग्गोरो थियो,

त तैन इन थियूं, “तैनेईं तै भैड्डरो ज़ेरो मारने जो नियो,

ज़ेन्च़रे गबड़ू अपनि उन्ना बरधांने बालां केरे सामने च़ुप रहते,

तेन्च़रे तैनी भी अपनु आशी न खोल्‍लू।”

33तै घटिया समझ़ो जेव ते तैस कोई न्याय न मैल्हो,

ते कोई भी तैसेरे वंशेरे बारे मां न ज़ोई सके,

किजोकि धेरती पुड़ तैसेरे वंश भोने करां तैस मारतन।

34खोजे फिलिप्पुसे पुछ़ू, “अवं तीं कां मिन्नत केरताईं, मीं सेइं ज़ो कि ऐह नबी केसेरे बारे मां ज़ोते, अपने या होरि केन्चेरे बारे मां ज़ोते?” 35तैखन फिलिप्पुसे ज़ोनू शुरू कियूं, तैनी पवित्रशास्त्रे करां शुरू केरतां यीशुएरो खुशखबरी शुनाई। खोजे तैना गल्‍लां शुनी ते विश्वास कियो। 36बत्तां च़लते-च़लते तैना एक्‍की तालाबे कां पुज़े, तैखन खोजे ज़ोवं, “इड़ी पानी आहे, हुनी मीं बपतिस्मो नेने करां कौन रोकी सकते?” 37फिलिप्पुसे ज़ोवं, “अगर तू पूरे दिले सेइं विश्वास केरतस त बपतिस्मो नेही सकतस,” तैनी जुवाब दित्तो, “अवं विश्वास केरताईं कि यीशु ही परमेशरेरू मट्ठूए।” 38फिरी तैनी रथ रोकनेरे लेई हुक्म दित्तो, ते खोजो ते फिलिप्पुस दूईये पैनी मां जे, ते फिलिप्पुसे तैस बपतिस्मो दित्तो। 39ज़ैखन तैना पैनी मरां बेइर निस्से त प्रभुएरी पवित्र आत्मा फिलिप्पुस तैट्ठां नेव, ते खोजे तै फिरी न लाव, परमेशरे तै बच़ाव ते तै बड़ी खुशी सेइं वापस अपने मुल्खे जो जेव। 40ते फिलिप्पुस अश्दोदे मांमेइं निस्तो च़लतो सारे ड्लाव्वन मां खुशखबरी शुनातो कैसरिया मां पुज़्ज़ो।

Currently Selected:

प्रेरितां केरां कम्मां 8: BHDNT

Highlight

Copy

Compare