2 कुरिन्थियों 1

अभिवादन

1अवं पौलुस परमेशरेरे मेर्ज़ी सेइं यीशु मसीहेरो प्रेरिताई, मेरे त कने ढ्ला तीमुथियुसेरे तरफां ई चिट्ठी परमेशरेरी तैस कलीसियारे नंव्वे, ज़ै कुरिन्थुस मांए, ते सारे अखाया इलाकेरे सब पवित्र लोकां केरे नंव्वे, 2इश्शे बाजी परमेशर ते प्रभु यीशु मसीहेरे तरफां तुसन अनुग्रह ते शान्ति मैलती राए।

परमेशरेरू शुक्र केरनू

3परमेशरेरू शुक्र भोए ज़ै इश्शे प्रभु यीशु मसीहेरो बाजी, ज़ै दया केरनेबालो बाजीए, ते ज़ै असन हमेशा तसल्‍ली देनेबालो परमेशरे। 4तै इश्शे सेब्भी मुसीबतन मां असन तसल्‍ली देते; ताके अस तैस शैन्तरे वजाई सेइं ज़ै परमेशर असन देते, तैन भी तसल्‍ली देइ बटम, ज़ैना कोन्ची वजाई सेइं मुसीबतन मां आन।

5किजोकि ज़ेन्च़रे मसीहे दुख झ़ैल्‍लोरेन तेन्च़रे अस भी दुख झ़ैल्‍लतम, एल्हेरेलेइ असन तसल्‍ली भी मसीहेरे ज़िरिये जादे भोतीए। 6अगर अस दुख झ़ैल्‍लतम, ते ई तुश्शे तसल्‍लरे ते तुश्शे मुक्तरे लेइए ते अगर असन तसल्‍ली मैलतीए, ते ई तुश्शे तसल्‍लरे लेई आहे; ज़ेसेरे अस्सरे सेइं तुस सबरी सेइं तैना दुखन झ़ैल्‍लतथ, ज़ैना अस भी झ़ैल्‍लतम। 7ते इश्शी उमीद तुश्शे बारे मां पक्‍कीए; किजोकि अस ज़ानतम, कि ज़ेरे दुख तुसेईं असन सेइं साथी झ़ैल्‍ले, तेरी तसल्‍ली तुसन भी असन सेइं साथी मैल्हेली, ज़ै असन परमेशर देलो।

8हे ढ्लाव ते बेइनव, अस न चाम कि तुस इश्शे तैस दुखे करां अनज़ान राथ, ज़ै आसिया इलाके मां असन पुड़ अव, कि एरो भारी बोझ असन पुड़ एवरोए थियो, ज़ै इश्शे लेई छ़ूनो मुश्किल थियो, इड़ी तगर कि असन अग्रोवं जो ज़ींनेरी कोई उमीद न थी। 9बल्के असेईं अपने मने मां समझ़ोरू थियूं, कि अस मारे गानेम ते अस अपनो भरोसो न रखम, बल्के परमेशरे पुड़ भरोसो रखम ज़ै मुड़दन ज़ींते केरते। 10तैने अस एत्रे बडे मौतरे खतरे करां बच़ाए, ते बच़ालो; ते तैस करां इश्शी ई उमीदे, कि तै अग्रोवं भी बच़ातो रालो।

11तुस भी मिलतां प्राथनाई सेइं इश्शी मद्दत केरेले, कि ज़ैना बरकतां असन बड़ां लोकां केरे ज़िरिये मैल्ही, किजोकि परमेशरे अनुग्रहे सेइं इश्शी हिफाज़तरे लेई बेड़ि प्राथना शुन्नी, तैल्हेरेलेइ बड़े लोक इश्शू भोतू परमेशरेरू शुक्र केरन।

पौलुसेरे सफरेरे बारे मां खियाल बेदलोते

12किजोकि अस अपने इस ज़मीरेरे गवैही पुड़ घमण्ड केरतम, कि दुनियाई मां, खास केरतां तुसन मां इश्शो चाल चलन परमेशरेरे लैईक ते पवित्रतैई ते सच़्च़ैई सेइं थियो। ज़ै दुनियारे ज्ञाने सेइं नईं, बल्के परमेशरेरे अनुग्रहे सेइं साथी थियो। 13अस हमेशा तुसन इन लिखतम ताके तुस पढ़थ ते समझ़थ, ते मीं उमीदे, कि आखरी तगर समझ़ते भी राले। 14ज़ेन्च़रे तुसन मरां केत्रेईं मन्नोरू भी आहे, कि अस तुश्शे घमण्डेरी वजाम; तेन्च़रे तुस भी प्रभु यीशुएरे वापस एजनेरे दिहाड़े इश्शे लेई घमण्डेरी वजा भोल्हे।

सफरे मां बदलाव

15ते इस भरोसे सेइं, अवं चातो थियो कि पेइलो तुसन कां एज्जी; कि तुसन दुगनी बरकत मैल्हे। 16ते तुसन मेइं निस्तां मकिदुनिया इलाके जो गेईं ते फिरी मकिदुनियां तुसन कां एज्जी, ते तुस मेरी सफरेरी ज़रूरतरे मुताबिक मद्दत केरतां यहूदिया इलाकेरे पासे किछ दूर पुज़ाथ।

17एल्हेरेलेइ मीं ज़ैने ई इच्छा कियोरी थी कुन मीं चंचलता हिराई? या ज़ैन केरनू चाताईं कुन दुनियारे लोकां केरे ज़ेरू केरनू चाताईं, कि अवं गल्‍ली मां हाँ, हाँ भी केरि; नईं, नईं भी केरि? 18ज़ेन्च़रे परमेशर वफादारे, तेन्च़रे कि इश्शे तैस वचने मां ज़ै तुसन सेइं ज़ोवं, “हाँ” ते “नईं” दूईये न मैल्हे।

19किजोकि परमेशरेरू मट्ठू यीशु मसीह ज़ेसेरो इश्शे ज़िरिये मतलब मेरे ते सिलवानुस ते तीमुथियुसेरे ज़िरिये तुसन मां प्रचार भोव; तैस मां “हाँ” ते “नईं” दूईये न थी; पन तैस मां “हाँए, हाँ” भोइ। 20किजोकि परमेशरेरे ज़ेत्रे वाधेन, मसीह मां हाँए सेइं आन, एल्हेरेलेइ मसीहेरे ज़िरिये आमीन भी भोइ, कि इश्शे ज़िरिये परमेशरेरी महिमा भोए।

21ते ज़ै असन तुसन सेइं साथी मसीह मां मज़बूत केरते, ते ज़ैने इश्शू अभिषेक कियोरूए, तैए परमेशरे। 22ज़ैने असन पुड़ छाप भी की, ते ज़ेन्च़रे कोन्ची चीज़रे लेई साई देतन तेन्च़रे तैनी पेइली आत्मा इश्शे मने मां दित्ती।

23परमेशर मेरे इस सच़्च़ेरो गवाहे कि अवं कुरिन्थुस नगरे मां दुबारां एल्हेरेलेइ नईं एवरोए कि अवं तुसन दुख देनो चातो थियो। 24इन नईं, कि अस विश्वासेरे बारे मां तुसन पुड़ राज़ केरनू चातम; पन तुश्शे आनन्दे मां तुश्शी मद्दत केरनेबाले आम, किजोकि तुस विश्वासे सेइं मज़बूत रहतथ।

Currently Selected:

2 कुरिन्थियों 1: BHDNT

Highlight

Copy

Compare