1 कुरिन्थियों 16

विश्वासी लोकां केरे लेई दान

1हुनी तुश्शे तैस चन्देरे सवालेरे बारे मां ज़ै यरूशलेम नगरेरे परमेशरेरे लोकां केरे लेई कियो गाते, तुसेईं भी तेन्च़रे कियोरू लोड़े ज़ेन्च़रे मीं गलातियारे कलीसियान हुक्म दित्तो। 2हफतेरे पेइले दिहाड़े तुसन मरां हर कोई अपने आमदनेरे मुताबिक किछ एप्पू कां रखा, कि मेरे एजने पुड़ चन्दो अकोट्ठो न केरनो पे। 3ज़ैखन अवं तैड़ी भोईं, अवं किछ लोकन भेज़ेलो ज़ैन तुस च़ुनेले कि एना भरोसेरे काबलन, चन्दो घिन्तां यरूशलेम नगरे जो गान। अवं तैन कां चिट्ठी भी भेज़ेलो ताके विश्वासी लोक तैन केरे बारे मां ज़ानन। 4ते अगर मेरू भी गानू ज़रूरीए, त तैना मीं सेइं साथी गाले।

पौलुसेरो सफरेरे बारे मां कार्येक्रम

5ते मकिदुनिया गानेरे बाद अवं तुसन कां एज्जी राहोरोईं, किजोकि मीं मकिदुनिया मेइं गानेरो बिस्तार बनोरोए। 6भोइ सकते, अवं तुसन सेइं साथी किछ च़िरे रुकेलो, शैइद पूरे हिंवतड़ो, फिरी तुस ज़ेरां मीं गानू भोल्हु, तेरहां मीं भेज़ां। 7अगर ई परमेशरेरी मर्ज़ी भोल्ही, ते मीं उमीदे अवं बादे मां जादे च़िरेरे लेई तुसन कां एज्जेलो, न कि इस वक्ते थोड़े च़िरेरे लेई। 8पन अवं पिन्तेकुस्त तिहारे तगर इफिसुस नगरे मां रानोईं। 9किजोकि मीं बड़ो रोड़ो मौको मैल्होरे ज़ैस सेइं अवं तैन कम केरि सकताईं ज़ेसेरो अस्सर बड़ोए, चाए बड़े लोक मेरी खलाफत केरनेबाले आन।

10अगर तीमुथियुस एज्जे, त तैस कबूल केरा, तैसेरी रोड़े च़ारे आदर केरा, किजोकि तै मेरो ज़ेरो प्रभुएरू कम केरते। 11एल्हेरेलेइ कोई तैस घटिया न समझ़े, पन तैन केरे सफरेरे लेई ज़ै ज़रूरते तैन खुशी सेइं देथ। ताके मीं कां एज्जन, किजोकि अवं तैस लगोरोईं बलगने, कि तै विश्वासी ढ्लान सेइं साथी एज्जे। 12ते विश्वासी साथी अपुल्‍लोसे सेइं मीं बड़ी बिनती की, कि तुसन कां होरि विश्वासी मैन्हन सेइं साथी गाए ज़ैना तुसन सेइं मिलने एवरेन। पन तैनी इस वक्ते गानू न चाव, पन ज़ैखन ठीक वक्त भोल्हो, तैखन एज्जेलो।

आखरी आदेश ते नमस्कार

13खबरदार राथ, विश्वासे मां मज़बूत भोथ, हिम्मत रखा, मज़बूत भोथ। 14ज़ैन किछ केरतथ तैन प्यारे सेइं केरा।

15हे ढ्लाव ते बेइनव, तुस स्तिफनासेरे टब्बरे ज़ानतथ, कि तैना अखाया इलाकेरे, पेइले मसीह पुड़ विश्वास केरनेबालेन, ते परमेशरेरे लोकां केरि मद्दत केरनेरे लेई ज़ैन किछ केरि बटते थिये तैनेईं तैन कियूं। 16अवं तुसन कां बिनती केरताईं कि एरे लोकां केरे अधीन राथ, बल्के तैन केरे भी ज़ैना इस कम्मे मां मेहनत केरतन ते मद्दत केरनेबालन। 17ते अस स्तिफनास ते फूरतूनातुस ते अखइकुसेरे एजने सेइं खुश आई, किजोकि ज़ेइस तुस इड़ी न थिये, तैनेईं मेरी ज़रूरतां पूरी केरनेरे लेई मेरी मद्दत की। 18ज़ेन्च़रे तुसेईं अवं खुश कियो, तेन्च़रे तैनेईं भी अवं खुश कियो, एल्हेरेलेइ एरे लोकां केरि तारीफ़ केरा।

19आसिया इलाकेरे कलीसियां केरे सारे विश्वासी लोकां केरे तरफां तुसन नमस्कार; अक्विला ते तैसेरी कुआन्श प्रिस्कारे तरफां ते तैन केरे घरे कलीसियाई भी तुसन प्रभु मां हछु-हछु नमस्कार। 20इट्ठेरे विश्वासी लोक तुसन नमस्कार ज़ोतन, मसीहेरे प्यारे सेइं एक्‍की होरि जो नमस्कार केरा।

21अवं पौलुस अपने हथ्थे सेइं नमस्कार लिखताईं। 22अगर कोई प्रभु सेइं प्यार न रख्खे तै लानती भोए, हे इश्शे प्रभु एई! 23प्रभु यीशुएरो अनुग्रह तुसन पुड़ भोतो राए। 24अवं तुसन सेब्भन सेइं प्यार केरताईं ज़ैन केरो रिश्तो यीशु मसीह सेइं साथीए। आमीन।

Currently Selected:

1 कुरिन्थियों 16: BHDNT

Highlight

Copy

Compare