1 कुरिन्थियों 12

आत्मिक वरदानां

1हे मेरे ढ्लाव ते बेइनव, हुनी तुश्शे तैस सवालेरे बारे मां ज़ै तुसेईं पवित्र आत्मारे वरदानां केरे बारे मां पुछ़ो, अवं चाताईं तुस रोड़े च़ारे समझ़ा। 2तुस ज़ानतथ, कि तुस विश्वास केरने करां पेइले ज़ेन्च़रे ज़ीते थिये तुसन पुड़ भूतां केरो अस्सर भोतो थियो, कि तुस मूरती केरि पूज़ा केरथ, ज़ैना ज़ींती न भोन। 3एल्हेरेलेइ अवं चाताईं तुस ज़ानथ, कि ज़ै कोई परमेशरेरे आत्मारे ज़ुवाने सेइं ज़ोते, तै न ज़ोए, कि यीशु लानतीए, सिर्फ अक्‍के पवित्र आत्माए, ज़ै इस काबल बनाते, कि कोई भी इन ज़ोई सकते कि “यीशु प्रभुए।”

4वरदानां त बड़े किसमां केरन, पन इना सब परमेशरेरो आत्मा देते। 5अस बड़े किसमां केरू कम परमेशरेरे लेई केरतम, पन अस तैस्से एक्‍की प्रभुएरी सेवा केरतम। 6परमेशर इश्शे ज़िन्दगी मां अलग-अलग किसमे सेइं कम केरते, पन तैए परमेशर ज़ै असन सेब्भन तैसेरेलेइ कम केरनेरी काबलीत देते। 7असन सेब्भन अक एरी काबलीत दित्तोरीए, ज़ैस सेइं पवित्र आत्मारी हज़ूरी साबत भोती, ताके अस अपने सैथी विश्वासी लोकां केरि मद्दत केरम। 8किजोकि परमेशरेरे आत्मारे ज़िरिये एक्‍की मैन्हु समझ़दैरारो सन्देश शुनानेरी काबलीत दित्तोरीए, ते होरि मैन्हु तैस्से आत्मारे ज़िरिये सेइं ज्ञानेरो सन्देश शुनानेरी काबलीत दित्तोरीए। 9तैए आत्मा एक्‍की मैन्हु मसीह पुड़ मज़बूती सेइं विश्वास केरनेरी काबलीत देते, ते तैए होरि मैन्हु, बिमार लोकन बझ़ानेरी काबलीत देते। 10आत्मा एक्‍की मैन्हु चमत्कारेरां कम्मां केरनेरी शक्ति देते, ते होरि परमेशरेरो सन्देश शुनानेरू वरदान, ते कोन्ची आत्मां केरि परख, ते कोन्ची मैन्हु बड़े किसमां केरि भाषां ज़ोनेरी काबलीत दित्ती, ज़ैना तैने नईं पेढ़ोरी, ते होरि मैन्हु तैन भाषां केरो मतलब समझ़नेरी काबलीत दित्ती, ज़ैना तैनेईं नईं पेढ़ोरी। 11सब वरदानां तैस्से एक्‍की पवित्र आत्मारू कम्मे। तैए ज़ेन्च़रे चाते सेब्भी विश्वासी लोकन वरदान देते।

जिसम अक अंग हछ्छे

12किजोकि ज़ेन्च़रे इश्शे जिसम त अक्‍के ते तैसेरे अंग बड़ेन, ते तैस एक्‍की जिसमेरे अंग हछ्छे भोने सेइं भी सब मिलतां अक्‍के जिसमे, तेन्च़रे मसीह भी आहे, ते तैना भी ज़ैना तैस पुड़ विश्वास केरतन। 13किजोकि असेईं सेब्भेईं कुन यहूदी, कुन गैर कौमां, कुन गुलाम, कुन आज़ाद एक्‍की आत्मारे ज़िरिये अक जिसम भोनेरे लेई बपतिस्मो नेवरोए, ते असन सेब्भन अक्‍के आत्मा मैल्ही।

14इश्शे जिसमे मां अक्‍के अंग नईं, बल्के बड़ेन। 15अगर पव ज़ोए अवं हथ नईं, एल्हेरेलेइ अवं जिसमेरो अंग नईं। त कुन तैसेरे ज़ोने सेइं तै जिसमेरो अंग न राए? 16ते अगर कन ज़ोए, “अवं अछ़ नईं, एल्हेरेलेइ अवं जिसमेरो अंग नईं,” त कुन तैसेरू एरू ज़ोने सेइं तै जिसमेरो न राए? 17अगर सारो जिसम अछ़्छ़े भोथी त शुन्नू कोट्ठां भोथू? ते अगर सारो जिसम कन भोथो त शींघनू कोट्ठां भोथू? 18पन सच़्च़े परमेशरे इश्शे जिसमे मां अंग अपने मेर्ज़ी सेइं अक-अक केरतां इश्शे जिसमे मां अपने-अपने ठैरी रखोरेन। 19अगर तैना सभे अक्‍के अंग भोथे, त फिरी जिसम न भोथो। 20एल्हेरेलेइ, जिसमेरे बड़े अंग भोने सेइं अक जिसम बनते। 21अछ़ हथ्थे सेइं न ज़ोई सके, “मीं तेरी ज़रूरत नईं,” ते न क्रोड़ी पव्वन सेइं ज़ोई बटतीए, “मीं तेरी ज़रूरत नईं।” 22पन जिसमेरे अंग ज़ैना होरन करां कमज़ोर लेइहोतन, बड़े ज़रूरिन। 23ते जिसमेरे ज़ैन अंगन अस आदरारे काबल न समझ़म तैन केरि अस जादे आदर देतम; ते इश्शे अशोबते अंग होरे भी रोड़े भोतन। 24फिरी इश्शे शोबते अंगन एसेरी ज़रूरत नईं, पन परमेशरे जिसम बनेवरोए, कि ज़ैस अंगे घटी थी तैस होरि भी जादे आदर भोए। 25परमेशरे एन कियूं ताके जिसमेरे अंगन मां अन-बन न भोए, पन तैना एक्‍की होरेरी देख-भाल केरन। 26एल्हेरेलेइ अगर जिसमेरे एक्‍की अंगे दुख मैलते, त सारी जान ते सब अंग तैस सेइं साथी दुखी भोतन; ते अगर एक्‍की अंगेरी बडीयाई भोतीए; त तैस साथी सब अंग आनन्द केरतन।

27एन्च़रे तुस सब मिलतां मसीहेरो जिसमथ, ते तैसेरे जिसमेरे अंगथ। 28मसीहेरी जानी मां यानी कलीसियाई मां, परमेशरे असन अलग-अलग कम केरने जो दित्तोरूए, पेइले प्रेरित, दूइयोवं नबी, ट्लेइयोवं शिक्षा देनेबाले, फिरी तैना, ज़ैन चमत्कार केरनेरो अधिकार दित्तोरोए। फिरी तैनी तैना ज़ैन बझ़ानेरो अधिकार दित्तोरोए, ते तैना ज़ैन होरि केरि मद्दत केरनेरी काबलीत दित्तोरोए, ज़ैना प्रधान्न, तैना ज़ैन पवित्र आत्मारे तरफां अलग-अलग किसमां केरि भाषां ज़ोनेरी काबलीत मैल्ही। 29हर कोई प्रेरित नईं। हर कोई नबी नईं। हर कोई शिक्षा देनेबालो नईं। हर कोई चमत्कार केरनेबालो नईं। 30कुन सेब्भन बझ़ानेरू वरदान मैल्होरू। हर कोई अलग-अलग भाषां केरनेबालो नईं। हर कोई भाषां केरो मतलब समझ़ाने बालो नईं। 31सेब्भन कां तरजमो केरनेरी काबलीत नईं, रोड़ू त इन आहे पवित्र आत्मां करां वरदानां हासिल केरनेरी बेड़ि इच्छाई मां राथ। पन सच़्च़े रोड़ू कुने, तैन अवं हुनी ज़ोताईं।

Currently Selected:

1 कुरिन्थियों 12: BHDNT

Highlight

Copy

Compare