1 कुरिन्थियों 11

1ज़ेन्च़रे अवं मसीहेरी ज़ेरि चाल च़लताईं तुस भी मेरी ज़ेरि चाल च़ला।

आराधनाई मां दोग ढकनो

2हे ढ्लाव ते बेइनव, अवं तुश्शी तारीफ़ केरताईं, किजोकि तुस मीं हर वक्त याद केरते रहतथ; ते ज़ै शिक्षां मीं तुसन दित्ती तैन केरे मुताबिक च़लतथ। 3ते अवं चाताईं, कि तुस इन ज़ानथ, हर एक्‍के मड़देरी क्रोड़ी मसीहे, ते कुआन्शरी क्रोड़ी मड़दे, ते मसीहेरी क्रोड़ी परमेशरे। 4ज़ै मड़द क्रोड़ी ढेकतां प्राथना या भविष्यिवाणी केरते, तै अपने क्रोड़ारी अनादर केरते, किजोकि तैन घमण्डेरे बराबरे। 5पन ज़ै कुआन्श बगैर दोग ढेकतां प्राथना या भविष्यिवाणी केरतीए, तै अपने क्रोड़ारी अनादर केरती, किजोकि तैन टिन्डी भोनेरे बराबरे। 6अगर कुआन्श ओड़नी न ओड़े, त दोग भी कट्टे; अगर कुआन्शरे लेई दोग कटानो शरमरी गल्‍ले, त ओड़नी ओड़े। 7हाँ मड़दे अपनो दोग ढकनो जाइज़ नईं, किजोकि तै परमेशरेरू रूप ते शोभाए; पन कुआन्श मड़देरी शोभाए! 8किजोकि मड़द कुआन्शी मरां नईं, बल्के कुआन्श मड़दे मरां निसोरिए। 9ते मड़द कुआन्शरे लेई नईं पन कुआन्श मड़देरे लेई बनेवरीए। 10एल्हेरेलेइ स्वर्गदूतां केरे वजाई सेइं कुआन्शरे लेई इन ठीके कि अपने दोग ढक्‍के, ताके इस सेइं बांदू भोए कि तै मड़देरे अधीने। 11फिरी भी प्रभु पुड़ विश्वास केरनेबालन मां कुआन्श मड़दे करां अलग नईं, ते न मड़द कुआन्शरी करां अलगे। 12किजोकि ज़ेन्च़रे पेइली कुआन्श मड़दे मरांए, पन हुनी मड़दन कुआन्श ज़र्म देतीए। सब चीज़ां परमेशरे करां आन। 13तुस एप्पू फैसलो केरा, कुन कुआन्शी खुले आम आराधनाई मां बगैर दोग ढेकतां परमेशरे कां प्राथना केरनि शोभतीए? 14कुन तुस भी न ज़ानथ, कि अगर मड़द लमो दोग रख्खे त तैसेरेलेइ शर्मे। 15पन अगर कुआन्श लमो दोग रख्खे; ते तैसेरेलेइ शोभाए किजोकि बाल तैसेरे ढकनेरे लेई दित्तोरेन। 16पन अगर कोई मीं सेइं राज़ी न भोए, त इन समझ़े न इश्शी न इश्शे परमेशरेरी कलीसियां केरि एरी रीते।

प्रभु भोजेरे बारे मां

(मत. 26:26-29;मरक. 14:22-25;लूक. 22:14-20)

17इस बारे मां अवं तुसन इन ज़ोताईं, अवं तुश्शी तारीफ़ न केरि, एल्हेरेलेइ कि तुश्शे अकोट्ठे भोने सेइं भलियाई नईं, बल्के नुकसान भोते। 18किजोकि पेइलू त अवं इन शुनताईं, कि ज़ैखन तुस कलीसियाई मां आराधनारे लेई अकोट्ठे भोतथ, त तुसन मां अन-बन भोतीए ते अवं किछ हद्दी तगर याकीन केरताईं। 19पन, बिलकुल तुसन मां बटवारो भोवरो लोड़े, ताके तुसन ज़ैन कां परमेशरेरी मन्ज़ूरीए पिशाने गाथ। 20ते ज़ैखन तुस इश्शे प्रभु यीशुएरी मौती याद केरनेरे लेई एक्‍की ठैरी अकोट्ठे भोतथ, त तुश्शे बर्तावे सेइं इन न लग्गे कि प्रभु भोज खानेरे लेई अकोट्ठे भोवरेथ। 21किजोकि खानेरे वक्ते हर कोई अपनो ड्लाछ़ड़ो होरन करां पेइलो खाते, ते किछ त नियन्नो रहतन, ते किछ मतवालो भोइ गातन। 22कुन खाने पीनेरे लेई तुसन घर नईं या परमेशरेरी कलीसियाई घटिया समझ़तथ, कि ज़ैन कां नईं तैन शरमिन्दा केरा अवं तुसन कुन ज़ोईं? कुन इस गल्‍ली मां तुश्शी तारीफ़ केरि? अवं तारीफ़ न केरि।

23ज़ै शिक्षा मीं प्रभु करां पुज़ी तै शिक्षा मीं तुसन दित्ती, कि प्रभु यीशुए ज़ैस राती तै ट्लुवाव जेव तैने रोट्टी नी। 24ते शुक्र केरतां ट्लोड़ी, ते ज़ोवं, “कि ई रोट्टी मेरे जानी हिराती, ज़ै तुश्शे मुक्तरे लेई बलिदान की गातीए, मेरी यादी मां इन्ने केरा।” 25ते एन्च़रे ज़ैखन तैनेईं रोट्टी खाइ, यीशुए दाछ़रो कटोरो भी नेव, ते ज़ोवं, “ई कटोरो मेरे खूने मां नंव्वो करारे, ज़ैखन भी पीथ, मेरे यादी मां इन्ने केरा।” 26किजोकि ज़ैखन ई रोट्टी खाथ, ते इस कटोरे मरां पीथ, त प्रभुएरे मौती ज़ांतगर तै न एज्जे, इस बारे मां ज़ोते राथ।

27एल्हेरेलेइ ज़ै कोई प्रभुएरे रोट्टी नाजाइज़ तरीके सेइं खाए, या प्रभुएरे कटोरे मरां पीये, तै प्रभुएरे जानरो ते खूनेरे खलाफ पापी भोल्हो। 28एल्हेरेलेइ मैन्हु अपने बर्तावे परखे ते एन्च़रे इस रोट्टी मरां खाए, ते इस कटोरे मरां पीये। 29किजोकि ज़ै इस रोट्टी खाते ते कटोरे मरां पीते बार इन न पिशाने कि तैसेरो रिश्तो प्रभुएरी जानी सेइं केरोए, तै इस खाने पीने सेइं एप्पू पुड़ आफत आनते। 30एल्हेरेलेइ तुसन मरां बड़े कमज़ोर ते रोगी आन, ते बड़े मेरि भी जे। 31एल्हेरेलेइ अगर अस पेइले अपनो आप परखम त परमेशर असन सज़ाह न देलो। 32पन प्रभु असन सज़ाह देइतां शिखालते एल्हेरेलेइ कि अस दुनियाई सेइं साथी दोषी न भोम। 33ते हे मेरे ढ्लाव ते बेइनव, ज़ैखन तुस प्रभुएरी रोट्टी खानेरे लेई अकोट्ठे भोतथ, एक्‍की होरि बलगा। 34अगर कोई नियन्नो भोए त अपने घरे मां खाए, ज़ैस सेइं तुस अकोट्ठे भोथ, रोड़े च़ारे बर्ताव केरा, ज़ैस सेइं प्रभु तुसन सज़ाह न दे, ते होरि गल्‍लां अवं एइतां ठीक केरेलो।

Currently Selected:

1 कुरिन्थियों 11: BHDNT

Highlight

Copy

Compare