यहो. 24

शेकेम नगर म्ह करया गया करार

1फेर यहोशू नै इस्राएल के सारे गोत्रां ताहीं शेकेम नगर म्ह कठ्ठा करया, अर इस्राएल के बुजुर्ग माणसां, अर खास आदमियाँ, अर न्यायियाँ, अर सरदारां ताहीं बुलवाया; अर वे परमेसवर कै स्याम्ही हाजिर होए। 2फेर यहोशू नै उन सारे माणसां तै कह्या, “इस्राएल का परमेसवर यहोवा इस तरियां कहवै सै, के पुराणे बखत म्ह अब्राहम अर नाहोर का पिता तेरह और, तेरे पूर्वज फरात महानद के उस पार रहन्दे होए दुसरे देवत्यां की उपासना करै थे। 3अर मन्‍नै थारे पूर्वज अब्राहम ताहीं फरात नदी के उस पार तै ल्याकै कनान देश की सब जगहां म्ह फिराया, अर उसका वंश बढ़ाया। अर उसतै इसहाक ताहीं दिया; 4फेर मन्‍नै इसहाक ताहीं याकूब अर एसाव दिए। अर एसाव ताहीं मन्‍नै सेईर नाम का पहाड़ी देश दिया के वो उसका अधिकारी हो, पर याकूब बेट्यां-पोत्यां समेत मिस्र म्ह गया।” 5फेर मन्‍नै मूसा अर हारुन ताहीं भेजकै उन सारे काम्मां के जरिये जो मन्‍नै मिस्र म्ह करे उस देश ताहीं मारया; अर उसकै बाद थमनै मिस्र देश म्ह लिकाड़ ल्याया। 6अर मै तेरे पुरखां नै मिस्र देश म्ह तै लिकाड़ ल्याया, अर थम समुन्दर कै धोरै पोहचे; अर मिस्रियाँ नै रथ अर घुड़सवारां ताहीं गैल लेकै लाल समुन्दर तक तेरे पूर्वजां का पिच्छा करया। 7अर जिब थारे पूर्वजां नै यहोवा की दुहाई दी फेर उसनै थारे अर मिस्रियाँ कै बीच म्ह अंधियारा कर दिया, अर उनपै समुन्दर का पाणी बहाकै उन ताहीं डबो दिया; अर जो कुछ मन्‍नै मिस्र देश म्ह करया जिसा के थम जाणो सो के उस ताहीं थारे पूर्वजां नै अपणी आँखां तै देख्या; फेर थम घणे दिन तक बियाबान म्ह रहे। 8फेर मै थमनै उन एमोरियां के देश म्ह ले आया, जो यरदन नदी के उस पार बसे थे; अर वे थारै तै लड़े अर मन्‍नै उन ताहीं थारे वश म्ह कर दिया, अर थम उनके देश के अधिकारी होगे, अर मन्‍नै उनका थारे स्याम्ही तै सत्यानाश कर दिया। 9फेर मोआब के राजा सिप्पोर का बेट्टा बालाक उठकै इस्राएल तै लड्या; अर थमनै श्राप देण खात्तर बोर के बेट्टे बिलाम ताहीं बुलवा भेज्जा, 10पर मन्‍नै बिलाम की न्ही सुणी; वो थमनै आशीष ए आशीष देन्दा गया; इस तरियां मन्‍नै थारे ताहीं उसके हाथ तै बचाया। 11फेर थम यरदन पार होकै यरीहो नगर कै धोरै आए, अर जिब यरीहो नगर के माणस, अर एमोरी, परिज्जी, कनानी, हित्ती, गिर्गाशी, हिब्बी, अर यबूसी थारै तै लड़े, फेर मन्‍नै उन ताहीं थारे हाथ म्ह कर दिया। 12अर मन्‍नै थारे आग्गै बर्रों ताहीं भेज्या, अर उन ताहीं एमोरियां के दोनु राजयां ताहीं थारे स्याम्ही तै भगा दिया; देक्खो, यो थारी तलवार या धनुष का काम न्ही होया। 13फेर मन्‍नै थारे ताहीं इसा देश दिया जिस म्ह थमनै मेहनत न्ही करी थी, अर इसे नगर भी दिए सैं जिन ताहीं थमनै न्ही बसाया था, अर थम उन म्ह बसे सो; अर जिन दाख अर जैतून के बगीच्यां के फळ थम खाओ सो उन ताहीं थमनै न्ही लगाया था।

14“इस करकै इब यहोवा का डर मानकै उसकी सेवा खराई अर सच्‍चाई तै करो; अर जिन देवत्यां की सेवा तेरे पुरखा फरात के उस पार अर मिस्र म्ह करै थे, उननै दूर करकै यहोवा की सेवा करो। 15अर जै यहोवा की सेवा करणी थमनै बुरी लाग्गे, तो आज चुण ल्यो के थम किसकी सेवा करोगे, चाहे उन देवत्यां की जिनकी सेवा थारे पुरखा फरात महानद कै उस पार करै थे, अर चाहे एमोरियां के देवत्यां की सेवा करो जिनके देश म्ह थम रहो सो; पर मै तो अपणे घरान्‍ने समेत यहोवा ए की सेवा रोज करया करुँगा।”

16फेर माणसां नै जवाब दिया, “यहोवा नै त्याग कै दुसरे देवत्यां की सेवा करणा म्हारे तै दूर रहवै; 17क्यूँके म्हारा उद्धार परमेसवर यहोवा तै ए सै जो हमनै अर म्हारे पुरखां नै गुलामी के घर, यानिके मिस्र देश म्ह तै लिकाड़ ल्याया, अर म्हारी आँखां आग्गै बड़े-बड़े चमत्कार करे, अर जिस राह पै अर जिन जात्तां कै बीच म्ह तै हम चाल्‍ले आवां थे उन म्ह म्हारी हिफाजत करी; 18अर म्हारे स्याम्ही तै इस देश म्ह रहण आळी एमोरी अर सब जात्तां ताहीं लिकाड़ दिया सै; ज्यांतै हम भी यहोवा की सेवा करांगे, क्यूँके म्हारा उद्धार वोए सै।”

19यहोशू नै माणसां तै कह्या, “थारै तै यहोवा की सेवा न्ही हो सकदी; क्यूँके वो पवित्र परमेसवर सै; वो जलन राक्खण आळा परमेसवर सै; वो थारे अपराध अर पाप माफ न्ही करैगा। 20जै थम यहोवा नै त्याग कै पराए देवत्यां की सेवा करण लागोगे, तो जै वो थारा भला करदा आया सै तोभी वो मुड़कै थारी हानि करैगा अर थारा अन्त कर देगा।” 21माणसां नै यहोशू तै कह्या, “न्ही; हम यहोवा ए की सेवा करांगे।” 22यहोशू नै माणसां तै कह्या, “थम आप्पे अपणे गवाह हो के थमनै यहोवा की सेवा करणी चुणी सै।” उन ताहीं कह्या, “हाँ, हम गवाह सां।” 23यहोशू नै कह्या, “अपणे बीच म्ह तै पराए देवत्यां#24:23 पराए देवत्यां पराए देवत्यां की मूर्ति नै दूर फैक कै अपणा-अपणा मन इस्राएल के परमेसवर यहोवा की और लगाओ।” 24माणसां नै यहोशू तै कह्या, “हम तो अपणे परमेसवर यहोवा ए की सेवा करांगे, अर उस्से की बात मान्‍नागें।” 25फेर यहोशू नै उस्से दिन उन माणसां तै करार करवाया, अर शेकेम नगर म्ह उनकै खात्तर विधि अर नियम ठैहराया।

26यो सारा जिक्र यहोशू नै परमेसवर की नियम-कायदा की किताब म्ह लिख दिया; अर एक बड़ा पत्थर चुणकै ओड़ै उस बांज दरखत कै तळै खड्या करया, जो यहोवा की पवित्र जगहां म्ह था। 27फेर यहोशू नै सारे माणसां तै कह्या, “सुणो, यो पत्थर म्हारी गवाही का रहवैगा, क्यूँके जितने वचन यहोवा नै म्हारे तै कहे सैं उन ताहीं इसनै सुण्या सै; ज्यांतै यो थारा गवाह रहवैगा, इसा ना हो के थम अपणे परमेसवर तै मुकर जाओ।” 28फेर यहोशू नै माणसां ताहीं अपणी-अपणी दी गई जगहां पै जाण खात्तर विदा करया।

यहोशू अर एलीआजर का मरणा

29इन बात्तां कै बाद यहोवा का दास, नून का बेट्टा यहोशू, एक सौ दस साल का होकै मर ग्या। 30अर उस ताहीं तिम्नत्सेरह नगर म्ह, जो एप्रैम की पहाड़ी देश म्ह गाश नाम के पहाड़ के उत्तर म्ह सै, उसे के भाग म्ह माट्टी दी गई।

31अर यहोशू के जीवन भर, अर जो बुजुर्ग माणस यहोशू के मरण कै बाद जिन्दा रहे अर जाणै थे के यहोवा नै इस्राएल कै खात्तर किसे-किसे काम करे थे, उनके भी जिन्दे जी इस्राएली यहोवा ए की सेवा करते रहे।

32फेर यूसुफ की हड्डियाँ जिननै इस्राएली मिस्र देश तै ले आए थे वे शेकेम की धरती के उस हिस्से म्ह गाड़ी गई, जिस ताहीं याकूब नै शेकेम के पिता हमोर के बेट्टे तै एक सौ चाँदी के सिक्‍कयां म्ह मोल लिया था; ज्यांतै वो यूसुफ की औलाद का निज हिस्सा होग्या#24:32 होग्या उत्प. 33:18-20।

33अर हारुन का बेट्टा एलीआजर भी मर ग्या; अर उस ताहीं एप्रैम के पहाड़ी देश म्ह उस पहाड़ी पै माट्टी दी गई, जो उसके बेट्टे पीनहास के नाम पै गिबत्पीनहास सै अर उस ताहीं दे दी गई।

Currently Selected:

यहो. 24: BGC

Highlight

Copy

Compare