न्यायियों 1
1
इस्राएलियाँ की कनानियाँ पै जीत
1यहोशू के मरण कै बाद इस्राएलियाँ नै यहोवा तै पूच्छया, “कनानियाँ कै बिरुध्द लड़ण नै म्हारी और तै पैहल्या कौण सा गोत्र चढ़ाई करैगा?” 2यहोवा नै जवाब दिया, “यहूदा गोत्र चढ़ाई करैगा; सुणो, मन्नै इस देश ताहीं उनके हाथ म्ह दे दिया सै।” 3फेर यहूदा गोत्र के माणसां नै अपणे शिमोन गोत्र के भाईयाँ तै कह्या, “मेरै गैल मेरे हिस्से म्ह आ, के हम कनानियाँ तै लड़ां; अर मै भी तेरे हिस्से म्ह जाऊँगा।” आखर शिमोन गोत्र उसकै गैल चल्या। 4अर यहूदा गोत्र नै चढ़ाई करी, अर यहोवा नै कनानियाँ अर परिज्जियाँ ताहीं उसके हाथ म्ह कर दिया; फेर उननै बेजेक नगर म्ह उन म्ह तै दस हजार माणस मार गेरे। 5अर बेजेक नगर के राजा अदोनीबेजेक तै पाकै वे उसतै लड़े, अर कनानियाँ अर परिज्जियाँ ताहीं मार गेरया। 6पर अदोनीबेजेक भाज्या; फेर उननै उसका पिच्छा करकै उस ताहीं पकड़ लिया, अर उसके हाथ-पैर के अँगूठे काट दिये। 7फेर अदोनीबेजेक नै कह्या, “हाथ-पैर के अँगूठे काटे होए सत्तर राजा मेरी मेज कै तळै टुकड़े चुगै थे; जिसा मन्नै करया था, उसाए बदला परमेसवर नै मेरे ताहीं दिया सै।” फेर वे उस नै यरुशलेम म्ह लेगे अर ओड़ै वो मर ग्या। 8यहूदियाँ नै यरुशलेम तै लड़कै उस शहर ताहीं ले लिया, अर तलवार तै उसके रहण आळयां ताहीं मार गेरया, अर नगर नै फूँक दिया। 9अर फेर यहूदी पहाड़ी देश अर दक्षिण देश#1:9 नेगेब देश, अर नीच्चै के देश म्ह रहणआळे कनानियाँ तै लड़ण नै गए। 10अर यहूदा नै उन कनानियाँ पै चढ़ाई करी जो हेब्रोन शहर म्ह रहवैं थे (हेब्रोन का नाम तो पूर्वकाल म्ह किर्यतअर्बा था); अर उननै शेशै, अहीमन, अर तल्मै#1:10 शेशै, अहीमन, अर तल्मै गोत्र ताहीं मार गेरया। 11ओड़ै तै यहूदियाँ नै जाकै दबीर के निवासियां पै चढ़ाई करी। दबीर का नाम तो पूर्वकाल म्ह किर्यत्सेपेर था।
ओत्नीएल के जरिये दबीर पै जीत
12फेर कालेब नै अपणे सिपाहियाँ तै कह्या, “जो किर्यत्सेपेर नगर पै कब्जा कर ले ले उसतै मै अपणी बेट्टी अकसा का ब्याह कर दियुँगा।” 13इसपै कालेब के छोट्टे भाई कनजी ओत्नीएल नै उस ताहीं ले लिया; अर उसनै उसतै अपणी बेट्टी अकसा का ब्याह कर दिया। 14अर जिब वा ओत्नीएल के धोरै आई, फेर उसनै उस ताहीं अपणे पिता तै कुछ धरती माँगण ताहीं उभारया; फेर वा अपणे गधे पै तै उतरी, फेर कालेब नै उसतै पूछ्या, “तू के चाहवै सै?” 15उसनै जवाब दिया, “मन्नै आशीर्वाद दे; तन्नै मेरे ताहीं दक्षिण देश तो दिया सै वो सूखा देश सै, फेर पाणी के चोए भी दे।” इस तरियां कालेब नै उस ताहीं उप्पर अर नीच्चै के दोन्नु चोए दे दिए। 16मूसा के साले, एक केनी माणस की औलाद, यहूदी कै गैल खजूरआळे नगर#1:16 या नगर यरीहो के वर्णनात्मक नाम पर सै। या यरुशलेम के उत्तरी-पूर्वी इलाके म्ह सै अर यरदन घाटी म्ह यहूदियाँ पहाड़ी के पूर्व म्ह सै। तै यहूदा के जंगळ म्ह गए जो अराद के दक्षिण की और सै, अर जाकै इस्राएली माणसां कै गैल रहण लाग्गे। 17फेर यहूदा गोत्र नै अपणे भाई शिमोन गोत्र के गैल जाकै सपत नगर म्ह रहणआळे कनानियाँ ताहीं मार लिया, अर उस नगर का नाश कर दिया। ज्यांतै उस नगर का नाम होर्मा#1:17 होर्मा पूरी तरियां सर्वनाश पड़या। 18अर यहूदा गोत्र नै च्यांरु ओड़ की सारी धरती समेत गाज़ा, अश्कलोन, अर एक्रोन ताहीं ले लिया। 19यहोवा यहूदा गोत्र कै गैल रह्या, ज्यांतै उननै पहाड़ी देश के निवासियां ताहीं लिकाड़ दिया; पर तराई के निवासियां कै गैल लोहे के रथ थे, ज्यांतै वे उननै लिकाड़ न्ही सके। 20अर उननै मूसा के हुकम कै मुताबिक हेब्रोन शहर कालेब ताहीं दे दिया: अर कालेब नै ओड़ै तै अनाक के तीन्नु बेट्यां ताहीं लिकाड़ दिया। 21अर यरुशलेम म्ह रहणआळे यबूसियाँ ताहीं बिन्यामीनियाँ नै न्ही लिकाड़या; ज्यांतै यबूसी आज कै दिन ताहीं यरुशलेम म्ह बिन्यामीनियाँ कै गैल रहवैं सैं। 22फेर यूसुफ के कुण्बे नै बेतेल नगर पै चढ़ाई करी; अर यहोवा उनकै गैल था। 23अर यूसुफ के कुण्बे नै बेतेल का भेद लेण ताहीं माणस भेज्जे। अर उस नगर का नाम पूर्वकाल म्ह लूज था। 24अर भेदियाँ नै एक माणस ताहीं उस नगर तै लिकड़दे होए देख्या, अर उसतै कह्या, “नगर म्ह जाण का रास्ता मन्नै दिखा, अर हम तेरे पै दया करांगे।” 25जिब उसनै उन ताहीं नगर म्ह जाण का रास्ता दिखाया, तो उननै सारे नगर ताहीं तो तलवार तै मारया, पर उस माणस ताहीं सारे घराने समेत छोड़ दिया। 26उस माणस नै हित्तियाँ के देश म्ह जाकै एक नगर बसाया, अर उसका नाम लूज धरया; अर आज कै दिन ताहीं उसका नाम वोए सै। 27मनश्शे गोत्र नै अपणे-अपणे गाम्मां समेत बेतशान, तानाक, दोर, यिबलाम, अर मगिद्दो के गोत्र ताहीं न्ही लिकाड़या; इस तरियां कनानी उस देश म्ह बसे ए रहे। 28पर जिब इस्राएली ताकतवर होए, फेर उननै कनानियाँ तै गुलाम्मी करवाई, पर उन ताहीं पूरी रीति तै न्ही लिकाड़या।
29एप्रैम गोत्र नै गेजेर म्ह रहणआळे कनानियाँ ताहीं न्ही लिकाड़या; ज्यांतै कनानी गेजेर म्ह उनकै बीच म्ह बसे रहे।
30जबूलून गोत्र नै कित्रोन अर नहलोल के निवासियां ताहीं न्ही लिकाड़या; ज्यांतै कनानी उनकै बीच म्ह बसे रहे, अर उनके गुलाम होगे।
31आशेर गोत्र नै अक्को, सीदोन, अहलाब, अकजीब, हेलबा, अपीक, अर रहोब#1:31 अकजीब, हेलबा, अपीक, अर रहोब शहर के गोत्र के निवासियां ताहीं न्ही लिकाड़या था;
32ज्यांतै आशेरी माणस देश के निवासी कनानियाँ के बीच म्ह बसगे; क्यूँके उननै उन ताहीं न्ही लिकाड़या था।
33नप्ताली गोत्र नै बेतशेमेश अर बेतनात के निवासियां ताहीं न्ही लिकाड़या, पर देश के निवासी कनानियाँ कै बीच म्ह बसगे; फेर भी बेतशेमेश नगर अर बेतनात नगर के माणस उनके गुलाम होगे।
34एमोरियां नै दान गोत्र के लोगां ताहीं पहाड़ी देश म्ह भगा दिया, अर तराई म्ह आण न्ही दिया; 35ज्यांतै एमोरी हेरेस नाम के पहाड़, अय्यालोन शहर अर शाल्बीम शहर म्ह बसे ए रहे, फेर भी यूसुफ का घरान्नां उरै ताहीं हावी होग्या के वे उनके गुलाम होगे। 36अर एमोरियां के देश की सीमा अक्रब्बीम नाम के पर्वत की चढ़ाई तै शरु करकै सेला अर सेला के परै पहाड़ी परदेस तक थी।
Currently Selected:
न्यायियों 1: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
