एज्रा 9

यहूदा के पाप कै कारण एज्रा की प्रार्थना

1जिब ये काम हो चुके, फेर यहूदी हाकिम मेरै धोरै आकै कहण लाग्गे, “ना तो इस्राएली माणस, ना याजक, ना लेवीय इस और के देशां के माणसां तै न्यारे होए; बलके उनके जिसे, यानिके कनानियाँ, हित्तियाँ, परिज्जियाँ, यबूसियाँ, अम्मोनियाँ, मोआबियाँ, मिस्रियाँ अर एमोरियां के जिसे घिनोणे काम करैं सै। 2क्यूँके उननै उनकी बेट्टियाँ म्ह तै अपणे अर अपणे बेट्यां खात्तर जनान्‍नी कर ली सैं; अर पवित्र कुण्बा इस ओड़ के देशां के लोगां म्ह मिलग्या सै। बलके हाकिम अर सरदार इस पाप म्ह सब तै आग्गै पाए सैं।” 3या बात सुणकै मन्‍नै अपणे कपड़े अर बागै ताहीं पाड़या, अर अपणे सिर अर दाढ़ी के बाळ नोच्‍चे, अर दुखी होकै बैठ्या रहया#9:3 मत्ती. 26:65, अय्यूब 1:20। 4फेर जितने माणस इस्राएल के परमेसवर के वचन सुणकै गुलाम्मी तै आए होए माणसां के बिश्वासघात कै कारण थरथरावै थे, सारे मेरै गैल कठ्ठे होए, अर मै शाम की भेंट कै बखत ताहीं दुखी होकै बैठ्या रहया। 5पर शाम की भेंट कै बखत मै कपड़ा अर बागा पाड़े होए उपवास की हालत म्ह उठ्या, फेर घुटन्या के बल झुक्या, अर अपणे हाथ अपणे परमेसवर यहोवा की और फैला प्रार्थना करकै कह्या:

6हे मेरे परमेसवर! मन्‍नै तेरी और अपणा मुँह ठान्दे होए भी शर्म आवै सै, अर हे मेरे परमेसवर! मेरा मुँह काळा सै; क्यूँके म्हारे अधर्म के काम म्हारे सिर पै बढ़गे सैं, अर म्हारा दोष बढ़दे-बढ़दे अकास तक पोहच्या सै#9:6 दानिय्येल 9:7-8। 7अपणे पुरखां के दिनां तै लेकै आज कै दिन ताहीं हम बड़े दोषी सां, अर अपणे अधर्म के काम्मां के कारण हम अपणे राजयां अर याजकां समेत देश-देश के राजयां के हाथ म्ह करे गए ताके तलवार, गुलाम्मी, लूटे जाण, अर मुँह काळा हो जाण की बिप्दा म्ह पड़े, जिसी के आज म्हारी हालत सै। 8इब थोड़े दिन तै म्हारे परमेसवर यहोवा का अनुग्रह म्हारे पै होया सै, के म्हारे म्ह तै कोए तो बच लिकड़ै, अर हमनै उसकी पवित्र जगहां म्ह एक खूँटी मिलै, अर म्हारा परमेसवर म्हारी आँखां म्ह चमक आण दे, अर गुलाम्मी म्ह हमनै किमे आरम अर शान्ति मिलै। 9हम फारसी देश म्ह गुलाम तो सां ए, पर म्हारी गुलाम्मी म्ह म्हारे परमेसवर नै म्हारे ताहीं न्ही छोड़ दिया, बलके फारस के राजयां नै म्हारे पै इसी कृपा करी, के हम नया जीवन पाकै अपणे परमेसवर के भवन नै उठाण, अर इसके खण्डहरां नै सुधारण पावां, अर हमनै यहूदा अर यरुशलेम म्ह शरण मिली।

10“इब हे म्हारे परमेसवर, इसकै बाद हम के कहवां, योए के हमनै तेरे उन हुकमां ताहीं तोड़ दिया सै#9:10 दानिय्येल 9:5, 10-11, 11जो तन्‍नै यो कहकै अपणे दास नबिया के जरिये दिये, ‘जिस देश के अधिकारी होण नै थम जाण पै हो, वो तो देश-देश के माणसां की अशुद्धता के कारण अर उनके घिनोणे काम्मां के कारण अशुद्ध देश सै, उननै उसतै एक हद तै दुसरी हद ताहीं अपणी अशुद्धता तै भर दिया सै। 12इस करकै इब तू ना तो अपणी बेट्टियाँ नै उनके बेट्यां तै ब्याहईये अर ना उनकी बेट्टियाँ तै अपणे बेट्यां का ब्याह करिये, अर ना कदे उनका हाल-चाल पूछिये, ज्यांतै के थम बलवान बणो अर उस देश के आच्छे-आच्छे पदार्थ खाण पाओ, अर उसनै इसा छोड़ जाओ, के वो थारे वंश के हक म्ह सदा बण्या रहवै#9:12 व्यवस्था 7.3।’ 13अर उस सब कै बाद जो म्हारे बुरे काम्मां अर बड़े दोष के कारण म्हारे पै बीत्या सै, जबकि हे म्हारे परमेसवर तन्‍नै म्हारे अधर्म कै बराबर म्हारे तै सजा न्ही दी, बलके म्हारे म्ह तै कितन्याँ ताहीं बचाए राख्या सै, 14तो के हम तेरे हुकमां नै फेर तै उलंघण करकै इन घिनोणे काम करण आळे माणसां तै समधियाना का सम्बन्ध करां? के तू म्हारे पै छो न्ही करैगा जिसतै हम मिट जावां अर ना तो कोए बचै अर ना कोए रह जावै? 15हे इस्राएल के परमेसवर यहोवा! तू धर्मी सै, हम बचकै मुक्त होए सां जिसा के आज वर्तमान सै। देख, हम तेरै स्याम्ही दोषी सां, इस करकै कोए तेरै स्याम्ही खड़या न्ही रह सकदा।”

Currently Selected:

एज्रा 9: BGC

Highlight

Copy

Compare