2 शमूएल 3
3
1शाऊल के कुण्बे अर दाऊद के कुण्बे कै बीच घणे दिनां तक लड़ाई होन्दी रही; पर दाऊद हावी होन्दा गया, अर शाऊल का घराना कमजोर पड़दा गया।
दाऊद के बाळक
2अर हेब्रोन म्ह दाऊद कै बेट्टे पैदा होए; उसका जेठ्ठा बेट्टा अम्नोन था, जो यिज्रेली अहीनोअम तै पैदा होया था; 3अर उसका दूसरा किलाब था, जिसकी माँ कर्मेली नाबाल की जनान्नी अबीगैल थी; तीसरा अबशालोम, जो गशूर के राजा तल्मै की बेट्टी माका तै पैदा होया था;#3:3 गशूर गलील की झील कै उत्तरी-पूर्वी इलाके की छोट्टे अरामी राज्य म्ह मौजूद सै। जो माणस गशूर म्ह रहवै थे वो 1 शमूएल 27:8 म्ह बताए गए गशूरियाँ के जिस्से न्ही सै। 4चौथा अदोनिय्याह, जो हग्गीत तै पैदा होया था; पाँचवाँ शपत्याह, जिसकी माँ अबीतल थी; 5छठवाँ यित्राम, जो एग्ला नाम दाऊद की घरआळी तै पैदा होया। हेब्रोन म्ह दाऊद कै येए बाळक पैदा होए।
अब्नेर का दाऊद के पक्ष म्ह आणा
6जिब शाऊल अर दाऊद दोनुआं के कुणब्यां कै बीच म्ह लड़ाई होरी थी, तो अब्नेर शाऊल के कुण्बे की मदद म्ह हिम्मत बढ़ान्दा गया। 7एक दिन शाऊल की एक रखैल थी जिसका नाम रिस्पा था, वा अय्या की बेट्टी थी; अर ईशबोशेत नै अब्नेर तै दोष लगांदे होए पूच्छया, “तू मेरे बाप की रखैल कै धोरै क्यूँ गया?” 8ईशबोशेत की बात्तां कै कारण अब्नेर घणा छो म्ह होकै कहण लाग्या, “के मै यहूदा के कुत्ते का सिर सूं? आज तक मै तेरे बाप शाऊल के कुण्बे अर उसके भाईयाँ अर साथियाँ ताहीं प्यार दिखान्दा आया सूं, अर तेरे ताहीं दाऊद के हाथ पड़ण न्ही दिया; फेर तू इब मेरे ताहीं उस जनान्नी के बारै म्ह दोष लगावै सै? 9जै मै दाऊद कै गैल परमेसवर की कसम कै मुताबिक बरताव ना करुँ, तो परमेसवर अब्नेर तै उसाए, बल्के उसतै भी घणा करै; 10यानिके मै राज्य नै शाऊल के कुण्बे तै छीनूँगा, अर दाऊद की राजगद्दी दान तै लेकै बेर्शेबा तक इस्राएल अर यहूदा के उप्पर मजबूत करुँगा।” 11अर वो अब्नेर नै कोए जवाब न्ही दे सक्या, क्यूँके वो उसतै डरया करदा।
12फेर अब्नेर नै दाऊद कै धोरै दूत्तां तै कुह्वा भेज्जा, “देश किसका सै?” अर यो भी कुह्वा भेज्जा, “तू मेरे गैल करार कर, अर मै तेरी मदद करुँगा के सारे इस्राएल का मन तेरी और फेर देऊँ।” 13दाऊद नै कह्या, “ठीक सै, मै तेरे गैल करार तो करुँगा पर एक बात मै तेरे तै चाहूँ सूं; के जिब तू मेरे तै मुलाकात करण आवै, तो जै तू पैहले शाऊल की बेट्टी जो मेरी पत्नी मीकल नै ना ले आवै, तो मेरे तै मुलाकात न्ही होगी।” 14फेर दाऊद नै शाऊल के बेट्टे ईशबोशेत कै धोरै दूत्तां तै यो कुह्वा भेज्या, “मेरी जनान्नी मीकल, जिसतै मन्नै एक सौ पलिश्तियाँ की खलड़ियाँ देकै अपणी कर लिया था, उसनै मेरे ताहीं दे दे।” 15फेर ईशबोशेत नै माणसां ताहीं भेजकै उसनै लैश के बेट्टे पलतीएल कै धोरै तै खोस लिया। 16अर उसका धणी उसकै गैल चल्या, अर बहूरीम नगर ताहीं उसकै पाच्छै रोन्दा होया चल्या गया। फेर अब्नेर नै उसतै कह्या, “बोहड़ ज्या;” अर वो बोहड़ ग्या।
17फेर अब्नेर नै इस्राएल के अगुवां कै गैल इस तरियां की बातचीत करी, “पैहले तो थम माणस चाहों थे के दाऊद थारे उप्पर राजा हो। 18इब उसाए करो; क्यूँके यहोवा नै दाऊद कै बारै म्ह यो कह्या सै, ‘अपणे दास दाऊद के जरिये मै अपणी प्रजा इस्राएल नै पलिश्तियाँ, बल्के उनके सारे दुश्मनां के हाथ तै छुड़ाऊँगा।’” 19अब्नेर नै बिन्यामीन तै भी बात करी; फेर अब्नेर हेब्रोन म्ह चल्या गया, ताके इस्राएल अर बिन्यामीन गोत्र के सारे घराने ताहीं जो कुछ आच्छा लाग्या, वो दाऊद नै सुणावै।
20फेर अब्नेर बीस सिपाहियाँ गैल लेकै हेब्रोन म्ह आया, अर दाऊद नै उसके अर उसके संगी माणसां कै खात्तर भोज करया। 21फेर अब्नेर नै दाऊद तै कह्या, “मै उठकै जाऊँगा, अर अपणे प्रभु राजा कै धोरै सारे इस्राएल नै कठ्ठा करुँगा, ताके वे तेरे गैल करार करै, अर तू अपणी इच्छा कै मुताबिक राज्य कर सकै।” फेर दाऊद नै अब्नेर ताहीं विदा करया, अर वो बेफिकर होकै चल्या गया।
अब्नेर की हत्या
22फेर दाऊद के कई सिपाही अर योआब समेत दुश्मनां के कुछ इलाके पै चढ़ाई करकै भोत सी लूट लिये होए आ गये। अब्नेर दाऊद कै धोरै हेब्रोन म्ह न्ही था, क्यूँके उसनै उस ताहीं विदा कर दिया था, अर वो सही-सलामत चल्या गया था। 23जिब योआब अर उसके साथ की सारी सेना आई, फेर माणसां नै योआब तै बताया, “नेर का बेट्टा अब्नेर राजा के धोरै आया था, अर उसनै उस ताहीं विदा कर दिया, अर वो सही-सलामत चल्या गया।” 24फेर योआब नै राजा के धोरै जाकै कह्या, “तन्नै यो के करया सै? अब्नेर जो तेरे धोरै आया था, तो के कारण सै के फेर तन्नै उस ताहीं जाण दिया, अर वो चल्या गया सै? 25तू नेर के बेट्टे अब्नेर नै जाणदा होवैगा के वो तन्नै धोक्खा देण, अर तेरे आण-जाण, अर सारे काम का भेद लेण आया था।”
26योआब नै दाऊद कै धोरै तै लिकड़कै अब्नेर कै पाच्छै दूत भेज्जे, अर वे उसनै सीरा नाम के कुण्ड तै बोहड़ा ले आए। पर दाऊद नै इस बात का बेरा ना था। 27जिब अब्नेर हेब्रोन नै बोहड़ आया, फेर योआब उसतै एक्ले म्ह बात करण कै खात्तर उस नै फाटक कै भित्तर न्यारा लेग्या, अर ओड़ै अपणे भाई असाहेल के खून कै बदलै म्ह उसके पेट म्ह इसा वार करया के वो मर ग्या। 28बाद म्ह जिब दाऊद नै यो सुण्या, अर घोषणा करी, “नेर के बेट्टे अब्नेर के खून कै बारै म्ह मै अपणी प्रजा समेत यहोवा की नजर म्ह सदा बेकसूर रहूँगा। 29वो योआब अर उसके बाप के सारे कुण्बे नै लाग्गै; अर योआब के बाळकां म्ह कोए ना कोए प्रमेह का रोगी, अर कोढ़ी, अर लंगड़ा, अर तलवार तै घात करया जाण आळा, अर भूक्खा मरण आळा सदा होन्दा रहवै।” 30योआब अर उसके भाई अबीशै नै अब्नेर ताहीं इस कारण घात करया, के उसनै उनके भाई असाहेल ताहीं गिबोन म्ह लड़ाई कै बखत मार गेरया था।
दाऊद का अब्नेर के खात्तर बिलाप
31फेर दाऊद नै योआब अर अपणे सारे संगी माणसां तै कह्या, “अपणे कपड़े पाड़ो, अर कमर म्ह टाट बाँधकै अब्नेर कै आग्गै-आग्गै चाल्लों।” अर दाऊद राजा खुद अर्थी के पाच्छै-पाच्छै चल्या। 32अब्नेर ताहीं हेब्रोन म्ह माट्टी दी गई; अर राजा दाऊद अब्नेर की कब्र कै धोरै फूट-फूटकै रोया; अर सारे माणस भी रोए। 33फेर दाऊद नै अब्नेर के बारै यो विलापगीत बणाया,
“के आच्छा था के अब्नेर मूर्ख कै बराबर मरै?
34ना तो तेरे हाथ बाँधे गए, अर ना तेरे पाँयां म्ह बेड़ियाँ डाली गई;
जिस तरियां के कोए कसूरवार माणसां तै मारया जावै,
उस्से तरियां तू मारया गया।” फेर सारे माणस उसकै बारै म्ह फेर रो उठे।
35फेर सारे माणस कुछ दिन बित्तण पै दाऊद नै रोट्टी खिलाण आए; पर दाऊद नै शपथ खाकै कह्या, “जै मै सूरज के अस्त होण तै पैहले रोट्टी या और किमे चीज खाऊँ, तो परमेसवर मेरे तै इसाए, बल्के इसतै भी घणा करै।” 36सारे माणसां नै इसपै विचार करया अर इसतै खुश होए, वैसे भी जो कुछ राजा करया करदा उसतै सारे माणस खुश होया करदे। 37आखर उन सारे माणसां नै, बल्के सारे इस्राएल नै भी, उसे दिन जाण लिया के नेर के बेट्टे अब्नेर का घात करया जाणा राजा की और तै न्ही था। 38राजा नै अपणे कर्मचारियाँ तै कह्या, “के थम न्ही जाण्दे के इस्राएल म्ह आज कै दिन एक प्रधान अर प्रतापी माणस मरया सै? 39अर जै मै अभिषिक्त राजा सूं तोभी आज कमजोर सूं; अर वे सरूयाह जनान्नी के बेट्टे मेरे तै घणे तेज सैं। पर यहोवा बुराई करणीये नै उसकी बुराई के मुताबिक ए बदला दे।”#3:39 भजन संहिता 28:4
Currently Selected:
2 शमूएल 3: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
