2 राजाओं 23
23
योशिय्याह का मूर्तिपूजा बन्द कराणा
1राजा नै यहूदा अर यरुशलेम के सारे पुरनियां ताहीं अपणे धोरै बुलाकै कठ्ठा करया। 2फेर राजा, यहूदा के सारे माणसां अर यरुशलेम के सब निवासियां अर याजकां अर नबियाँ बलके छोट्टे-बड़े सारी प्रजा के माणसां नै गैल लेकै यहोवा के भवन म्ह गया। उसनै जो करार की किताब यहोवा के भवन म्ह मिली थी, उसकी सारी बात उन ताहीं पढ़कै सुणाई। 3फेर राजा नै खम्भे कै धोरै खड़या होकै यहोवा तै इस आशा का करार करया#23:3 करार करया योशिय्याह के जरिये होरेब पर्वत पै परमेसवर अर इस्राएलियाँ के बीच करया गया करार (व्य 5:2) ताहीं नया रूप दिया, करार का नया हो जाणा किसे के व्यक्तिगत कार्य तैए सम्भव था।, के मै यहोवा कै पाच्छै-पाच्छै चाल्लूँगा, अर अपणे सारे मन अर सारे प्राण तै उसके हुकमां, चितौनियाँ अर विधियाँ का रोज पाळण करया करुँगा, अर इस करार की बात्तां नै जो इस किताब म्ह लिक्खी सैं पूरी करुँगा; अर सारी प्रजा करार म्ह सहमत होई।
4फेर राजा नै हिल्किय्याह महायाजक अर उसकै नीच्चै के याजकां अर द्वारपालां ताहीं हुकम दिया के जितने बरतन बाल अर अशेरा अर अकास के सारे गणां कै खात्तर बणे सैं, उन सारया नै यहोवा कै मन्दर म्ह तै लिकाड़ ल्याओ। फेर उसनै उन ताहीं यरुशलेम के बाहर किद्रोन के मैदानां म्ह फूँक कै उनकी राख बेतेल ताहीं पोहच्या दी। 5जिन पुजारियाँ ताहीं यहूदा के राजयां नै यहूदा के नगरां की ऊँच्ची जगहां म्ह अर यरुशलेम कै लोवै-धोरै के स्थानां म्ह धूप जळाण कै खात्तर ठैहराया था, उन ताहीं अर जो बाल अर सूरज चाँद, राशिचक्र अर अकास के सारे गणां ताहीं धूप जळावै थे, उन ताहीं भी राजा नै हटा दिया। 6वो अशेरा नै यहोवा के भवन म्ह तै लिकाड़कै यरुशलेम के बाहर किद्रोन नाळे म्ह लेग्या अर ओड़ैए उस ताहीं फूँक दिया, अर पिस कै राख कर दिया। फेर वो राख साधारण माणसां की कब्रां पै फेंक दी। 7फेर पुरुषगामियां के घर जो यहोवा कै भवन म्ह थे, जित्त जनान्नी अशेरा कै खात्तर पर्दे बुण्या करै थी#23:7 पर्दे बुण्या करै थी अश्तोरेत की उपासना म्ह पुरोहितानियाँ थी जो घनिष्ठता म्ह आशेर से जुड़ी थी।, उन ताहीं उसनै गेर दिया। 8उसनै यहूदा के सारे नगरां तै याजकां ताहीं बुलवाकै गेबा तै बेर्शेबा तक की उन ऊँच्ची जगहां ताहीं, जित्त उन याजकां नै धूप जळाया था, अशुद्ध कर दिया; अर फाटकां की ऊँच्ची जगहां यानिके जो जगहां नगर के यहोशू नाम के हाकिम के फाटक पै थी, अर नगर के फाटक कै भित्तर जाण आळे फाटक कै बाई ओड़ थी, उन ताहीं उसनै गेर दिया। 9फेर भी ऊँच्ची जगहां के याजक यरुशलेम म्ह यहोवा की वेदी कै धोरै ना आए, वे अखमीरी रोट्टी अपणे भाईयाँ के गैल खावैं थे। 10फेर उसनै तोपेत जो हिन्नोमवंशियाँ की तराई म्ह था, अशुद्ध कर दिया, ताके कोए अपणे बेट्टे या बेट्टी नै मोलेक देवता#23:10 अम्मोनियाँ का देवता कै खात्तर आग म्ह होम करकै ना चढ़ावै। 11जो घोड़े यहूदा के राजयां नै सूरज ताहीं अर्पण करकै, यहोवा के भवन के द्वार पै नतन्मेलेक नाम के खोजे की बाहर की कोठड़ी म्ह राक्खे थे, उन ताहीं उसनै दूर करया, अर सूरज के रथां ताहीं आग म्ह फूँक दिया। 12आहाज की अटारी की छात पै जो वेदी यहूदा के राजयां की बणाई होई थी, अर जो वेदियाँ मनश्शे नै यहोवा के भवन के दोन्नु आँगणां म्ह बणाई थी, उन ताहीं राजा नै गेर कै पिस दिया अर उनकी राख किद्रोन नाळे म्ह फेंक दी। 13जो ऊँच्ची जगहां इस्राएल के राजा सुलैमान नै यरुशलेम के पूर्व की और अर विकारी नाम की पहाड़ी के दक्षिण और, अश्तोरेत नाम की सीदोनियां की घिनोणी देवी, अर कमोश नाम के मोआबियाँ के घिनोणे देवता, अर मिल्कोम नाम के अम्मोनियाँ के घिनोणे देवता कै खात्तर बणवाई थी, उन ताहीं राजा नै अशुद्ध कर दिया। 14उसनै लाठां ताहीं तोड़ दिया अर अशेरा ताहीं काट गेरया, अर उनकी जगहां माणसां की हड्डियाँ तै भर दी।
15फेर बेतेल म्ह जो वेदी थी, अर जो ऊँच्चा स्थान नबात के बेट्टे यारोबाम नै बणाया था, जिसनै इस्राएल तै पाप कराया था, उस वेदी अर उस ऊँच्ची जगहां ताहीं उसनै गेर दिया, अर ऊँच्ची जगहां ताहीं फूँक कै राख कर दिया अर अशेरा ताहीं फूँक दिया। 16फेर योशिय्याह नै मुड़कै ओड़ै के पहाड़ की कब्रां ताहीं देख्या, अर माणसां नै भेजकै उन कब्रां तै हाड्डी लिकड़वा कै दी अर वेदी पै जळवा कै उस ताहीं अशुद्ध करया। यो यहोवा के उस वचन कै मुताबिक होया, जो परमेसवर के उस भगत नै पुकार कै कह्या था जिसनै इन बात्तां की चर्चा करी थी। 17फेर उसनै पूच्छया, “जो खम्बा मन्नै दिखाई पड़या सै, वो के सै?” फेर नगर के माणसां नै उसतै कह्या, “वो परमेसवर के उस भगतजन की कब्र सै, जिसनै यहूदा तै आकै इसे काम की चर्चा पुकार कै करी थी, जो तन्नै बेतेल की वेदी तै करया सै।” 18फेर उसनै कह्या, “उसनै छोड़ द्यो; उसकी हाड्डियाँ नै कोए न्ही हटावै।” फेर उननै उसकी हाड्डी उस नबी की हड्डियाँ कै गैल जो सामरिया तै आया था, रहण दी। 19फेर ऊँच्ची जगहां के जितने भवन सामरिया के नगरां म्ह थे, जिन ताहीं इस्राएल के राजयां नै बणाकै यहोवा तै छो दिलाया था, उन सारया ताहीं योशिय्याह नै गेर दिया; अर जिसा उसनै बेतेल म्ह करया था, उसाए उनतै भी करया। 20उन ऊँच्ची जगहां के जितने याजक ओड़ै थे उन सारया ताहीं उसनै उन वेदियाँ पै बलि करया अर उनपै माणसां की हड्डियाँ ताहीं जळाकै यरुशलेम नै बोहड़ ग्या।
योशिय्याह का उत्तम चरित्र
21राजा नै सारी प्रजा के माणसां तै हुकम दिया, “इस करार की किताब म्ह जो कुछ लिख्या सै, उसके मुताबिक अपणे परमेसवर यहोवा कै खात्तर फसह का त्यौहार मान्नो।” 22जरुर इसा फसह ना तो न्यायियाँ के दिनां म्ह मान्या गया था जो इस्राएल का न्याय करैं थे, अर ना इस्राएल या यहूदा के राजयां के दिनां म्ह मान्या गया था। 23राजा योशिय्याह के राज्य के अठारहवें साल म्ह यहोवा कै खात्तर यरुशलेम म्ह यो फसह मान्या गया। 24फेर ओझे, भूत-सिद्धिआळे, गृहदेवता, मूरत अर जितनी घिनोणी चीज यहूदा देश अर यरुशलेम म्ह जित्त किते दिखाई पड़ी, उन सारया ताहीं योशिय्याह नै इस इरादे तै नाश करया, के नियम-कायदा की जो बात उस किताब म्ह लिक्खी थी जो हिल्किय्याह याजक नै यहोवा के भवन म्ह मिली थी, उन ताहीं वो पूरी करै। 25उसकै जिसा ना तो उसतै पैहले कोए राजा होया अर ना उसकै बाद इसा कोए राजा उठ्या, जो मूसा की पूरी व्यवस्था कै मुताबिक अपणे पूरे मन अर पूरे प्राण अर पूरी शक्ति तै यहोवा की और फिरया हो।
26फेर भी यहोवा का भड़क्या होया बड़ा कोप शान्त ना होया, जो इस कारण तै यहूदा पै भड़क्या था, के मनश्शे नै यहोवा तै छो पै छो दुवाया था। 27यहोवा नै कह्या था, “जिसा मन्नै इस्राएल ताहीं अपणे स्याम्ही तै दूर करया, उसे तरियां यहूदा नै भी दूर करुँगा; अर इस यरुशलेम नगर, जिस ताहीं मन्नै चुण्या अर इस भवन जिसकै बारै म्ह मन्नै कह्या, के यो मेरे नाम का निवास होवैगा, कै खिलाफ मै हाथ उठाऊँगा।” 28योशिय्याह के और सारे काम जो उसनै करे, वो के यहूदा के राजयां कै इतिहास की किताब म्ह न्ही लिक्खे सैं? 29उसके दिनां म्ह फिरौन-नको नाम का मिस्र का राजा अश्शूर के राजा की मदद करण फरात महानद ताहीं गया तो योशिय्याह राजा भी उसका सामना करण नै गया, अर फ़िरौन-नको नै उस ताहीं देखदे मगिद्दो नगर म्ह मार गेरया। 30फेर उसके कर्मचारियाँ नै उसकी लाश एक रथ पै धरकै मगिद्दो तै ले जाकै यरुशलेम ताहीं पोहचाया अर उसकी निज कब्र म्ह धर दिया। फेर साधारण माणसां नै योशिय्याह के बेट्टे यहोआहाज ताहीं लेकै उसका अभिषेक करकै, उसके पिता की जगहां पै राजा नियुक्त करया।
यहोआहाज का राज
31जिब यहोआहाज राज करण लाग्या, तब वो तेईस साल का था, अर तीन महिन्ने ताहीं यरुशलेम म्ह राज करदा रहया; उसकी माँ का नाम हमूतल था, जो लिब्नावासी यिर्मयाह की बेट्टी थी। 32उसनै ठीक अपणे पुरखां कै बराबर वोए करया, जो यहोवा की नजर म्ह बुरा सै। 33उस ताहीं फिरौन-नको नै हमात देश के रिबला नगर म्ह बन्दी बणा लिया, ताके वो यरुशलेम म्ह राज ना करण पावै, फेर उसनै देश पै सौ किक्कार चाँदी#23:33 लगभग 3.4 टन चाँदी अर किक्कार भर सोन्ना#23:33 34 किलोग्राम सोन्ना जुर्माना करया। 34फेर फिरौन-नको नै योशिय्याह के बेट्टे एलयाकीम ताहीं उसके पिता योशिय्याह की जगहां पै राजा नियुक्त करया, अर उसका नाम बदलकै यहोयाकीम धरया; पर यहोआहाज नै वो लेग्या। अर यहोआहाज मिस्र म्ह जाकै ओड़ैए मर ग्या। 35यहोयाकीम नै फिरौन ताहीं वो चाँदी अर सोन्ना तो दिया पर देश पै ज्यांतै कर लगाया के फिरौन के हुकम कै मुताबिक उसनै दे सकै, यानिके देश के सारे माणसां तै जितना जिसपै लगाण लाग्या, उतणी चाँदी अर सोन्ना उसनै फ़िरौन-नको तै देण खात्तर ले लिया।
यहोयाकीम का राज
36जिब यहोयाकीम राज करण लाग्या, तब वो पच्चीस साल का था, अर ग्यारह साल तक यरुशलेम म्ह राज करदा रहया; उसकी माँ का नाम जबीदा था जो रूमावासी पदायाह की बेट्टी थी। 37उसनै ठीक अपणे पुरखां कै बराबर वो करया जो यहोवा की नजर म्ह बुरा सै।
Currently Selected:
2 राजाओं 23: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
