1 राजाओं 5
5
परमेसवर का भवन बणाण की त्यारी
1सोर नगर के राजा हीराम नै अपणे दूत सुलैमान कै धोरै भेज्जे, क्यूँके उसनै सुण्या था, के वो राजा की जगहां पै अभिषिक्त होकै अपणे पिता की जगहां पै राजा होया सै: अर दाऊद के जीवन भर हीराम उसका दोस्त बण्या रह्या। 2सुलैमान नै हीराम कै धोरै या खबर भेज्जी, 3“तन्नै बेरा सै, के मेरा पिता दाऊद अपणे परमेसवर यहोवा के नाम का एक भवन इस करकै न्ही बणवा सक्या के वो च्यांरु और लड़ाईयाँ म्ह तब ताहीं उळझया रह्या, जिब ताहीं यहोवा नै उसके दुश्मनां ताहीं उसके पैर तळै न्ही कर दिया। 4पर इब मेरे परमेसवर यहोवा नै मेरै ताहीं च्यांरु ओड़ तै विश्राम दिया सै अर ना तो कोए बिरोधी सै, अर ना कोए विपत्ति दिक्खै सै। 5मन्नै अपणे परमेसवर यहोवा के नाम का एक भवन बणवाण की ठाण राक्खी सै यानिके उस बात कै मुताबिक जो यहोवा नै मेरे पिता दाऊद तै कही थी, ‘तेरा बेट्टा जिसनै मै तेरी जगहां गद्दी पै बिठाऊँगा, वो मेरे आदर खात्तर मेरे नाम का भवन बणवावैगा।’ 6इस करकै इब तू मेरै खात्तर लबानोन पै तै देवदार काटण का हुकम दे, अर मेरे दास तेरे दास्सां कै गैल रहवैगें, अर जो किमे मजदूरी तू ठहरावै, वोए मै तन्नै तेरे दास्सां कै खात्तर दियुँगा, तन्नै बेरा तो सै, के सीदोनियां के बराबर लाकड़ी काट्टण का भेद हम माणसां म्ह तै कोए भी न्ही जाणदा।”
7सुलैमान की या बात सुणकै, हीराम घणा आनन्दित होया, अर कह्या, “आज यहोवा धन्य सै, जिसनै दाऊद ताहीं उस बड़ी राष्ट्र पै राज करण खात्तर एक बुद्धिमान बेट्टा दिया सै।” 8फेर हीराम नै सुलैमान कै धोरै या खबर भेज्जी, “जो तन्नै मेरै धोरै खबर भेज्जी सै वा मन्नै मिल गई सै देवदार अर सनोवर की लाकड़ी कै बारै म्ह जो कुछ तू चावै, वोए मै करुँगा। 9मेरे दास लाकड़ी नै लबानोन तै समुन्दर तक पोहचावैंगे, फेर मै उनके बेंड़े बणवाकै, जो जगहां तू मेरै खात्तर ठहरावै, ओड़ैए समुन्दर के राह तै उन ताहीं पोंहचवा दियुँगा: ओड़ै मै उननै खोलकै गिरवा दियुँगा, अर तू उननै ले लिये: अर तू मेरे सेवकां खात्तर भोजन देकै, मेरी भी इच्छा पूरी करिये।” 10फेर हीराम सुलैमान की इच्छा कै मुताबिक उसनै देवदार अर सनोवर की लाकड़ी देण लाग्या। 11अर सुलैमान नै हीराम के परिवार के खाण कै खात्तर उस ताहीं बीस हजार कोर#5:11 बीस हजार कोर दो हजार टन या 200,000 किलोग्राम कणक गेहूँ अर बीस कोर#5:11 बीस कोर चार लाख लीटर पेरा होया तेल दिया; इस तरियां सुलैमान हीराम ताहीं हर साल दिया करै था।#5:11 प्रेरितों के काम 12:20 12यहोवा नै सुलैमान तै अपणे वचन कै मुताबिक बुद्धि दी, अर हीराम अर सुलैमान कै बीच मेल बण्या रह्या यानिके उन दोनुआ नै आप्पस म्ह करार भी कर लिया।
13राजा सुलैमान नै पूरे इस्राएल म्ह तै तीस हजार माणस मजदूर लगाऐ, 14अर उननै लबानोन पहाड़ पै बारी-बारी करकै, महीन्ने-महीन्ने दस हजार भेज दिया करै था अर एक महिन्ना वे लबानोन पै, अर दो महिन्ने घर पै रह्या करैं थे; अर मजदूरां कै उप्पर अदोनीराम ठहराया गया। 15सुलैमान के सत्तर हजार बोझ ढोणआळे अर पहाड़ पै अस्सी हजार पेड़ काट्टण आळे अर पत्थर नै काटण आळे थे। 16इननै छोड़ सुलैमान के तीन हजार तीन सौ मुखिया थे, जो काम करण आळयां के उप्पर थे। 17फेर राजा के हुकम तै बड़े-बड़े अनमोल पत्थर ज्यांतै खोदकै लिकाड़े गए के भवन की नींव, गढ़े होए पत्थरां तै पाई जावै। 18सुलैमान के कारीगरां अर हीराम के कारीगरां अर गबालियां नै उन ताहीं गाढया, अर भवन के बणाण कै खात्तर लाकड़ी अर पत्थर त्यार करे।
Currently Selected:
1 राजाओं 5: BGC
Highlight
Copy
Compare
Share
Want to have your highlights saved across all your devices? Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.
