1 राजाओं 13

परमेसवर के दास का सन्देस

1फेर एक दिन यहोवा तै वचन पाकै परमेसवर का एक जन यहूदा तै बेतेल म्ह आया, अर यारोबाम धूप जळाण कै खात्तर वेदी कै धोरै खड्या था। 2उस जन नै यहोवा तै वचन पाकै वेदी कै खिलाफ यो पुकारया, “वेदी, हे वेदी! यहोवा न्यू कहवै सै, के सुण, दाऊद के कुल म्ह योशिय्याह#13:2 या भविष्यवाणी 2 राजाओं 23:15-16 म्ह पाया जावै सै नाम का एक छोरा पैदा होवैगा, वो उन ऊँच्‍चे स्थानां के याजकां नै जो तेरे पै धूप जळावैं सैं, तेरे पै बलि कर देगा; अर तेरे पै माणसां की हाड्डी जळाई जावैंगी।” 3अर उसनै, उसे दिन यो कहकै उस बात का एक निशान भी बताया, “यो वचन जो यहोवा नै कह्या सै, इसका निशान यो सै के या वेदी पाट ज्यागी, अर इसपै की राख गिर ज्यागी।” 4फेर इसा होया के परमेसवर के जन का यो वचन सुणकै जो उसनै बेतेल की वेदी कै खिलाफ पुकारकै कह्या, यारोबाम नै वेदी कै धोरै तै हाथ बढ़ाकै कह्या, “उसनै पकड़ ल्यो!” फेर उसका हाथ जो उसकी और बढ़ाया गया था, सूख ग्या अर वो उसनै अपणी और खींच न्ही सक्या। 5अर वेदी पाटगी, अर उसपै की राख गिरगी; आखर वो चिन्ह पूरा होया, जो परमेसवर के जन नै यहोवा तै वचन पाकै कह्या था। 6फेर राजा नै परमेसवर के जन तै कह्या, “अपणे परमेसवर यहोवा नै मना अर मेरै खात्तर प्रार्थना कर, के मेरा हाथ ज्यों का त्यों हो जावै!” फेर परमेसवर के जन नै यहोवा ताहीं मनाया अर राजा का हाथ फेर ज्यों का त्यों होग्या। 7फेर राजा नै परमेसवर के जन तै कह्या, “मेरै गैल घर चालकै अपणा जी ठण्डा कर, अर मै तन्‍नै दान भी दियुँगा।” 8परमेसवर के जन नै राजा तै कह्या, “चाए तू मन्‍नै अपणा आध्धा राज पाठ भी दे, फेर भी मै तेरै घर न्ही चाल्‍लूँगा अर इस जगहां म्ह मै ना तो रोट्टी खाऊँगा अर ना पाणी पिऊँगा। 9क्यूँके यहोवा के वचन के जरिये मन्‍नै यो हुकम मिल्या सै, के ना तो रोट्टी खाइये, अर ना पाणी पिये, अर ना उस राह तै बोहडिये जिसतै तू जावैगा।” 10ज्यांतै परमेसवर का जन उस राह तै जिसतै बेतेल नै गया था ना लौट कै, दुसरे राह तै चल्या गया। 11बेतेल म्ह एक बूढ़ा नबी रहवै था, अर उसकै एक बेट्टे नै आकै उसतै उन सारे काम्मां का जिक्र करया जो परमेसवर के जन नै उस दिन बेतेल म्ह करे थे; अर जो बात उसनै राजा तै कही थी, उन ताहीं भी उसनै अपणे पिता तै कह सुणाया। 12उसके बेट्यां नै तो यो देख्या था, के परमेसवर का वो जन जो यहूदा तै आया था, किस राह तै चल्या गया, आखर उनके पिता नै उनतै पूच्छया, “वो किस रास्ता तै चल्या गया?” 13अर उसनै अपणे बेट्यां तै कह्या, “मेरे सफर खात्तर गधे पै काठ्ठी बान्धो;” फेर उननै गधे पै काठ्ठी बाँध्धी, अर वो उसपै चढ़या, 14अर परमेसवर के जन कै पाच्छै जाकै उस ताहीं एक बांज दरखत कै तळै बैठ्या होया पाया; अर उसतै पूच्छया, “परमेसवर का जो जन यहूदा तै आया था, के वो तू ए सै?” उसनै कह्या, “हाँ, वोए सूं।” 15उसनै उसतै कह्या, “मेरै गैल घर चालकै खाणा खा।” 16उसनै उसतै कह्या, “मै ना तो तेरै गैल लौट सकदा, अर ना तेरै गैल घर म्ह जा सकूँ सूं अर ना मै इस जगहां म्ह तेरै गैल रोट्टी खाऊँगा, ना पाणी पिऊँगा। 17क्यूँके यहोवा के वचन के जरिये मन्‍नै यो हुकम मिल्या सै, के ओड़ै ना तो रोट्टी खाइये अर ना पाणी पिये, अर जिस राह तै तू जावैगा उसतै ना बोहडिये।” 18उसनै कह्या, “जिसा तू नबी सै उसाए मै भी नबी सूं; अर मेरे ताहीं एक दूत नै यहोवा तै वचन पाकै कह्या, के उस माणस नै अपणे गैल अपणे घर बोहड़ा ल्या, के वो रोट्टी खावै, अर पाणी पीवै।” यो उसनै उसतै झूठ कह्या। 19अर वो उसकै गैल बोहड़ ग्या अर उसके घर म्ह रोट्टी खाई अर पाणी पिया।

20जिब वे मेज पै बैठ्ठे ए थे, के यहोवा का वचन उस नबी कै धोरै पोहच्या, जो दुसरे ताहीं बोहड़ा ले आया था। 21उसनै परमेसवर के उस जन ताहीं जो यहूदा तै आया था, पुकारकै कह्या, “यहोवा न्यू कहवै सै ज्यांतै के तन्‍नै यहोवा का वचन न्ही मान्या, अर जो हुकम तेरे परमेसवर यहोवा नै तेरे तै दिया था उस ताहीं भी न्ही मान्या; 22पर जिस जगहां कै बारै म्ह उसनै तेरे तै कह्या था, ‘उस म्ह ना तो रोट्टी खाइये अर ना पाणी पिये,’ उसे म्ह तन्‍नै लौट कै रोट्टी खाई, अर पाणी भी पिया सै इस कारण तन्‍नै अपणे पुरखां के कब्रिस्तान म्ह माट्टी न्ही दी जावैगी।” 23जिब वो खा-पी चुक्या, फेर उसनै परमेसवर के उस जन कै खात्तर जिसनै वो बोहड़ा ले आया था गधे पै काठ्ठी बन्धाई। 24जिब वो राह म्ह चल्या जाण लाग रह्या था, तो एक शेर उसनै मिल्या, अर उस ताहीं मार गेरया, अर उसकी लाश राह पै पड़ी रही, अर गधा उसकै धोरै खड्या रह्या अर शेर भी लोथ कै धोरै खड्या रह्या। 25जो माणस ओड़ै तै चाल्‍ले आवैं थे उननै या देखकै के राह म्ह एक लाश पड़ी सै, अर उसकै धोरै शेर खड्या सै, उस नगर म्ह जाकै जित्त वो बूढ़ा नबी रहवै था या समाचार सुणाया।

26या सुणकै उस नबी नै जो उसनै रास्ता म्ह तै बोहड़ा ले आया था, कह्या, “परमेसवर का वो जन होवैगा, जिसनै यहोवा के वचन कै बिरुध्द करया था, इस कारण यहोवा नै उस ताहीं शेर के पंजे म्ह पड़ण दिया; अर यहोवा के उस वचन कै मुताबिक जो उसनै उसतै कह्या था, शेर नै उस ताहीं पाड़कै मार गेरया होवैगा।” 27फेर उसनै अपणे बेट्यां तै कह्या, “मेरै खात्तर गधे पै काठ्ठी बाँधो;” जिब उननै काठ्ठी बाँध्धी, 28फेर उसनै जाकै उस आदमी की लाश ताहीं रास्ता पै पड्या होया, अर गधे, अर शेर दोनुआं नै लाश कै धोरै खड़े होए पाया, अर यो भी के शेर नै ना तो लाश ताहीं खाया, अर ना गधे ताहीं पाड़या सै। 29फेर उस बूढ़े नबी नै परमेसवर के जन की लाश ताहीं ठाकै गधे पै लाद लिया, अर उसकै खात्तर छात्ती पीटण लाग्या, अर उसनै माट्टी देण ताहीं अपणे नगर म्ह बोहड़ा लेग्या। 30अर उसनै उसकी लाश ताहीं अपणे कब्रिस्तान म्ह धरया, अर माणस “हाय, मेरे भाई!” या कहकै छात्ती पीटण लाग्गे। 31फेर उसतै माट्टी देकै उसनै अपणे बेट्यां तै कह्या, “जिब मै मर जाऊँगा फेर मेरै ताहीं इसे कब्रिस्तान म्ह धरियो, जिस म्ह परमेसवर का यो जन धरया गया सै, अर मेरी हाड्डी उसे की हाड्डियाँ कै धोरै धर दियो। 32क्यूँके जो वचन उसनै यहोवा तै पाकै बेतेल की वेदी अर सामरिया के नगरां के सारे ऊँच्‍चे स्थानां के भवनां कै खिलाफ पुकारकै कह्या सै, वो जरुर पूरा होवैगा।”

यारोबाम का आखरी बखत

33इसकै बाद इस्राएल का राजा यारोबाम अपणी बुरी चाल तै ना फिरया। उसनै फेर सारे ढाळ के माणसां म्ह तै ऊँच्‍चे स्थानां के याजक बणाए, बल्के जो कोए चाहवै था, उसका संस्कार करकै, वो उसनै ऊँच्‍चे स्थानां का याजक होण नै ठहरा देवै था। 34या बात यारोबाम के घरान्‍ने का पाप ठैहरी, इस कारण उसका विनाश होया, अर वो धरती पै तै नाश करया गया।

Currently Selected:

1 राजाओं 13: BGC

Highlight

Copy

Compare