1 राजाओं 12

इस्राएल राज्य का दो भाग हो जाणा

1रहबाम शेकेम म्ह गया, क्यूँके सारे इस्राएली उसनै राजा बणाण कै खात्तर ओड़ै गए थे। 2जिब नबात के बेट्टे यारोबाम नै यो सुण्या, (जो इब ताहीं मिस्र म्ह ए रहवै था, क्यूँके यारोबाम सुलैमान राजा के डर के मारे भाजकै मिस्र म्ह रहवै था। 3आखर उन माणसां नै उस ताहीं बुलावा भेज्या) फेर यारोबाम अर इस्राएल की सारी सभा रहबाम कै धोरै जाकै न्यू कहण लाग्गी, 4“तेरे पिता नै तो म्हारे पै भारी जूआ गेर राख्या था, तो इब तू अपणे पिता की कठोर सेवा नै, अर उस भारी जूए ताहीं, जो उसनै म्हारे पै गेर राख्या सै, किमे हळका कर; फेर हम तेरै अधीन रहवांगे।” 5उसनै कह्या, “इब्बे तो जाओ, अर तीन दिन कै बाद मेरै धोरै फेर आईयो।” फेर वे चले गए।

6फेर राजा रहबाम नै उन बूढ़यां तै जो उसके पिता सुलैमान के जीवन भर उसकै स्याम्ही हाजिर रह्या करैं थे, सलाह ली, “इस प्रजा ताहीं किसा जवाब देणा ठीक सै, इस म्ह थम के सलाह देओ सो?” 7उननै उस ताहीं यो जवाब दिया, “जै तू इब्बे प्रजा के माणसां का दास बण कै उनके अधीन हो अर उनतै आच्छी-आच्छी बात कहवै, तो वे सदा तेरै अधीन बणे रहवैगें।” 8रहबाम नै उस सलाह ताहीं छोड़ दिया, जो बूढ़यां नै उसतै दी थी, अर उन जवानां तै सलाह ली, जो उसकै गैल बड़े होए थे, अर उसकै स्याम्ही हाजिर रह्या करैं थे। 9उनतै उसनै पूच्छया, “मै प्रजा के माणसां नै किसा जवाब दियुँ? इस म्ह थम के सलाह देओ सो? उननै तो मेरै तै कह्या सै, ‘जो जूआ तेरे पिता नै म्हारे पै गेर राख्या सै, उसनै तू हळका कर।’” 10जवानां नै जो उसकै गैल बड़े होए थे उस ताहीं यो जवाब दिया, “उन माणसां नै तेरे तै कह्या सै, ‘तेरे पिता नै म्हारा जूआ भारी करया था, पर तू उस ताहीं म्हारे खात्तर हळका कर;’ तू उनतै न्यू कहिये, ‘मेरी छोट्टी उंगळी मेरे पिता की कमर तै भी मोट्टी सै।#12:10 जै मेरे पिता सेर थे तो मै सवा सेर हूँ! 11मेरे पिता नै थारे पै जो भारी जूआ धरया था, उसनै मै और भी भारी करुँगा; मेरा पिता तो थारै ताहीं कोड़यां तै ताड़ना देवै था, पर मै बिच्छुआं तै दियुँगा।’”

12तीसरे दिन, जिसा राजा नै ठैहराया था, के तीसरे दिन मेरै धोरै फेर आईयो, उसे तरियां यारोबाम अर सारी प्रजा के लोग रहबाम कै धोरै हाजिर होए। 13फेर राजा नै प्रजा तै कड़ी बात करी, 14अर बुजुर्गां की दी होई सलाह छोड़कै, जवानां की सलाह कै मुताबिक उनतै कह्या, “मेरे पिता नै तो थारा जूआ भारी कर दिया, पर मै उसनै और भी भारी कर दियुँगा: मेरे पिता नै तो कोड़यां तै थारै ताहीं ताड़ना दी, पर मै थारै ताहीं बिच्छुआं तै ताड़ना दियुँगा।” 15इस तरियां राजा नै प्रजा की बात न्ही मान्‍नी, इसका कारण यो सै, के जो वचन यहोवा नै शीलोवासी अहिय्याह के जरिये नबात के बेट्टे यारोबाम तै कह्या था, उसनै पूरा करण कै खात्तर उसनै इसाए ठैहराया था।#12:15 1 राजा. 11:29-39

16जिब सारे इस्राएल नै देख्या के राजा म्हारी न्ही सुणदा, फेर वे बोल्‍ले,

“दाऊद कै गैल म्हारा के अंश?

म्हारा तो यिशै के बेट्टे म्ह कोए हिस्सा न्ही!

हे इस्राएल अपणे-अपणे डेरयां म्ह चले जाओः

इब हे दाऊद, अपणे ए घरान्‍ने की चिन्ता कर।” फेर इस्राएली अपणे तम्बूआं म्ह चले गए।

17आखर इस्राएली अपणे-अपणे डेरे म्ह चले गए। सिर्फ जितने इस्राएली यहूदा के नगरां म्ह बसे होए थे उनपै रहबाम राज्य करदा रह्या। 18फेर राजा रहबाम नै अदोराम ताहीं जो सारे मजदूरां पै अधिकारी था, भेज दिया, अर सारे इस्राएलियाँ नै उस ताहीं पथराव करया, अर वो मर ग्या: फेर रहबाम फुर्ती तै अपणे रथ पै चढ़कै यरुशलेम म्ह भाज ग्या। 19इस तरियां इस्राएल दाऊद के घरान्‍ने तै मुड़ ग्या, अर आज ताहीं मुड़या होया सै। 20यो सुणकै कै यारोबाम बोहड़ आया सै, सारे इस्राएल नै उस ताहीं मण्डळी म्ह बुलावा भेज्या अर पूरे इस्राएल कै उप्पर राजा नियुक्त करया, अर यहूदा के गोत्र नै छोड़कै दाऊद के घरान्‍ने तै कोए मिल्या ना रह्या। 21जिब रहबाम यरुशलेम म्ह आया, फेर उसनै यहूदा के सारे घरान्‍ने ताहीं, अर बिन्‍यामीन के गोत्र ताहीं, जो मिलकै एक लाख अस्सी हजार आच्छे योद्धा थे, कठ्ठा करया, के वे इस्राएल के घरान्‍ने कै गैल लड़कै सुलैमान के बेट्टे रहबाम के वश म्ह फेर राज वापस कर दें। 22फेर परमेसवर का यो वचन परमेसवर के जन शमायाह कै धोरै पोहच्या, 23“यहूदा के राजा सुलैमान के बेट्टे रहबाम तै, अर यहूदा अर बिन्‍यामीन के सारे घराने तै, अर सारे माणसां तै कह, ‘यहोवा न्यू कहवै सै, 24के अपणे इस्राएली भाईयाँ पै चढ़ाई करकै युद्ध ना करो; थम अपणे-अपणे घर लौट जाओ, क्यूँके या बात मेरी ए और तै होई सै।’” यहोवा का यो वचन मानकै उननै उसकै मुताबिक बोहड़ जाण खात्तर अपणा-अपणा राह लिया।

यारोबाम का मूर्तिपूजा कराणा

25फेर यारोबाम एप्रैम के पहाड़ी देश के शेकेम नगर नै दृढ़ करकै उस म्ह रहण लाग्या; फेर ओड़ै तै लिकड़कै पनूएल कै नगर ताहीं भी दृढ़ करया। 26फेर यारोबाम सोच्‍चण लाग्या, “इब राज्य दाऊद के घरान्‍ने का हो ज्यागा। 27जै प्रजा के माणस यरुशलेम म्ह बलि करण नै जावैं, तो उनका मन अपणे स्वामी यहूदा के राजा रहबाम की और फिरैगा, अर वे मन्‍नै घात करकै यहूदा के राजा रहबाम के हो जावैंगे।” 28आखर राजा नै सलाह लेकै सोन्‍ने के दो बाछड़यां की मूर्ति बणाई अर माणसां तै कह्या, “यरुशलेम म्ह जाणा थारी शक्ति तै बाहर सै ज्यांतै हे इस्राएल अपणे देवत्यां ताहीं देक्खो, जो थारै ताहीं मिस्र देश म्ह तै लिकाड़ ल्याए सैं।” 29उसनै एक बाछड़े ताहीं बेतेल नगर#12:29 बेतेल दक्षिण म्ह शहर म्ह, अर दुसरे ताहीं दान#12:29 दान उत्तर म्ह शहर म्ह स्थापित करया। 30अर या बात पाप का कारण होई; क्यूँके माणस उन म्ह तै एक कै स्याम्ही दण्डवत करण खात्तर दान तक जाण लाग्गे। 31अर उसनै ऊँच्‍चे स्थानां के भवन बणाए, अर सारे ढाळ के माणसां म्ह तै जो लेवीवंशी ना थे, याजक ठहराए। 32फेर यारोबाम नै आठवें महिन्‍ने के पन्द्रहवें दिन यहूदा के त्यौहार की तरियां एक त्यौहार ठहरा दिया, अर वेदी पै बलि चढ़ाण लाग्या; इस तरियां उसनै बेतेल म्ह अपणे बणाए होए बाछड़यां कै खात्तर वेदी पै, बलि करया, अर अपणे बणाए होए ऊँच्‍चे स्थानां के याजकां ताहीं बेतेल म्ह ठहरा दिया। 33जिस महिन्‍ने की उसनै अपणे मन म्ह कल्पना करी थी यानिके आठवें महिन्‍ने के पन्द्रहवें दिन नै वो बेतेल म्ह अपणी बणाई होई वेदी कै धोरै चढ़ ग्या। उसनै इस्राएलियाँ कै खात्तर एक त्यौहार ठहरा दिया, अर धूप जळाण ताहीं वेदी कै धोरै चढ़ ग्या।

Currently Selected:

1 राजाओं 12: BGC

Highlight

Copy

Compare