Sofoniyaasi 3
3
Yerusaalemi Asheenaꞌo Axaaxoon Shuunoonaa Biisheeyoona
1Hukkechi, eeꞌeti, boonoshi hajjee asheenaꞌon xuqqiibeeti Yerusaalemi asheenaꞌoyich woowo! 2Ebi asheenaꞌo getaa giyaaneenaꞌo, kaaree ciicenoo waayeyaaneenaꞌone. Doono Yeerin gibeneyaacheete; boonoshi Nuggishoo waanoo giddeyaacheete. 3Iraasheenaꞌo ciddiibeeti daaheroomminaꞌone. Nallechinaꞌoo yaachich getaanoon maa ciichiibeeti, shaaceti okeroomminaꞌone. 4Keemechinaꞌo geecechinaꞌonaa gibeneyaaneenaꞌonane; qeesheenaꞌo yaafoo tuneton eeꞌiiheete; sheeroonoo shaaddeheete. 5Cadiqo tuneti Doono Yeeri ebi Yerusaalemi daggooch beetone. Biyoo tateyaani mooyon tuniyaache. Qemi qemona kuxaanoon dayinnetoona nallii beetone. Tunebaani gonde asheenaꞌo yeellaalleenaꞌone.
6Doono Yeeri ishichiye: “Aagetee asheenaꞌon aalliito taane; boonoshi mishigoo happeetone; boonoshi gommo shaꞌemmo aalletaa, bi aqqemmoyich tuniito taane; boonoshi katemeenaꞌo ashaalli hulleenaꞌo tuneꞌi tiishetinaꞌone. 7Ebi bullin tuniyoona ‘Ta asheenaꞌo taan shattemminaꞌone; ta sheeroyichoo deꞌa gettemminaꞌone; ta sheeriti sheeroon ciroona batteyaachemminaꞌone’ iyaꞌa gabiyoye. Tunebaani boonoshi aafichoommon gonde mooyo bullin kuxaanoon shuunooch giyiyeete” iye.
8Ebich Doono Yeeri ishichiye: “Eke cikki beebote. Aagetee asheenaꞌo toommooch ta nallemmi aabo waatone. Ta kaaree shiixxoon boonoshi toommooch kindiyoyich, aagetee asheenaꞌonaa showee taateenaꞌonon kiciya maacceto taane. Ta kaaree aabooba, qaaqqoo aaxxoommon aaxxeebeeti ta qanaatee kaaroona showoo bulli mici aallemmone.
9“Aroochee boonoshi bulli ta shigoon ceegiree ta waan boonoshi corootemmonaa ikkotteree taach boonoshi goyinne maddemmonoyich, aagetee asheenaꞌochi heciyoon xalloo tuniyemmo taane. 10Wohi showooch shaceꞌi beeti ta asheenaꞌo, Topphiyee aacinaꞌoyee beqachee, buuroon taach deebiree ta waan corootemminaꞌone. 11Ebi arooba, ta toommooch hukkoon tiijjiꞌi ittoshi shuuneti shuunoyich yeelle beetaachemmo ittoshine. Geecoona ciixee beetinaꞌon ittoshi daggoochee aalliyemmo taane; ittoshiyoo yaafoo tuneti ta guudi toommoochaa ebiyee damba geecaachemmo ittoshine. 12Ittoshi daggooch boonoshi qelloon yittiibeeti gaꞌi deꞌe asheenaꞌon echiyemmo taane; boonoshiyoo ta shoobooch giyemminaꞌone. 13Curo tuneꞌi echeti Israꞌeeleenaꞌo gonde mooyon shuuneyaachemminaꞌone; kootoonoo kootaachemminaꞌone; ashoon dachee yibbaatoo boonoshi heciyoochee keyaachemmone. Cikkii mocoon yaapphiibeeti bagoochoommon keqqaalleenaꞌo tunemminaꞌone; kashe qeyemminaꞌone; amoyichona shataachemminaꞌone” iye.
Emiree Shoddo
14Israꞌeeleenaꞌote, emiroona shodde ililibote!
Yerusaalemi asheenaꞌote, mulloochee tiijjiree, oogichi emiribote!
15Doono Yeeri ittoshi toommooch nalleeti nalloon tiijjitone;
ittoshi etteenaꞌon yookkii kichitone.
Israꞌeeleenaꞌochi Taatoo Doono Yeeri ittoshina tookkii beetone;
ebich, ittoshi shattemmi gonde mooyo amolla aalloone.
16Ebi arooba, Yerusaalemich ishichaa getteyemmone:
“Tsiyooni katemee asheenaꞌote, shattaahote!
Ittoshi mochoo niraaye!
17-18Ittoshi Nuggishoo Doono Yeeri ittoshina tookkii beetone;
bi immiibeeti giidoona wudoon danemmo ittoshine.
Biyoo ittoshina oogichi emiremmone;
bi shunoona ittoshi kashoon andiriyemmone.
Asheenaꞌo baaroon baariibee emiroommon,
ittoshina oogichi emiriree shoddemmone” getteyemmone.
Doono Yeeri ishichiye:
“Ittoshi duꞌoon ittoshi waanee wokkiyemmo taane;
ebiyee damba ittoshin yeelliyemmi mooyo beetaachemmone.
19Ebi arooba,
ittoshin neexxii hajjitinaꞌon naxemmo taane;
baata sheqqeenaꞌon wodiyemmo taane;
shacetinaꞌonoo kicemmo taane;
boonoshi giishoon oog wochemmo taane;
showee toommooch arichetinaꞌo tuniyemmo taane.
20Arooba, shaceti ittoshi asheenaꞌon,
boonoshi showooch wochemmo taane;
ittoshin, showee toommooch beeti asheenaꞌo daggooch,
galleteeti ashoonaa aricheti ashoonon tuniyemmo taane.
Ittoshi aafo ciini beetaa,
wochinnoon beemon ittoshich mashaamiyemmo taane”
iye Doono Yeeri.
Currently Selected:
Sofoniyaasi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
