Sofoniyaasi 2
2
Yeer Waan Boonoshi Wottemmoyich Asheenaꞌo Ceekko
1-2Hini yeellaalli aagetee asheenaꞌote, yongo maaxxoon tiijjii daamoommon tiijjaa hamaani beechi, qaaqqoo aaxxoommon aaxxeebeeti Doono Yeeri kaaro ittoshi toommooch kindaan beetaa, Doono Yeerichi kaaree aabo shagaan beetaa, Doono Yeer waan wottebote. 3Doono Yeerichi getoon waayeebeeti, ittoshi qelloon yittiibeeti asheenaꞌote, Doono Yeer waan wottebote; tate mooyon tuniibote; Doono Yeeri aafooch ittoshi qelloon giishiibote. Ebin tuniyoona Doono Yeerichi kaaree aabooba diqqich murici wodemmo ittoshine.
Bare Showee Asheenaꞌo Toommooch Doono Yeeri Nallemmo Tuno
4Gaazi duppeyemmone. Ashiqelooni ashaalli xafo tunemmone. Ashidoodee asheenaꞌo aabe tukkehaa yoohaa aallemminaꞌone. Eqirooni waaxe aallemmone. 5Baharee gashooch koteti Kereetee asheenaꞌote, ittoshich woowo! Filsixeemeenaꞌo showoo tuneti Kanaanee showooch beetinaꞌote, Doono Yeeri ittoshi toommooch nallitone; koninolla echiyaanoon ittoshin aalliyemmone.
6Baharee gashooch beeti ittoshi showoo xalle gaddo tunemmone; wotta qiddeenaꞌochi bashee xaaꞌoonaa bageenaꞌochi qeyi xaaꞌoona tunemmone. 7Curo tuneꞌi echeti Yihudee asheenaꞌo ittoshi showoon hajjemminaꞌone; boonoshi bagoonoo arooch quyemminaꞌone; Ashiqeloona beeti kexooch giyiree arooch qeyemminaꞌone. Boonoshi Nuggishoo Doono Yeeri boonoshina tookki tunemmone; beemon boonoshich mashaamiyemmone.
8Beshe Mawe Doono Yeeri ishichiye: “Moꞌabee asheenaꞌonaa Amoonee asheenaꞌona ta asheenaꞌon coonee naageebee, boonoshi showoon yecha boonoshi miichoon waayeto taane. 9Illa ebich, Israꞌeelee Nuggishoo, beeyechi Doono Yeeri ta tunoona wogehoye! Moꞌabee showoonaa Amoonee showoona Sodoominaa Gomoorina aalloommon aallemmone; ebi showoo, wochinnoon maayo colliyaani, kiikki oppo baach ceenniti, shuyo baach colleebeeti showoo tunemmone. Curo tuneꞌi echeti ta asheenaꞌo boonoshi hajjiton boggemminaꞌone; boonoshi showoonoo hajjemminaꞌone” iye.#Hal. 19:24-25
10Beshe Mawe Doono Yeerichi asheenaꞌon hoxee boonoshi coonetoyich, boonoshi geecee naboona ebi mooyo boonoshi toommooch shaggemmone. 11Doono Yeeri boonoshin keqqichemmone; showee toommeexi nuggisheenaꞌon muujjiyemmone. Showee toommooch beeti aagetee asheenaꞌo bulli, boonoshi showi showooch beechi biich goyinnemminaꞌone.#Erim. 48:26-27; 49:2; Hiz. 21:28-32; 25:6-7
12Doono Yeeri, Topphiyee asheenaꞌo goraadoona qitemmoyich tuniyemmone.
13Doono Yeeri dambi-waan bi mochoon yaggiree Asooree showoon aalliyemmone. Nanawinoo ashaalli xafo, aachaalli barahoo tuniyemmone. 14Gijjoonaa baribare yarechi kubbi cooxona qeyi xaaꞌoon tunemmone. Yuyeenaꞌo bi kechi guummon qeyi beeroo tuniyemminaꞌone; mallee kelloochaanoo qaaddemminaꞌone. Kurecheenaꞌo shaaqqee shagoochaa qaaddemminaꞌone. Kexo hakketi yigee mixo happaa hammemmone. 15Are katemee asheenaꞌo geecechinaꞌo boonoshi tunetoyich, “No achooch amolla shagaachemmone” ii beetinaꞌone. Boonoshiyoo “Showee toommooch aricheti katemoo, no katemoo baachiye” iꞌi gabii beetinaꞌone. Tunebaani are katemoo happaa aallemmone; kubbi coochi beeyi xaaꞌoo tunemmone. Aroona beshemmi asheenaꞌo bulli boonoshi qelloon qeeqqerebee coonemminaꞌone.
Currently Selected:
Sofoniyaasi 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
