Zakaariyaasi 9
9
Israꞌeeleenaꞌochi Etteenaꞌo Toommooch Woyemmi Nalloo
1Ebi Doono Yeeri gettiti wochoone: Doono Yeeri Israꞌeelee yoodeenaꞌon, asheenaꞌo bullinoo ciinnii beetone.#9:1 woyee “Asheenaꞌonaa Israꞌeelee yoodo bullinochi aafo Doono Yeerin ciinnii beetone.” Doono Yeeri Hadiraakee showoonaa Damaasiqi katemoonochi toommooch nallemmone.#Isi. 17:1-3; Erim. 49:23-27; Amo. 1:3-5 2Ebi nalloo Hadiraaki danooch beeti Hamaati katemee toommooch, wotta ariyechi asheenaꞌochi katemeenaꞌo tuneti Xiroosinaa Sidooninochi toommoochoo kindemmone. 3Xiroosi asheenaꞌo boonoshi katemooch mishigoon shuunetinaꞌone. Quttoonaa gommi gasheexi dengoona woddoommon woddeti aachoonaa birewoonon gutitinaꞌone. 4Tunebaani Doono boonoshi hajjito bullin tiijjemmone; boonoshi gaannoonoo baharo qooxxemmoyich tuniyemmone. Ebi boonoshi katemoo qaaqqoona miccemmone.#Isi. 23:1-2; Hiz. 26:15-18; Amo. 1:10
5Ashiqelooni asheenaꞌo ebin beegiree shattemminaꞌone. Gaazi asheenaꞌo ebin beegiree gaashillemminaꞌone. Eqirooni asheenaꞌoo ebiyoommon tuneree, boonoshi gibenoon kuxxemminaꞌone. Gaazi bi taatoon muccemmone. Ashiqelooniyoo ashaalli shokkoon tunemmone. 6Baribare showee asheenaꞌo Ashidood kotemminaꞌone. Doono Yeeri ishichiye: “Filsixeemeenaꞌochi geecoon shoottemmo taane. 7Damoon boonoshi noonooch boonoshi bechaachemmoyich, eeꞌe maayoonoo boonoshi maataachemmoyich tuniyemmo taane. Curo tuneꞌi echeti boonoshi asheenaꞌo ta asheenaꞌona tookki bacceeree Yihudi yoodoochee ikke gumboommon tunemminaꞌone. Eqiroonee asheenaꞌo Yebusee asheenaꞌochoommon ta asheenaꞌona tookki bacceyemminaꞌone.#Erim. 47:1-7; Sofo. 2:4-7 8Ginee naayinaꞌo aroona okk hach boonoshi besheyaachemmoyich, ta showee guudoon quyemmo taane. Ta asheenaꞌo duꞌoon ta hajjee aafoona ta beeggetoyich, giidechinaꞌo ebiyee bekk boonoshin neexi hajjaachemminaꞌone” iye.
Woyemmi Taatoo Mooyo
9Tsiyooni asheenaꞌote, oogichi emiribote!
Yerusaalemi asheenaꞌote, ililibote!
Ittoshi taatoo, cadiqoonaa kochii wochechona
gaꞌi deꞌo tunee, kuroon yebbee,
kureechi bushoon yebbee,
ebiyoche, ittoshi waan waa beetone.#Maat. 21:5; Yowa. 12:15
10Doono Yeeri ishichiye:
“Gaarinaꞌon Efreemee showoochee,
ginee haresheenaꞌon Yerusaalemee, aalliyemmo taane.
Ginee koyee maꞌoonoo tiichemmo taane.
Ittoshi taatoo diggoon aageteenaꞌoyich awaajjemmone.
Bi taatittino, baharoochee baharooch bedo,
Efiraaxisi aacoochee showee tuggooch bedo, tunemmone” iye.#Shod. 72:8
Doono Yeerichi Asheenaꞌo Kecoochee Wotto
11Doono Yeeri ishichiye:
“Neenna tookkaa damoona wogoon ta giyetoyich,
cucheeti ne asheenaꞌon aachaalli oppoochee biishi gawukkemmo taane.#Key. 24:8
12Gibenoona beeti hini qoppeenaꞌote!
Ittoshi mishigooch wottebote!
Gutte kishoo tuniiree ittoshin diiremmo ta tunoon
ta and ittoshich gettoye.
13Yihudee asheenaꞌon maꞌoommon,
Efreemee asheenaꞌonoo shangoommon, tuniyemmo taane.
Giriikee asheenaꞌon koyoyich,
Tsiyoonee asheenaꞌon goraadoommon tuniiree daachiyemmo taane” iye.
14Doono Yeeri boonoshi toommoochaa bekkemmone;
bi shangoo xeeyoochoommon awureyemmone.
Nuggishoo Doono Yeeri tiree qaaroon waayiyemmone;
deshi-waani yubee yongoona hammemmone.
15Beshe Mawe Doono Yeeri boonoshin quyemmone.
Boonoshi etteenaꞌonoo aalliyemminaꞌone.
Etteenaꞌochi xeppellee xaqqoon neexxemminaꞌone;
woyinee uyoon uchii masheti ashichoommon cookemminaꞌone.
Boonoshi etteenaꞌochi damoo,
deejjee damoo saanooch ceenniꞌi ufoommon ufemmone.
16Ebi aabo shagiyooba, qiddoo bi bagoon bi wodiyoommon,
boonoshi Nuggishoo Doono Yeeri
bi asheenaꞌon wodiyemmone.
Gubbichee toommooch beeti shasho waccoommon
boonoshiyoo bi showoochaa waccemminaꞌone.
17Am shaahoon malletee gaaweheete!
Arooch beeti maayoonaa woyinee uyoona,
gurimaashe anaaminaꞌonaa maacheenaꞌonon uummiyemmone.
Currently Selected:
Zakaariyaasi 9: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
