Zakaariyaasi 10
10
Doono Yeeri Bi Asheenaꞌoyich Gibenikkiti Gibeno
1Naawee amiyon ittoshich bi immemmoyich Doono Yeerin qollebote; amichechi quboon immiibeeto Doono Yeerine. Biyoo ashich bede amiyon, bi ikkikkoyichoo budeexi bechoon immemmone. 2Terafimo#10:2 Terafimo, ashoon shaahiitaa shuuneeti shahalloone. gaacaalloone; qaaxechinaꞌoo beeggiibeeto koote yaaꞌoone; gummechinaꞌo koote gumon maaccii beetinaꞌone; duube goggiyoonoo goggii beetinaꞌone. Ebina asheenaꞌo bagoochoommon yallyallimiyeete; qiddoonoo mucceꞌi xuuxeheete.
3Doono Yeeri ishichiye: “Ta kaaro qiddeenaꞌo toommooch aaxxetone; boonoshin sheeremmo taane. Beshe Mawe Doono Yeeri ta, ta bago tuneti Yihudee asheenaꞌon aaxxii ciinnaabeeto taane. Boonoshinoo koyoochaa nagixiibeeti ta hareshoommon tuniyemmo taane. 4Yihudee asheenaꞌo daggoochee kexon tuuggii neechiibeeti giimbee guummo, duukkaanee xogoo, ginee koyee maꞌoonaa taateenaꞌo bullina kechemminaꞌone. 5Boonoshiyoo ikkotteree ginee naayochoommon, boonoshi etteenaꞌon gommeexi dengoochoommon kotemminaꞌone. Doono Yeeri ta, boonoshina tookkaa ta tunetoyich koyeree, hareshechinaꞌonolla koyi wochemminaꞌone.
6“Yihudee asheenaꞌon kupphiyemmo taane.
Yooseefi yareenaꞌon wodiyemmo taane.
Boonoshich ta ariqqetoyich, boonoshi xaaꞌooch wochi deebemmo taane.
Boonoshin ta dufaani asheenaꞌoommon tunemminaꞌone.
Ta, boonoshi Nuggishoo Doono Yeeri ta tunetoyich,
boonoshi corootoon waayemmo taane.
7Efreemeenaꞌo kupphe ginee anaamoommon tunemminaꞌone.
Woyinee uyoon uchiti asho emiroommon emiremminaꞌone.
Boonoshi bushiisheenaꞌo ebin beegiree emiremminaꞌone.
Boonoshi mullo Doono Yeerina emiremmone.
8Boonoshin shennoona ceegiree, kicemmo taane;
boonoshin biishemmo taane;
ebiyee aafichoommon, meettemminaꞌone.
9 Aageteenaꞌo daggooch boonoshin ta shaccetaanona
wohi showooch beechi taan shalligemminaꞌone.
Boonoshi bushiisheenaꞌona tookki kashoona beeree,
boonoshi showooch wottemminaꞌone.
10Gibitsee boonoshin wochi deebemmo taane;
Asooree showoocheenoo boonoshin kicemmo taane.
Gilaadee showoonaa Libanoosee showoonooch boonoshin deebemmo taane;
showoo boonoshich bedaachemmone.
11Iritee baharee daggoona beshemminaꞌone;
aachi aayon yexxemmo taane.
Abbaayi gejjo bulliyoo shuuqqemmone;
Asooreenaꞌo geecoo shootemmone;
Gibitsee showee taatittinee gumbo dihemmone.
12Doono Yeeri ta, boonoshin kupphiyemmo taane;
ta shigoonoo giyi kechemminaꞌone”
iye Doono Yeeri.
Currently Selected:
Zakaariyaasi 10: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
