Roomi 3

1Illa Ayihudee asho tunee gaaco amoone? Woyee dokireyee gaaco amoone? 2Bulli gommona oogeti gaacechone. Shiichiꞌi Yeeri boonoshin gibeneꞌi bi qaaroon immitone.

3Illa boonoshi daggoochee ikkikkeenaꞌo Yeeri toommooch mulloon tooꞌiyaaneenaꞌo boonoshi beegaatochi, boonoshi mullee tooꞌiyee qayo Yeerichi gibeneyoon echiyehe? 4Ciroona echiyaache.

“Ne noonoochee kechiibeeti qaaroona

cadiqo ne tuno asho bullich bekkemmone;

neenna taggee beetinaꞌon xoobiyemmo neene”

getaa bi kooreetoommon, asho bulli kooto bi tunetaanoona, Yeeri iberoone.

5Tunebaani no gondittino Yeerichi cadiqittinoon beshii bekkiibeeto bi tunegaata, ama gettehone? Yeeri kaaree shiixxoon no toommooch bi deebigaata, tato toonoone getone? Ashi doyee yibbaatoommon ishichiyoye. 6Ciroona toonoone! Ebi bi tunemmo gaata, Yeeri alemeexi ashi toommooch bi nallemmo aabichireeshiye? 7Ta kootteti kootoona Yeerichi iberittino bi oogoyich beshi bekkemmo bi tunegaata, axaaxechon tuniiree ta toommooch bi nallemmo amoyichiye? 8Wotta ikkikkeenaꞌo “Gaawe mooyo woyemmoyich gondoon shuunebone” ii beeton shaahiiꞌi no shigoon gondii beetinaꞌone. Eboshi toommooch kindemmi nalloo tatoone.

Asho Koniyoona Cadiqo Tunee Bi Qayo

9Illa amo tuneba? Ayihudo no, Ayihudo tuneyaaneenaꞌoyee besho noone? Ciroona toonoone. Ayihudeenaꞌoo, Ayihudo tuneyaaneenaꞌoo bulliyona axaaxoyich hajjeeꞌi beetinaꞌo boonoshi tunoon shiichaꞌa bekkiito noone. 10Ishichaa bi kooreetoommon,

“Cadiqo aalloone; ikkolla aalloone;

11shalligiibeeto aalloone;

Yeerinoo qaawiibeeto aalloone.

12Yeerichi gommoochee badd wottetinaꞌone;

ikkittinoona duubetinaꞌone;

gaaweton shuuneebeeto aalloone;

ikkolla aalloone.#Shod. 14:1-3; 53:1-3

13Boonoshi noonoochee kechiibeeto

ashi kashoon kichiibeeti qaaroone;

boonoshi heciyoona dawushiyeete;

xekeree qoppaa wuxoommon,

boonoshi heciyoona qoppiyeete.#Shod. 5:9; 140:3

14Boonoshi noonooch ufonaa caamoona ceennitone.#Shod. 10:7

15Boonoshi baatoo

ashi damoon ukkoyich afaafinee beetone;

16boonoshi hammiibeeti gommo bulli

aalliyoonaa iritiyoonane.

17Diggee gommonoo ariyaaneenaꞌone.#Isi. 59:7-8

18Yeerin shato boonoshi aafooch aalloone.”#Shod. 36:1

19Asho bulli noonoo bi wochaachemmoyich, alemo bulli toommooch Yeeri nallemmoyich, Muusichi Sheerooch kooreeto bulli ebi are sheeroyich hajjee beetinaꞌoyich gettiibeeto bi tunoon ariyaabeeto noone. 20Ebich asho koniyoona sheeroon quyoona Yeeri aafooch cadiqaache; ebiyoo ebi sheeroo asho bulli axaaxecho bi tunoon bi arichii beetoyichiye.

Ashoon Yeeri Cadiqiibeeti Gommo

21Tunebaani and Muusichi Sheeroonaa keemechinaꞌona miixeeti, Yeer waanee daneebeeti cadiqoo bekketone; ebi cadiqoo Muusichi Sheeroon ceechii quyoona danemmo toonoone. 22Aroo Yesuus Kiristoosi toommooch mullee tooꞌiyoona Yeer waanee danemmi cadiqoone. Boonoshi mulloon Yesuus Kiristoosi toommooch tooꞌii beetinaꞌo bullin Yeeri cadiqiyemmone. Barittino aalloone; 23asho bulli axaaxoon shuunetone; bi toommoochoo beeti Yeerichi oogee yiiroon aalliitone. 24Yeeriyoo axaaxoochee biisheebeeti Kiristoos Yesuusina, baad cikki bi wojjoona boonoshin cadiqiyemmone. 25Ufeti Yesuus Kiristoosichi damoona asho bi axaaxoyich maaroon bi danemmoyich deejjoon tuniiꞌi Yeeri neechiye; ebi maaroon dano asho hakkemmo, Yesuus Kiristoosi toommooch mullee tooꞌiyoonane. Yeeri ebin bi tuniito bi cadiqittinoon bekkiyoyichiye. Yeeri ebiyee aaf asho shuuneti axaaxoon haaꞌiyoona beshiitone; 26tunebaani and hini yemeenooch bi cadiqittino bekkemmoyich, Yeeri bi qelloona cadiqo bi tunoon, bi mulloon Yesuus Kiristoosi toommooch tooꞌiibeeto bullinoo cadiqiibeeto bi tunoon bekkii beetone.

27Illa asho geecemmi mooyo aaye? Echetone. Amee naboona? Muusichi Sheeroon ceechoonane? Toonoone. Yesuus Kiristoosi toommooch mullee tooꞌiyoonane. 28Ebich asho Muusichi Sheeroon ceechoona tuneyaanoon, Kiristoosi toommooch mulloon tooꞌiyoona cadiqemmo bi tunoon beeggaabeeto noone. 29Halla Yeeri Ayihudeenaꞌo ikkeetochi Nuggishoo baachiye? Aageteenaꞌoyichoo wotta Nuggishoo toone? Eeha, boonoshich wotta Nuggishoone. 30Ebiyoo dokireeti Ayihudeenaꞌon Kiristoosi toommooch mulloon tooꞌiyoona, dokireyaani Aageteenaꞌonoo Kiristoosi toommooch mulloon tooꞌiyoona cadiqiibeeti ikke Nuggishoo baach beetoyichiye. 31Illa Yesuus Kiristoosi toommooch no mulloon tooꞌiyoona Yeerichi sheeroon echiyaabeeto noone? Toonoone. Sheeroon manjiihonalli echiyaachone.

Currently Selected:

Roomi 3: KBRC

Highlight

Copy