Roomi 2

Asho Bulli Toommooch Yeeri Nallemmo Tuno

1Hini ashoocho, baroo toommooch nallaa beetine? Amee asholla ne tunegaata, ne dametemmi gommo aalloone. Bare asho tuniibeeti mooyinaꞌon ne, ne qelloona tuniyaa ne beetoyich, ne toommooch wochaa nallaabeeto neene. 2Ebiyoommi mooyon tunii beetinaꞌo toommooch Yeeri iberittinee nalloon nallemmo bi tunoon ariibeeto noone. 3Newoo ebin tunii beetinaꞌo toommooch nallaabeeti, aroonoo tuniibeeti ashoocho, Yeerichi nalloochee muriccemmo shaahaa beetine? 4Woyee Yeeri bi ariqqoona axaaxee gommoochee bi waan neen wochiya bi yaaboon ariyaanoon, Yeerichi ariqqittinee woddoonaa kaatee nallaanoon yagii bi haaꞌiyoonon qallayinne?

5Tunebaani “Axaaxee gommoochee Yeer waan wotteyaache” ii beeti mulli manjoo ne tunetoommon, Yeeri kaamittinee nalloon bi bekkiyehoobinaa kaaree shiixxoon bi kindiyemmi aaboobinoyich kaaree shiixxoon ne toommooch kicaabeeto neene. 6Biyoo asho bi ikkikkoyich bi shuuni shuunoommon qoccemmone.#Shod. 62:12; Shaah. 24:12 7Gaawe mooyon shuunoona kuppheebee oogee yiiroonaa naadoonon, bulli yemeenee kashoonoo qaawii beetinaꞌoyich, bulli yemeenee kashoon immemmone. 8Tunebaani beshi bekkeya qaawii beetinaꞌo toommooch, iberoyich deꞌa geton qajjiichii xumme mooyon shuunee beetinaꞌo toommooch, kaaree shiixxoonaa naxoona kindemmone. 9Gonde mooyon tuniibeeti asho bulli toommooch, shiichiree Ayihudeenaꞌo toommooch, daakkiree Aageteenaꞌo toommooch, ooge iritoonaa xuuxoona tunemmone. 10Tunebaani gaawe mooyon tunii beetinaꞌo bullich, shiichiree Ayihudeenaꞌoyich, daakkiree Aageteenaꞌoyich, oogee yiiroonaa naadoona, diggoonoo tunemmone. 11Ebiyoo Yeeri ashi aafoon ciinniꞌi heppaano bi tunetoyichiye.#Yibba. 10:17

12 Muusichi Sheeroo boonoshich icheyaanoon axaaxoon shuunee beetinaꞌo, ebi sheeroo boonoshich icheyoo bi qajjitaanona, aallemminaꞌone; Muusichi Sheeroo boonoshich icheechaa axaaxoon shuunee beetinaꞌo ebi sheerooch kooreetona boonoshi toommooch nalleyemmone. 13Yeeri aafoochaa cadiqemminaꞌo sheeroon waayeꞌi shuunee toommooch heechii beetinaꞌoani, sheeroon baad cikkii waayee beetinaꞌo tooneenaꞌone. 14Sheeroo boonoshich icheyaani Aageteenaꞌo, boonoshi halloona sheerooch getteeton boonoshi tunii beegaata, sheeroo boonoshich icheyoo bi qajjitaanona boonoshi mullooch bi beetoyich, boonoshi tuniiya bede mooyon arii beetinaꞌone. 15Boonoshi gaboo boonoshin bi taggetaa woyee deggitaa, boonoshi mullo boonoshin ittibatee beetone. Ebich sheerooch kooreeto boonoshi mullooch kooreeto bi tunoon boonoshi qoco bekkii beetone. 16Ebiyoo tunemmo, mishiraachoona ta arichiitoommon Yeeri Kiristoos Yesuus waanaa ashi mullooch aacheeti gabee toommooch bi nallemmi aaboobane.

Muusichi Sheeroyich Ayihudeenaꞌo Deꞌa Getti Qayo

17Ayihudo ne getteegaata, Muusichi Sheeroona ne degee gaata, Yeerinoo ne geeci gaata, 18Yeerichi daaggoonoo ne ariigaata, sheeroochee doyaa gaaweton bariyaꞌa ne ariigaata, 19-20sheeroochee tiyitona ceeni ariyoonaa iberoona neech bi beetoyich, aaf doogeenaꞌon yaabaabeeto, manderooch beetinaꞌoyich bekko, tuusheenaꞌoyich dojjecho, gaggereenaꞌonoo dojjecho ne tunoon ne gibenegaata, 21illa bareenaꞌon dojjaa beetocho, ne qelloon dojjaachenne? Gaajjaahine getiichi, gaajjenne? 22“Shunoon maayaahine” ii beetocho, shunoon maayenne? Shahalleenaꞌon tiyaaraa beetocho, boonoshi yaafee kechi qiicoon boggenne? 23Sheeroona geecaa beetocho, are sheeroon shaaddaꞌa Yeerin giishiinne? 24Ebiyoo “Ayihudo ittoshi naboona Aageteenaꞌo daggooch Yeerichi shigo naakketone” getaa bi kooreetoommoniye.

25Muusichi Sheeroon ceechaa ne quyegaata, ne dokireyoo gaacechone; tunebaani Muusichi Sheerooch kooreeton ne shaaddegaata, dokireyaani ashoommon tuneto neene. 26Illa dokireyaani aagetee asho Muusichi Sheerooch kooreeton ceechii bi quyegaata, dokireeti Ayihudee ashoommon tuniiree Yeeri ciinaachehe? 27Ebich icheti Sheeree Macaafo neech beetonaa dokireetona tunaachaa ebi sheeroon shaaddaabeeti ne toommooch Muusichi Sheerooch kooreeton ceechiibeeti, bi meenona dokireyaano nallemmone.

28“Ayihudee ashoone” iꞌi boonoshi gabiibeeto bulli Ayihudee asho toonoone; bekkeebeeti meenona tuneebeeti dokireyoo ibere dokireyoo toonoone. 29Tunebaani ashi beꞌenoyich tuneyaanoon, bi mulloona Ayihudee asho tunetone ibere Ayihudee asho; kooreeti sheeroona tuneyaanoon, Yeerichi Ayaanoona tuneebeeti mullee dokireyoone ibere dokireyoo.#Yibba. 30:6 Ebiyoommi asho galletoon bi danemmo ashi waanee tuneyaanoon, Yeer waaneeniye.

Currently Selected:

Roomi 2: KBRC

Highlight

Copy