Roomi 16
16
Phawuloosichi Diggiyoo
1Kenkiriyi kittinnee guuphi daggooch maddechi tuneti no manee Feebenin ittoshich adereto taane. 2Kittinneenaꞌo yaafeenaꞌon iibbii beetoommon, biinoo wotta ittoshi iibbiyemmoyich ittoshich shalligichaabeeto taane. Biyoo meetinaꞌon deggaabeeti, taachoo dege tuneti maneene. Ebich ittoshiyoo wotta biich qaawiibeeti mooyo bullina biin degote.
3Kiristoos Yesuusichi shuunoon taanna tookkii shuuneebeeti Phirisqilinaa Aqilinoyich#Mish. 18:2-3 ta diggiyoon getote. 4Boonoshiyoo boonoshi kashoonolla aaxxiyaanoon taach qitiya kuxxiti asheenaꞌone; ta ikkeeto baach tuneyaanoon, wodde xaaꞌoona corootoyich kiceebeeti aagetee kittinnee guupho bulli naadiibeeti asheenaꞌone. 5Ebi Phirisqilinaa Aqilinochi kexooch kiceebeeti kittinnee guuphoyich ta diggiyoon getote.
Isiyee showoochee Kiristoosi toommooch mulloon tooꞌiyoona qaabboo tuneti, ta shunnaabeeti Aphenexoosich ta diggiyoon getote. 6Ittoshicha iyaꞌa woddoon aajjeti Maariyamich ta diggiyoon getote. 7Mishiraachechinaꞌo daggoochee woraafa getteetinaꞌo, wotta Kiristoosi toommooch mulloon tooꞌiyoona tayee qaabbeenaꞌo, taanna tookkii cucheti ta xibeenaꞌo Andironiqoosinaa Yuniyasinoyich ta diggiyoon getote.
8Doonona ta shunnaabeeti Amiphilaxoosich ta diggiyoon getote. 9Kiristoosina, noonna tookkii shuuneti Uribaanoosich, ta shunnaabeeti Istakoosich ta diggiyoon getote. 10Kiristoosich bi gibeneyoo miixeeꞌi naadeeti Apheleesich ta diggiyoon getote. Arixobuloosichi kechi asheenaꞌoyich ta diggiyoon getote. 11Ta xiboo Herodiyoonich ta diggiyoon getote. Narisusi kechi asheenaꞌo daggoochee boonoshi mulloon Doono Yesuusi toommooch tooꞌiitinaꞌoyich ta diggiyoon getote.
12Doono Yesuusich maddoona aajjiibeeti Tirufiininaa Tirufoosinoyich ta diggiyoon getote. Doono Yesuusich shuunoona oogeton aajjeti, shucheti no manee Fersisich ta diggiyoon getote. 13Doono Yesuusina kaacheti Rofoosich, bi hajjee bushoon tuniiꞌa taan deggeti bi indeyichoo ta diggiyoon getote. 14Asinkiriteesinaa Filigooninoyich, Herimenichoo, Fatirobaasichoo, Herimaasichoo, boonoshina tookkii beeti kittinnee maneenaꞌo bullichoo ta diggiyoon getote. 15Filologoosinaa Yuuliyinoyich, Neeriyinaa bi maneenoyich, Olumifaasich, boonoshina tookkii beeti yaafeenaꞌo bullichoo ta diggiyoon getote. 16Yaafeeti gommona shumeyoona ittoshinaa ittoshina ikkoo baroon diggiibe. Kiristoosichi kittinnee guuphi asheenaꞌo bulli ittoshin diggii beetinaꞌone.
Ciiroochaa Phawuloosi Gettiti Mooyinaꞌo
17Illa ta maneenaꞌote! Ittoshi doyiti doyoon shixona ashoonaa ashoonochi daggooch barbarittinoon hallii beetinaꞌo waanee, xugo tuneebeeti asheenaꞌo waaneenoo ittoshi qelloon ittoshi quyemmoyich ittoshin qollaabeeto taane; eboshi waanee baribote. 18Ebiyoommi asheenaꞌo boonoshi maacoyich baachalli no Doono Yesuus Kiristoosich hajjeyaaneenaꞌone; gaaweto shaahii beetonaa maanjee yibbaatoona diqqe asheenaꞌochi mulloon dachii beetinaꞌone. 19Mishiraachee qaaroyich ittoshi deꞌa geto asho bullich waayeetone. Ebich ittoshi mooyo taan emirikkitone; gaawe mooyon shuunoyich ariyechon, gonde mooyon shuunoyich tuushoon ittoshi tunemmoyich shunnoye.
20Diggee Nuggishoo Sheexaanoon kaate yexi dichiree ittoshi baatee dechiich yiikkemmone.
No Doono Yesuus Kiristoosichi wojjoo ittoshina tookki tunebe.
21Taanna tookkii shuuneebeeti Ximootiyoosi, ta xibeenaꞌo Luqiyoosinaa Yaasoonina, Sosiphaxiroosiyoo ittoshin diggii beetinaꞌone.
22Hini wochoon Phawuloosi getaa kooriti Xerixiyoosi tawoo Doono Yesuusina ittoshin diggiibeeto taane.
23Taannaa kittinnee guupho bullinon iibbiibeeti Gaayoosi ittoshin diggii beetone. Hini katemee araaqee iraashoo#16:23 Araaqee iraashoo taatoochi qiiceenaꞌo bulli toommooch iraashoo tuneti ashoone. Erasxoosi, no manoo Qarixoosiyoo ittoshin diggii beetinaꞌone.
24[No Doono Yesuus Kiristoosichi wojjoo ittoshi bullina tookki tunebe. Ameena.]
Yeerin Phawuloosi Galleto
25-26Bulli yemeenee Nuggishoo wonnee yemeenoochee tiijjiꞌi aachaa yagiti mooyon “and galleebe” itone. Ebich keemechinaꞌo boonoshi kooriti macaafoochaa xallayii gettitinaꞌone; aageteenaꞌoo boonoshi mulloon Yesuus Kiristoosi toommooch tooꞌiiree biich deꞌa boonoshi gettemmoyich waayeꞌi ariitinaꞌone. Illa ta gettaabeeti mishiraachoommona Yesuus Kiristoosicho getteebeeti wochoommon ittoshin kupphiyoon hakkemmi, 27bi ikkeeto baach ariyecho tuneti Yeerich Yesuus Kiristoosina bulli yemeenoon oogee yiiroo tunebe. Ameena.
Currently Selected:
Roomi 16: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
