Roomi 15

Bi Qelloon Emirikkee Qayo

1Ebich Kiristoosichi toommooch mullee tooꞌiyoona kuppheti no, no qelloon emirikkoon qayiichi kuppheyaaneenaꞌochi shaagoon shaago nooch qaawiihe. 2-3Kiristoosiyolla bi qelloon emirikkaanoone; Yaafe Macaafooch bi kooreetoommon, “Ne toommooch boonoshi qoonniti qoono ta toommooch kindiye”#Shod. 69:9 getaa kooreetoommon tunehe. Ebich no ikkikkoo kittinnee no manoon no eenniyemmoyich biich gaaccemmi gaawe mooyon shuuneree biin emirikkibone. 4Yaafe Macaafoochee no danaabeeti haaꞌiyoonaa goggoona gibeno nooch bi beeyemmoyich, shiichiꞌi Yaafe Macaafooch kooreeto bulli nooch dojjiya kooreetone.

5-6Ikke mulloona tuneree ikke qaaroona no Doono Yesuus Kiristoosichi Nihoo Yeerin ittoshi oogiyemmoyich, haaꞌiyoonaa goggiyoona bi waan ceenniti Yeeri Kiristoos Yesuusichi qocoon dabbiree ittoshinaa ittoshina ikke mulloona ikkotteꞌi beemi hakkoon ittoshich imbe.

Aageteenaꞌo Mishiraachee Qaaroon Waayo

7Ebich Yeeri oogemmoyich Kiristoosi ittoshin bi waan bi katichoon shalligibee ebiyoommon tuniibotalli, ittoshinaa ittoshina ikkoo baroon shiqqiyaaye. 8Kiristoosi Ayihudeenaꞌochi maddecho bi tuneto, Yeeri gibeneeto bi tunoon bekkiiya qaabbechinaꞌoyich gibenikkeeti gibenee qaaroon bi ceechoyichiye; 9wotta Aageteenaꞌo Yeerin bi maaroyich boonoshi oogiyemmoyichiye iyo. Ebiyoo,

“Ebich Aageteenaꞌochi daggoochaa neen galletemmo taane;

ne shigoyichoo shoddemmo taane”#2 Saam. 22:50; Shod. 18:49 getaa bi kooreetoommoniye.

10Wotta

“Aageteenaꞌote! Yeerichi asheenaꞌona tookki emiribote”#Yibba. 32:43 iye.

11Wochiꞌi wotta

“Aageteenaꞌote, ittoshi bulla Doonon galletebote!

Asheenaꞌo bulli naadibeete”#Shod. 117:1 iye.

12Wochinnoon wotta keemechi Isiyaasi,

“Iseyi yaroo woyemmone;

Aageteenaꞌonoo hajjiya tiyemmone;

boonoshiyoo biin gibenemminaꞌone”#Isi. 11:10 iye.

13Gibenee Nuggishoo Yaafe Ayaanee giidoona ittoshich gibeno woddemmoyich ittoshi mulloon bi toommooch ittoshi tooꞌitoyich emiroonaa diggoonon ceechiree ittoshich imbe.

Aafee Kupphoona Phawuloosi Kooriti Naboo

14Ta maneenaꞌote! Ittoshi, ittoshi qelloona deꞌittinoona ittoshi ceenon, ariyoona ittoshi ceenon, ikkoo baroon kaaree ciicon hakkemmo ittoshi tunoon, ittoshichon ta qelloona ta manjiiꞌa ariito taane. 15Yeeri taach immiti wojjee naboona wochinnoon wotteree ittoshin shalligichoyich ebi wochooch ikkikke mooyinaꞌon aafee kupphoona koorito taane. 16Yeeri ebi wojjoon taach bi immito Aageteenaꞌoyich Kiristoos Yesuusichi maddecho ta tunemmoyichiye. Aageteenaꞌo Yaafe Ayaanoona yaafeeree Yeerina shucheti deejjoommon boonoshi tunemmoyich, Yeer waanee taach icheti mishiraachee qaaroon gettaabee qeeshoochoommon maddaabeeto taane.

17Illa Kiristoos Yesuusina Yeerich ta maddaabeeti maddoona geecaabeeto taane. 18-19Aageteenaꞌo Yeerich deꞌa boonoshi gettemmoyich, Kiristoosi bi qaaroonaa bi shuunoona, worganikkiti malletoonaa gaakkechi shuunoonochi giidoona, Yaafe Ayaanee giidoona ta waanaa tuneꞌi bi shuuneti mooyoyee beshe bare amoonolla getoyich aafoon kuppheyaache. Ebich Yerusaalemee tiijjaꞌa Iliriqoonee showooch beddaahaa guuddaꞌa Kiristoosichi mishiraachoon ikkeenolla echiyaanoon gettaa bechito taane. 20Ebiyee bare asho baashiti toommooch ta hagaachemmoyich, asheenaꞌo Kiristoosichi shigo ceekketaa boonoshi waayeyaani xaaꞌooch mishiraachee qaaroon bechii getoyich qiicceto taane. 21Ebiyoo,

“Shiichii biicho boonoshich getteyaaneenaꞌo beeggemminaꞌone;

waayeyaaneenaꞌoo shalligemminaꞌone”#Isi. 52:15

getaa bi kooreetoommoniye.

Roomi Katemoon Shagi Beegga Phawuloosi Gaboo

22Ebichi naboona wotta and beddaahaa ittoshi waan womon hakkaano taane.#Room. 1:13 23Tunebaani and hini ta beeti showooch gubbich ta shuunemmi bare shuunoo aallo bi tunetoyich, ebiyeenoo ittoshin hammii beegoyich wodde naton qaatoo taach beetoyich, 24katinoon ittoshi waan hamma gibenaabeeto taane. Isipaanee showooch hamibee ikkot ittoshin beeggemmo taane; shiichiree ittoshina daneree giisheche aaboon ittoshi waan koteree ta emiritoyee gubb, arooch hammemmo taane; wottoo ta gommoyich taan deggemmo ittoshi tunoon gibenaabeeto taane. 25Tunebaani and yaafeenaꞌon gaachemmi mooyon yechaꞌa, Yerusaalem hammaabeeto taane. 26Makidooninaa Akaayee showoonooch beeti kittinneenaꞌo Yerusaalem beeti, yaafeenaꞌochi daggooch beeti girechinaꞌon degoyich shunnitinaꞌone.#1 Qoro. 16:1-4 27Ebin boonoshi qelloona degga shunnitinaꞌone; wotta ebiyoo tunibede mooyone. Ayihudeenaꞌo boonoshich icheti Yaafe Ayaanee wojjoochee Aageteenaꞌoyich qooditinaꞌone; ebich meenoyich qaawiibeeti mooyona wotta Ayihudeenaꞌon gaacho boonoshich qaawiihe.#1 Qoro. 9:11 28Illa ebi boonoshi immiti wojjoon daami shakkii imiichi ebin ta ceechitoyee gubb, ittoshi waanina besheree Isipaanee showooch hammemmo taane. 29Ittoshi waan waaree Kiristoos waanee daneebeeti ceeni wojjoon ittoshich qoodemmo ta tunoon ariibeeto taane.

30Illa ta maneenaꞌote! Taach Yeer waan corootibee, taanna tookki ta qiiccaabeeti qiiccoommon ittoshi qiiccemmoyich, Doono Yesuus Kiristoosinaa Yaafe Ayaano immiibeeti shunoona ittoshin qollaabeeto taane. 31Yihudee showooch beeti, Yeerich deꞌa getaani asheenaꞌo kishoochee ta wodemmoyich, wotta Yerusaalem ta daammaabeeti wojjoona yaafeenaꞌo emiremmoyich taach corootibote. 32Aroochee Yeerichi daaggoo bi tunegaata, emiroona waaree ittoshi waan kashemmo taane. 33Diggee Nuggishoo ittoshi bullina tookki tunebe. Ameena.

Currently Selected:

Roomi 15: KBRC

Highlight

Copy