Shaahiyoo 4
4
Shalligoochee Daneebeeti Gaaco
1Ta bushiisheenaꞌote, ittoshi nihoochi ciicoon waayebote; shalligoon ittoshi danemmoyich manjiiree ellebote. 2Gaawe doyoon ittoshich dojjemmo taane; ta dojjaabeeti doyoon qajjaahote. 3Ta nihoo kexooch batt dellidellaa ta beehooba, ta indeyichoo ikke mixxe bushoo ta beehooba, 4ta nihoo ishichiꞌi taan dojjiye: “Ne mullo ta qaaroon yeshe; ta getoonoo quyebe; kashoona beeyemmo neene. 5Shalligoonaa ariyoonon danebe; ta qaaroon batteyaahine; aroocheenoo bara wotteyaahine. 6Shalligoon duppaahine; neen deggemmone; biin shune; neen quyemmone. 7Shalligoo ooge mooyo bi tunetoyich shalligoon danebe. Neech beeto bullin bi qochiitaanona ariyoon ne hajjoo tuniibe. 8Biin oogiibe; neen oogiyemmone; manjii yeshe; oogoon neech deebemmone. 9Ne qellooch oogee gubbichoon kotiyemmone; gaawe qelli ukoonoo neech immemmone” iye.
10Ta bushoocho, ta waan ellebe; ta yibbaatoonoo waayebe; meeti yemeenoon kashoona beeyemmo neene. 11Shalligee gommon neech dojjito taane; kaame gommonoo neen yaabito taane. 12Ne shaꞌaa beegaata, ne shaaddo keppheyaachemmone; ne woccaa beegaatoo tepheyaachemmo neene. 13Neech ta dojjiton kashoona yeshe; gawukkiyaahine; gaawichi quyebe; ebi aroo neech kashoone. 14Gondeenaꞌochi kaattoo waan wotteyaahine; boonoshi gommona hammaahine. 15Aroochee wohe; aroonoo hammaahine; aroochee wotteree ne gommon yeshe. 16Ebi asheenaꞌo, gondoon boonoshi shuuno qayigaata, tokketoo boonoshin daamaanoone; ashoon tephii boonoshi dichoo qayigaata, geepphiroo boonoshin yeshaanoone. 17Axaaxee koshon maaheete; xuꞌee woyinee uyoonoo uchiyeete.
18Cadiqeenaꞌochi gommo areddee aabo bekkemmi wottoon, daakkii daakkii hammiibeeti yaaꞌeexi bekkoommone. 19Tunebaani gondeenaꞌochi gommo dunne manderoommone; amo boonoshin tephito gaata, ariyaaneenaꞌone.
20Ta bushoocho, ta yibbaatoon gaawichi ellebe; ta qaaro waanoo ne waamon gaꞌiibe. 21Eboshin ne aafoochee wokkiyaahine; ne mulloochoo kotiibe. 22Eboshi boonoshin danemmoyich kashoon, bi ashittino bullichoo diggoon immemminaꞌone. 23Kashee tunoo bi tunetoyich, bulli mooyoyee beshiiree ne mulloon quyebe. 24Xumme yibbaatoon ne waanee baye; kootee kootonoo ne waanee wokkiibe. 25Ne aafeenaꞌo kaachi ciineete; kaachiree aaf ciine. 26Ne baateenaꞌo kaame gommona shaaddebeete; ne gommo bulliyoo kaamemmone.#Hib. 12:13 27Yoocha qanna gettaahine; ne baatoon gondoochee wochibe.
Currently Selected:
Shaahiyoo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.