Shaahiyoo 3
3
Gurimaasheenaꞌoyich Icheti Ciico
1Ta bushoocho, ta dojjaa beeton batteyaahine; ta geteenaꞌon ne mullooch yeshe. 2Eboshiyoo kashee genjoonaa diggoonon neech immemminaꞌone. 3Shunoonaa gibeneyoona neyee wokkaaye; eboshin ne qettooch tifebe; ne mullee cilloochoo kooribe. 4Ebin ne tuniigaata, Doono Yeerinaa ashoonochi aafoochaa gidoonaa naadoonon danemmo neene.
5Ne ceeni mulloona Doono Yeerin gibenebe; ne qelli gaboona degeyaahine. 6Ne gommo bullina biin ariibe; biyoo ne gommon neech kaachemmone. 7Mullechon tuniiree neen wochi ciinnaahine; Doono Yeerin shate; gondoocheenoo wohe. 8Ebiyoo ne meenoyich wodoon, ne shaawushoyichoo kupphiyoon deebemmone. 9Ne hajjitona, ne maayoocheenoo qaabbii shaggitona Doono Yeerin oogiibe. 10Ebin ne tuniigaata, ne gotoo maayoona ceennemmone; ne woyinee goonooch woyinee uyo ceeni ufemmone.
11Ta bushoocho, Doono Yeerichi sheeroon hoxeyaahine; neen bi kaaree ciicciyooboo caammeyaahine. 12Nihoo bi shunniibeeti bushoon bi sheeroommon, Doono Yeeri bi shunnii beeton sheerii beetone.#Iyoob. 5:17; Hib. 12:5-6; Yaaꞌo. 3:19 13Shalligoon daneti, goommii deꞌonoo hajjiti asho diireetone. 14Ebiyoo birewoyee beshoon shimon daniibeeto, xalle aachoyee beshe gaacoon immiibeeto bi tunetoyichiye. 15Shalligoo ceelle inqoyee beshe aaxxoone; ne qaataabeeti mooyo bulliichee biinna tatemmo aalloone. 16Bi qanne kishooch eeni genjo beetone; bi yooche kishooch gaannoonaa oogoona beetone. 17Bi gommo emiree gommone; bi kaattoo bulliich diggoo beetone. 18Biin yechitinaꞌoyich kashoon immaabeeti mixiyoommone; biin tugetinaꞌo bulli diireyemminaꞌone.
19Doono Yeeri bi shalligoona showoon halliye;
bi gaboonoo shimaayeenaꞌon boonoshi xaaꞌooch manjiihe.
20Bi ariyoona aacinaꞌo ufeheete;
qubeenaꞌoo amiyon dichiyeete.
21Ta bushoocho, gaawe shalligoonaa gaawe gaboonon kupphii yeshe; eboshi ne aafoochee wokkaayeete. 22Eboshiyoo neech kashoon immemminaꞌone; qetteexi aachoonoo tunemminaꞌone. 23Aroochee ne gommon diggoona hammemmo neene; ne baatoo tepheyaachemmone. 24Ne tokketaa beegaata, shataachemmo neene; shaawi tokketoon tokketemmo neene. 25Diqqoona waabeeti naxoyich, woyee gondeenaꞌo toommooch shaggiibeeti aalloyich shattaahine. 26Doono Yeeri ne gibeno tuneree shaachoona yechoochee ne baatoon quyemmone.
27Neech bi hakkee beetaa, tuniiya ne bedoyich gaawe mooyon tuniyoon qajjaahine. 28Ne immemmo beetaa, ne giyoon “Hami wobe; yaach neech immemmo taane” gettaahine. 29Neen gibeneꞌi ne gaꞌooch koteti ne giyoo toommooch gondoon shuuneyaahine. 30Amoonolla neen hallaani ashoona ikke naboo aalloon kaareyaahine. 31Xuꞌechi ashoona qanaateyaahine; bi gommo aabinona dabbiyaahine. 32Doono Yeeri xumme ashoon ciigehe; tunebaani kaame ashoyich bi maaci mooyon gaxxii gettiye. 33Doono Yeerichi ufo gonde ashi kexoochiye; tunebaani cadiqoochi kexon diiriye. 34Coonechinaꞌon coonemmone; tunebaani boonoshi qelloon giishii beetinaꞌoyich wojjoon immemmone.#Yaaqo. 4:6; 1 Pheex. 5:5 35Mullechinaꞌo oogoon danemminaꞌone; tunebaani mullaalleenaꞌo cooneyemminaꞌone.
Currently Selected:
Shaahiyoo 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.