Shaahiyoo 5
5
Shunimaayee Waanee Woho
1Ta bushoocho, ta shalligoon ellebe; ne waamonoo ta gaboo waan gaꞌiibe. 2Ebiyoo gaawe gabecho ne tunemmonaa ne noonoo ariyoon bi yibbaatemmonoyichiye. 3Shunimaayee noonoochee eeyo cottii beetone; bi yibbaatoo zayitoyee beshe aniꞌoone. 4Tunebaani ciiroochaa ereetoochoommon caammemmine; gutte baddaa gayireeti goraadoommine. 5Bi baateenaꞌo qitooch kindii beetinaꞌone; bi shaaddeenaꞌo shiwerooch daammii beetinaꞌone. 6Kashee gommon aaxxiyaaneene; bi gommo xummoone; tunebaani ebi biich aricheyaanoone.
7And ta bushoocho, ellebe; ta noonoochee kechiibeeti qaaroyee wokkaahine. 8Ne gommon ebi ure waanee wokkiibe; bi kechi kellee gaꞌoona besheyaahine. 9Ebiyoo ne oogoon baroyich, ne eenonoo ariqqaalleenaꞌoyich beshiiree ne imaachemmoyichiye. 10Wottoo dallaaweenaꞌo ne gaannoona miyaachemmoyich, ne aajjetoo bare ashi kexooch bi giyaachemmoyichiye. 11Ciiroochaa ne meenonaa ne ashittinoona ciirehooba gaashillemmo neene. 12Ishichishoo gettemmo neene: “Aabichaꞌa sheeroon shixxehote? Ta mullo aabichiꞌi kaaree ciicon hoxehe? 13Ta dojjechinaꞌochi qaaroon waayeyaano taane; boonoshi ciico qannoo ta waamon gaꞌiyaano taane. 14Ebich iitoo kiceetoochaa waacha aallehote” gettemmo neene.
15Ne hajjee oppeexi aacon ne uyoommon, ne hajjee mecheen baach shune. 16Ne tuneenaꞌo gaddooch, ne aacinaꞌo addibaabooch ufo qaawiyaache. 17Neech baach tunebeetani neenna tookkii beeti dallaaweenaꞌoyich tunaayeete. 18Ne tunoo diireeto tunebe; ne bushittinee mecheena tookki emiribe. 19Shuchiyaabeeti doollechoommon, malletechi xiixxechoommon, bulli aaboon bi xano neen digaayiibe; bi shunoonoo bulli areddoon miye. 20Ta bushoocho, shunimaayeen ne shunnaabeeto amoyichiye? Bare ureen ne tiqqaabeeto amoyichiye? 21Doono Yeeri aafoochaa ashi gommo bulli xalla bekketone; biyoo ashi shaaddo bullin ciinnii beetone. 22Gonde ashoon bi axaaxoo kambe yechemmone; bi axaaxee woderoonoo gaadeyemmone; 23oogeti tuushoochee tiyitona muriccemmone; bi qelloon quyo qayoochee tiyitona qitemmone.
Currently Selected:
Shaahiyoo 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.