Shaahiyoo 13
13
1Mullechi bushoo bi nihoochi ciicoon waayehe;
tunebaani cooqqirecho sheeroon waayeyaache.
2Asho bi noonoochee kechiibeeti yibbaatoona, gaawe mooyon danemmone;
tunebaani dawushechinaꞌo xuꞌoon qaatiyeete.
3Bi noonoon quyemmo bi kashoon quyemmone;
bi noonoon gawukkimmo aallemmone.
4Yeexeroo oogichii bi qaatitaa, amoonolla daneyaache;
tunebaani kupphee shuuneebeeto michiye.
5Cadiqe asho kooton shixxiye;
tunebaani gonde ashi yibbaatoo yeellii cooniihe.
6Bi gommo kaamoo tuneti ashoon cadiqittino quyehe;
tunebaani axaaxechon bi axaaxoo dichiye.
7Gaannecho shaahi bekkeya ii beeto beete;
tunebaani amolla biich aalloone;
baroo wotta girechon shaahiibeeto beete;
tunebaani wodde gaannechone.
8Gaannecho bi gijjoona bi kashoon biishehe;
tunebaani girecho, amoyichona aaxxiyaache.
9Cadiqeenaꞌochi bekko gaawichii bekkehe;
tunebaani gondeenaꞌochi ceechoo tahiye.
10Geecoo yexooch bechiye;
tunebaani ciicoon deqqii beetinaꞌo mullechinaꞌone.
11Woddii aayaanoon daneti gijjoo kaate aallemmone;
tunebaani giishii giishii kiceeti gijjoo woddemmone.
12Gibeneeti mooyo yagigaata mullo ayiniye;
tunebaani qaatoo ceenigaata, kashoon emirikkiye.
13Ciicoon qallayiibeeto, bi toommooch iritoon deebiye;
tunebaani getoon oogiibeeto wojjoon danemmone.
14Mullechinaꞌo dojjiibeeti doyoo kashee tunoone;
asho qitee shaachoochee bi muriccemmoyich tuniihe.
15Ariyecho tuno ashoon gaawe aafoona ciichiihe;
tunebaani dawushechinaꞌochi gommo aallooch bechiye.
16Mullechi asheenaꞌo boonoshi ariyoona shuuneheete;
tunebaani mullaalleenaꞌo boonoshi tuushoon bekkiiheete.
17Gibeneyaani wocheyecho iritoon deebiye;
tunebaani gibeneeti wocheyecho wodoon deebiye.
18Kaaree ciicon shixxii beetinaꞌo toommooch giroonaa yeelloona shaggiye;
tunebaani sheeroon deqqiibeeto oogehe.
19Qaatoo ceenigaata, kasho emiriye;
tunebaani mullaalleenaꞌo gondoochee wottoon ciigeheete.
20Mullechinaꞌona tookkii shaꞌeebeeto, mullechon tunehe;
tunebaani mullaalleenaꞌona nuucheebeeto, gonde iritooch dihiye.
21Duꞌo axaaxechinaꞌon dabbiye;
tunebaani cadiqeenaꞌo gaawe gatiyoon daneheete.
22Deꞌe asho bi bushaa bushoyich bi gaannoon woraashiihe;
tunebaani axaaxechinaꞌochi gaannoon woraashemminaꞌo cadiqeenaꞌone.
23Girechochi goyo wodde maayoon shakkiihe;
tunebaani dayinnetee dabiyoochee tiyitona aallehe.
24Bi bushoon sheeraano bi bushoon shixxii beetone;
tunebaani bi bushoon shunniibeeto, kupphiiꞌi sheeriye.
25Cadiqo bi qettee wottoon maahe;
tunebaani gonde asho shaacaa beehe.
SIM International, 2020.