Shaahiyoo 12
12
1Kaaree ciicaa shuno, ariyoon shunone;
sheeroon shixo mullaallo tunoone.
2Doono Yeeri, gaawe ashoon gaawe aafoona ciinniye;
tunebaani gonde gabecho toommooch nalliye.
3Gondittino ashoon manjoo tuniyaache;
tunebaani cadiqeenaꞌo boonoshi xaaꞌoochee shuuraachemminaꞌone.
4Qoppechi maachee bi kenoyich gubbicheene;
tunebaani yeelliyaabeeti maachee, shaawushee daggeexi biiyoommine.
5Cadiqeenaꞌochi gaboo kaamoone;
tunebaani gondeenaꞌochi ciico dawushoone.
6Gondeenaꞌochi yibbaatoo ashoon wuxiibeeti olloone;
tunebaani kaameenaꞌochi yibbaatoo ashoon wodiihe.
7Gondeenaꞌo dihimmona, boonoshi dookoo dooggiye;
tunebaani cadiqeenaꞌochi shiijjeroo manjemmone.
8Asho bi ariyoona galleteehe;
tunebaani xumme gabechi asho hoxeehe.
9Koshon shaaceebee kokkinnii beetoyee,
bi qelloon giishiiꞌi bi qellich shuuneebeeto gaawiye.
10Cadiqo bi gijjee kashoyich ariqqehe;
tunebaani gonde ashi ariqqo, mullee manjoone.
11Bi showoon gochiibeeto koshon michemmone;
tunebaani gaacaalli mooyon dabbiibeeto qellaalloone.
12Gondeenaꞌochi qaatoo gonde mooyon tuniyoone;
tunebaani cadiqeenaꞌo gaawe aafoon aafeheete.
13Gonde asho gonde bi yibbaatoona yechehe;
tunebaani cadiqo iritoochee muricciye.
14Asho, bi yibbaatoochee tiyitona gaawe mooyon michiye;
bi kishee shuunoommonoo bi gatiyoon danehe.
15Tuushoyich bi gommo, bi aafoochaa kaamoone;
tunebaani mullecho ciicoon waayehe.
16Tuushoochi kaaro bekkech arichehe;
tunebaani accecho naagoon aaxxiyaache.
17Iberoon yibbaateebeeto, tate miixoon miixehe;
tunebaani koote miixoo kootoon koottiye.
18Diqqoona yibbaateeti yibbaatoo, goraadoochoommon mayiihe;
tunebaani mullechi ashi yibbaatoo wodiihe.
19Ibere heciyoo bulli yemeenoon manjii beehe;
tunebaani koote heciyoo yagaanoone.
20Gondoon gabii beetinaꞌochi mullooch maroo beetone;
tunebaani diggoon gabii beetinaꞌoyich emiroo beetone.
21Cadiqo toommooch gonde mooyo shagaache;
tunebaani gondeenaꞌoyich xuuxo woddehe.
22Doono Yeeri kooteenaꞌon ciigehe;
tunebaani ibere asheenaꞌona emiriye.
23Accecho bi ariyoon aachiye;
tunebaani mullaallo bi tuushoon bekkiihe.
24Kuppheꞌi shuuno doonjiihe;
tunebaani yeexerittino guuno tuniihe.
25Xuuxeebeeti mullo ayinoon deebiye;
tunebaani gaawe qaaro emiroon deebiye.
26Cadiqo bi nuuchoyich gaawe gommon bekkiihe;
tunebaani gondeenaꞌochi gommo, gondooch boonoshin daammiye.
27Yeexeroo dabbee bi deebitonona kiiyaache;
tunebaani kuppheꞌi shuuno ashoon gaanniihe.
28Cadiqittinee gommooch kasho beetone;
are gommooch qitoo aalloone.
SIM International, 2020.