Shaahiyoo 1
1
Shaahiyeenaꞌochi Gaaco
1Israꞌeelee taatoo, Daawitichi bushoo Solomoonichi shaahiyeenaꞌo:#1 Taat. 4:32
2Shaahiyeenaꞌo shalligoonaa gaawe ciicoonon danoyich, aacheeti mooyon yechiti yibbaatoon shalligoyich, 3cadiqoona, dayinnetoonaa kaamittinoona beemona ciicoon deqqiibeeti mulloon danoyichoo gaaccii beetinaꞌone. 4Ariyaaneenaꞌon accechinaꞌo, gurimaasheenaꞌon ariyechinaꞌonaa mullechinaꞌonon tuniiheete. 5Mullechi asheenaꞌo waayeree beshoon mullechinaꞌo boonoshi tunemmoyich, mooyon goommii deqqechinaꞌoo ariyoon aroochee boonoshi danemmoyich tuniiheete. 6Ebin tuniyoona, aacheeti shaahiyee mooyon, mullechi asheenaꞌochi yibbaatoonaa turitoonon asho ariyemmoyich tuniiheete.
Gurimaasheenaꞌoyich Icheti Ciico
7Doono Yeerin shato ariyee shiichoone; tunebaani tuusheenaꞌo shalligoonaa sheeroonon hoxeheete.#Iyoob. 28:28; Shod. 111:10; Shaah. 9:10
8Ta bushoocho, ne nihoochi ciicoon waayebe; ne indee dojjaa beetonoo qajjaahine. 9Ebiyoo ne qellooch oogoon immiibeeti gubbichoommon, ne qettoon malletiibeeti aachee zaaboommonoo tunemmone.
10Ta bushoocho, axaaxechinaꞌo neen dawushigaata, deꞌa gettaahine. 11“Ne waataa oti quyeree damoon ukkibone; naboo aalloon xalle ashoon gaappebone; 12maasho ashoon qooxoommon, kashoona boonoshi beetaa, boonoshin qooxone; oppooch boonoshi giyemmoyich tuniibone. 13Aaxxe baribare wodde qiicoon danemmo noone; no boggeti qiicoona no kexon ceechemmo noone; 14waaree ne ixoon noonna tookki tuniibe; boggaa no danemmi mooyon tookki qoodeyemmo noone” boonoshi getigaata, 15ta bushoocho, boonoshina tookki gommona hammaahine; boonoshi gommoochee wohe. 16Boonoshi baatoo axaaxooch woccii beetone; damee ukkoyichoo afaafinee beetinaꞌone. 17Kafoo ciinnii beetaa, shaachee shaachoo gaacaalloone. 18Ebi asheenaꞌo boonoshi ottiibeeto, boonoshi damee toommoochiye; boonoshi olleebeetoo boonoshi kashee toommoochiye. 19Bogona gaanneya qiicceebeeti asho bullichi ciiro ebine; ebiyoo bi doonochi kashoon aalliyoone.
Shalligee Ceeggaabeeti Tuno
20Shalligee, gommoochaa cookaa beetine; addibaaboochaa qaaroon oogichaꞌa bunnaa beetine. 21Asho dulliibeeti xaaꞌoochaa ceeggaa beetine; katemee gimi kelloochaanoo ishichaa yibbaatee beetine:#Shaah. 8:1-3
22“Mullaalleenaꞌote, mullee muccoon ittoshi shuni beeyemmo aati wottooniye? Cooqqirechinaꞌoo boonoshi cooqqiroona boonoshi emiri beeyemmo aati wottooniye? Tuusheenaꞌo ariyoon boonoshi shixi beeyemmo aati wottoniye? 23Ta ciicoon waayebe; ta ayaanoon ittoshich ukkemmi taane; ta qaaroonoo ittoshi ariyemmoyich tuniyemmi taane. 24Ta ceegiyooba waayemmon ittoshi qajjitoyich, ta kishoon ta yaggiyooba koniyoona aaxxiyoo bi qajjitoyich, 25ta ciico bullin ittoshi qallayitoyich, ta sheeroon deꞌo ittoshi qajjitoyich, 26tawoo ittoshi xuuxoona miiccemmi taane; keqqoo ittoshin yexiyooboo cooqqiremmi taane. 27Keqqoo ambamboochoommon ittoshin yexiyooba, xuuxo yubee yongoochoommon bi waahooba, xuuxoonaa iritoona ittoshi toommooch bi kindiyooba, ittoshin cooqqiremmi taane.
28“Ebiyooba taan ceeggemminaꞌone; tunebaani ta, wochaachemmi taane; kupphiiree taan qaawemminaꞌone; tunebaani taan daneyaachemminaꞌone. 29Ariyoon boonoshi shixxitoyich, Doono Yeerin shaton boonoshi qajjitoyich, 30ta ciicoon deꞌo boonoshi qajjitoyich, ta sheeroon boonoshi hoxetoyich, 31boonoshi shuunetoommo boonoshi toommooch shuuneyemmone; ashi toommooch boonoshi koceeto boonoshin yechemmone. 32Ariyoochee woho tuusheenaꞌon wuxemmone; beenecho tuno mullaalleenaꞌon aalliyemmone; 33tunebaani ta waanee ellemmo tooꞌiree kotemmone; amee keqqolla aalloon beeyemmone” iyane.
SIM International, 2020.