Haddoo 6
6
Naaziroo Tunee Doyoo
1Doono Yeeri Muusich ishichiye: 2“Israꞌeeleenaꞌoyich ishichibe: ‘Ikke asho, anaamo tuneba maachee Doono Yeerich bi qelloon bariiꞌi Naaziroo tunoyich bi mookkegaata, 3woyinee uyoonaa mashiibeeti uyoonoochee bi qelloon bariibe; woyinoochee woyee kashi uyoochee shuuneeti kiikkiti uyoon uchaaye; woyinee aafo hiicaa shuuneeti uyoon uchaaye; woyinee moochoon woyee shuuꞌon maayaaye. 4Bi qelloon bariiꞌi bi beeti aabo bulliich woyinee aafoon tuneba bi goroon, woyinoochee daneebeeti mooyo amoonolla maayaaye.
5“ ‘Bi qelloon bariyoyich bi mookketi aabo bulliich bi qellooch appoo shagaachemmone. Doono Yeerich bi bariti aabo ciyimmi wottoon yaafeeto tunemmone; bi qelli eexonoo dichemmone. 6Doono Yeerich bi qelloon bariiꞌi bi beeti aabo bulliich dubenee achooch shaggaaye. 7Doono Yeerich bi qelloon bi bariiti malletoo bi qellooch bi beetoyich, bi nihoo tuneba bi indee, bi manoo tuneba bi manee, qititaanona bi qelloon eeꞌiyaaye. 8Bi qelloon bi bariiti aabo bulliich Doono Yeerich yaafeetone.
9“ ‘Asho bi gaꞌoochaa diqqoona qitaa yaafeeti bi qelloon bi eeꞌiigaata, bi xalleebeeti aabooba, ebi geto shabaattinnee qemooba, bi qelloon cakkebe. 10Shimittinnee qemooba gutte daabbichoon woyee gutte uggee cobbelloon danee duukkaanee kellooch, qeeshoo waan deebe. 11Qeeshoo ikkoon axaaxee deejjoyich, wotta ohe ikkoon micciibeeti deejjoyich giddiibe; ebiyoo dubenee naboona bi eeꞌetoyich biin maariyemmone. Ebi arooba, wochinnoon Doono Yeerich bi qelloon yaafibe; 12Naaziroo tuneꞌi maddoyich wochinnoon bi qelloon Doono Yeerich bariibe; ikke nati bagee baaddoon xuꞌee deejjoyich deebe. Tunebaani bi Naazirittino eeꞌetoyich ebiyee aaf Naaziroo tuneebee bi echeti aabo biich haddeyaachemmone.
13“ ‘Illa bi bariti aabo ciirehooba, Naaziroochi qociyoo ebine: Danee duukkaanee kellooch gidderee, 14bi deejjoon Doono Yeerich giddiibe. Bachaalli ikke nati bagee baaddoon micciibeeti deejjoyich, bachaalli ikke nati gidere bageen axaaxee deejjoyich, bachaalli ikke ooge bagee baaddoon ikkittinee deejjoyich, 15shittoo giyaanoon kachiti ikke gemee koshon, ebiyoo zayitoona xirikketi qacini buddinoochee kachiti tagge koshon, shittoo giyaani, zayito huutteꞌi shishiitaa kachiti koshon, maayi buuroonaa uyee deejjoonon giddiibe. 16Qeeshoo eboshin axaaxee deejjoonaa micciibeeti deejjoonon tuniiree Doono Yeeri aafooch giddiibe. 17Ooge bagee baaddoon ikkittinee deejjoyich gemee toommeexi shittoo giyaani koshona tookki Doono Yeerich deejjemmone. Qeeshoo maayi buuroonaa uyee deejjoonon deejjemmone.
18“ ‘Naaziroo bi bariiti bi qelloon danee duukkaanee kelloochaa cakkebe. Are bi qelloon daamiree ikkittinee deejjoo micciibeeti qaaqqooch gede.
19“ ‘Naaziroo yaafeeti bi qelloon bi cakketoyee gubb, qeeshoo kiicheti bagee baaddoochi wochoon, wotta gemoochee shittoo giyaani ikke tagge koshonaa shittoo giyaani ikke shishe koshonon daamiree, Naaziroo kishooch yechiibe. 20Aroochee qeeshoo Doono Yeeri aafooch kaama tiijjaa giddeebeeti deejjoon tuniiree giddiibe; kaama tiijjeeti gaggimatoonaa deejjeeti galloona tookkii yaafeeto, qeeshoo qoodoo tunemmone; ebiyee gubb Naaziroo woyinee uyoon uyon hakkiye.
21“ ‘Mookkoon mookketi Naaziroochi qociyoo ebine. Tunebaani ikke Naaziroo ebi qociyoyee beshoon Doono Yeerich tuniyoyich bi mookkegaata, ebi aroon tuniyoo biich qaawiihe’ gete” iye.
Qeesheenaꞌochi Diiroo
22Doono Yeeri Muusich ishichiye: 23“Harooninaa bi bushiishoonon, ‘Israꞌeeleenaꞌon ittoshi diirii beegaata,
24“Doono Yeeri neen diiribe; neen quyebe;
25Doono Yeeri bire aafoona neen ciine;
neech ariqqebe;
26Doono Yeeri bi aafoon ne waan wochibe;
diggoon neech imbe” getote’ gete.
27“Ebina ta shigoon ceeggiꞌi Israꞌeeleenaꞌon boonoshi diirigaata, tawoo boonoshin diiremmo taane” iye.
Currently Selected:
Haddoo 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
