Haddoo 36
36
Kenoon Shaaggiti Maacheenaꞌochi Iristee Mooyo
1Yooseefi shiijjereenaꞌochi gumbeenaꞌo daggoochee, Minaasi bushoo Makirichi bushoo Gilaadichi gumbee yaree ukkireenaꞌo Muusinaa Israꞌeelee yoodeenaꞌochi yaree ukkireenaꞌona aafooch giddeꞌi, 2ishichiyeete: “Showoon Israꞌeeleenaꞌoyich iristo tunii ixoona qoodi ne immemmoyich Doono Yeeri no doono neech gettitone. Wottoo no manoo Tselofaadichi iristoon bi maache bushiisheenaꞌoyich ne immemmoyich Doono Yeeri no doono neech gettitone.#Had. 27:7 3Tunebaani Israꞌeeleenaꞌo daggoochee, no yoodoyee bare yoodoochee kenoon boonoshi shaagigaata boonoshi qoodoo no yaree iristoochee deꞌaa boonoshi shaaggimmi asheenaꞌo beeti yoodoyich daakkeyemmone. Ebi tunegaata, no ixee iristo shappemmone. 4Israꞌeeleenaꞌochi Yobeelee nato shagiyooba boonoshi iristo boonoshi shaaggiti asheenaꞌo beeti yoodee iristooch daakkeyemmone. Boonoshi iristo no yareenaꞌochi iristoochee dekkemmone” iyeete.
5Muusiyoo Doono Yeerichi qaaro gettii beetoommon, Israꞌeeleenaꞌoyich ishichiꞌi gettiye: “Yooseefi yoodeenaꞌo gettito tatoone. 6Tselofaadichi maache bushiishoon ciinnii beetona Doono Yeeri gettiibeeto ebiniye: ‘Boonoshi qaabbechinaꞌochi yoodoochee baach tunebaani boonoshi shunnimmon shaagon hakkiyeete. 7Ebina Israꞌeeleenaꞌochi iristo ikke yoodoochee barooch besheyaachemmone. Israꞌeeleenaꞌo boonoshi ikkikkoona boonoshi qaabbechinaꞌochi yoodee iristoona neexebeete. 8Israꞌeelee yoodo aabiicheenona iristoon woraashimmi maache bushee bi ikkikkoona bi qaabbechinaꞌochi yoodee gumboochee tuneti anaamon shaaguye. Ebina Israꞌeelee asho bi ikkikkoona bi yari yaroo waanee iristoon woraashemmone. 9Iristo ikke yoodoochee bare yoodooch besheyaachemmone. Israꞌeeleenaꞌochi yoodo bi ikkikkoona bi iristoona neexebe’ itone” iye.
10Tselofaadichi maache bushiisheenaꞌo Doono Yeeri Muusich gettitoommon tuniiheete. 11Tselofaadichi maache bushiisheenaꞌo Mahilaahi, Tiritsi, Hogili, Milikinaa Noohina boonoshi niheesheenaꞌochi bushiisheenaꞌon shaaggiyeete. 12Yooseefi bushoo Minaasi gumbee asheenaꞌoochee kenoon shaaggiyeete. Boonoshi iristo boonoshi qaabbechinaꞌochi yoodoyich manjiye.
13Yoordaanoosi aachi gashooch, Yaariki katemee ciinooch beeti Moꞌabi gaddooch boonoshi beetaa Doono Yeeri Muusina Israꞌeeleenaꞌoyich bi immiti geteenaꞌonaa doyeenaꞌona eboshine.
Currently Selected:
Haddoo 36: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
