Haddoo 1
1
Israꞌeeleenaꞌo Haddeyoo
1Israꞌeeleenaꞌo Gibitsee boonoshi kechitoyee gubb, guttinnee natooba, guttinnee agenee ikkinnee qemooba, Doono Yeeri Muusich Siini barahoochaa, danee duukkaanee daggoochaa ishichiꞌi gettiye: 2“Israꞌeeleenaꞌo bullin boonoshi gumbi gumboona, boonoshi qaabbechinaꞌo yari yaroona, boonoshi shigi shigee haddoommona, anaaminaꞌo bullin haddibote. 3Neennaa Haroonina hiye natonaa ebiyee damboona tuneti, ginooch hamoyich bedditi anaaminaꞌon, Israꞌeelee showoo bulliichee boonoshi kuxi kuxona haddibote. 4Yoodi yoodoochee, bi qaabbechi yaroochi ukkiroo tuneti ikke asho ittoshina tookki beebe. 5Ittoshin gaachemmi asheenaꞌo eboshine:
Roobeeli yoodoochee Sheduuri bushoo Elisuuri;
6Simooni yoodoochee Tsurishadayi bushoo Shelumeli;
7Yihudi yoodoochee Aminadaabi bushoo Nahishooni;
8Yisakoori yoodoochee Tsuꞌaari bushoo Netaaneli;
9Zebulooni yoodoochee Helooni bushoo Eliyaabi;
10Yooseefi bushiishoochee,
Efreemi yoodoochee Amihuudi bushoo Elishami;
Minaasi yoodoochee Fedatsuuri bushoo Gamaleeli;
11Biiniyaami yoodoochee Gideꞌooni bushoo Abidani;
12Daani yoodoochee Amishadaayi bushoo Ahezeeri;
13Aseeri yoodoochee Okiraani bushoo Fageeli;
14Gaadi yoodoochee Deweeli bushoo Eliyasaafinaa
15Nifitaali yoodoochee Enaani bushoo Ahiirinane” iye.
16Eboshiyoo iitee daggoochee kaachetinaꞌo, boonoshi qaabbechi yoodi yoodoon yaabii qeejjii beetinaꞌonaa Israꞌeelee yareenaꞌochi ukkireenaꞌonane.
17Muusinaa Haroonina ebi boonoshi shigoona ceekketi asheenaꞌon ceeggii daammiyeete. 18Guttinnee agenee ikkinnee qemooba, asho bullin ikkooch kiciyeete. Hiye natinaꞌonaa ebiyee dambeenaꞌona boonoshi gumbi gumboon, boonoshi qaabbechinaꞌo yari yaroonaa boonoshi shigi shigoonon ikkikkeꞌi, gettii kooreeheete. 19Doono Yeeri biich gettitoommon, Muusi Siini barahoochaa boonoshin haddiye.
20Israꞌeelichi gutenee bushoo Roobeeli yoodoochee, hiye natonaa ebiyee damboona tuneti, ginooch hamoyich bedditi anaamo bullichi shigo, bi shiijjeri shiijjeroona, bi gumbi gumboona, bi qaabbechinaꞌo yari yaroona bi qelli qelloona kooreehe. 21Roobeeli yoodoochee haddeeto, aabbaa shiritte humaa uuche balloone.
22Simooni yoodoochee, hiye natonaa ebiyee damboona tuneti, ginooch hamoyich bedditi anaamo bullichi shigo, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi qelli qelloona kooreehe. 23Simooni yoodoochee haddeeto, aachaa yiixiye humaa keejje balloone.
24Gaadi yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 25Gaadi yoodoochee haddeeto, aabbaa uuche humaa shiritte ballaa aachoone.
26Yihudi yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 27Yihudi yoodoochee haddeeto, shabaa awudde humaa shiritte balloone.
28Yisakoori yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 29Yisakoori yoodoochee haddeeto, aachaa awudde humaa awudde balloone.
30Zebulooni yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 31Zebulooni yoodoochee haddeeto, aachaa shabaatte humaa awudde balloone.
32Yooseefi bushiishoochee, Efreemi yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 33Efreemi yoodoochee haddeeto, aabbe humaa uuche balloone.
34Wotta Minaasi yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 35Minaasi yoodoochee haddeeto, shaashaa gutte humaa gutte balloone.
36Biiniyaami yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 37Biiniyaami yoodoochee haddeeto, shaashaa uuche humaa awudde balloone.
38Daani yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 39Daani yoodoochee haddeeto, shichaa gutte humaa shabaatte balloone.
40Aseeri yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 41Aseeri yoodoochee haddeeto, aabbaa ikke humaa uuche balloone.
42Nifitaali yoodoochee, hiye natonaa ebiyee damboona tuneti, ginooch hamoyich bedditi anaamo bulli, bi shiijjeri shiijjeroona, bi gumbi gumboona, bi qaabbechinaꞌo yari yaroona, bi shigi shigoona kooreehe. 43Nifitaali yoodoochee haddeeto, aachaa keejje humaa awudde balloone.
44Israꞌeeleenaꞌon yaabii qeejjiibeeti aaraa gutte asheenaꞌo boonoshin gaachetaa, Muusinaa Haroonina hadditinaꞌo eboshine. Ebi aaraa gutte asheenaꞌo boonoshi qaabbechinaꞌo yari yaroyich shaxeenaꞌone. 45Israꞌeelee asho bulliichee hiye natonaa ebiyee damboona tuneti, ginooch hamoyich bedditi anaaminaꞌo bulli, boonoshi qaabbechinaꞌo yari yaroona haddeeheete. 46Haddeeto bulla, shiritte ballaa keejje humaa uuche ballaa aachoone.
47Tunebaani Leweenaꞌo boonoshi qaabbecho yoodoona eboshina tookkii haddeyaaneenaꞌone. 48Ebiyoo Doono Yeeri Muusich bi ishichitoyichiye: 49“Lewi yoodoon haddiyaahine. Boonoshi haddoon Israꞌeeleenaꞌochona bacciyaahine. 50Tunebaani Leweenaꞌon miixee duukkaanoonaa bi qiico bullinochi, wotta arooch beeti mooyo bulli toommooch ukkiriibe. Danee duukkaanoonaa bi qiico bullinon shaageete; aroonoo quyebeete. Danee duukkaanee guudoona boonoshi kaamboon gedi kotebeete. 51Danee duukkaanoo tiyii beegaata, Leweenaꞌo waaxeete; bi xogee beegaatoo, xogibeete. Bare asho arooch bi katinigaata, qitibe. 52Israꞌeeleenaꞌo boonoshi duukkaanoon boonoshi kuxi kuxona xogibeete. Asho bi ikkikkoona bi kaambi kaamboonaa bi baanderi baanderoona kotebe. 53Tunebaani Israꞌeeleenaꞌo toommooch kaaree shiixxoo kindaachemmoyich, Leweenaꞌo miixee duukkaanee guudoona boonoshi duukkaanoon xogiree kotebeete; miixee duukkaanoonoo quyebeete” bi itoyichiye.
54Israꞌeeleenaꞌo Doono Yeeri Muusich gettitoommon tuniiꞌi ebi bullin tuniiheete.
Currently Selected:
Haddoo 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
