Naahoomi 3
3
1Damoon ukkoonaa kootona ceenneti,
bogona aricheti, kecceti wodde qiicoona ceenneti,
katemeyich woowo!
2Arengee xuupphi qaaro,
gaari gengeenaꞌochi qaaro,
hareshee galabee qaaroonaa,
quttiibeeti gaarichi qaaroona waayeehe.
3Hareshecho guubbiye;
goraado tiikkii, ginoo wacciye;
dofee asho qitiye;
dubeno guteehe;
asheenaꞌo ebi dubenoona tepheeheete.
4Nanawi katemee yahechi ureyoommi bi tunetoyich,
Doono Yeeri biin naxee beetone;
macecikkitonaa ashoon wuxiibeetona tuneti qaaxoona ceennetine;
bi qaaxoona aageteenaꞌon bi waan giddiyaꞌa,
bi guunon tuniihan.
5Beshe Mawe Doono Yeeri ishichiye:
“Ittoshi toommooch tiyeto taane;
ittoshi marixxoon kaama shootiree,
aageteenaꞌo ittoshi achoon beeggemmoyich tuniyoona,
ittoshin yeelliyemmo taane.
6Guudoon ne toommooch duppemmo taane;
neen hoxemmo taane;
neenoo cooniyemmo taane.
7Neen ciinnii beetinaꞌo ne waanee kishebee,
‘Nanawi tiishetine; biich eeppemmo konine?’ gettemminaꞌone.
Biin goggiyemmon amoochee danehote?” iye.
8Nanawi katemeene, ne, Abbaayi aachi gaꞌooch beeti, bi guudoona aaco beeti, baharo bi deebo, aacoo bi xaqqee uxeroo tuneti, Tebeesi katemeyee beshenne? 9Topphiyoonaa Gibitsee showoona ciiraalli bi giideenaꞌone; Fuuxee showoonaa Liibiyee showoona bi yeshechinaꞌone. 10Tunebaani Tebeesee asheenaꞌo kecaa hammiyeete; boonoshi showoochee kechiyeete; gommi addibaaboochaa, boonoshi gaggereenaꞌo ceqqetaa qitiyeete; aricheti boonoshi asheenaꞌo qoqqaannoona cucheheete; woraafa getteeti boonoshi asheenaꞌon ixoona qoodeeheete. 11Ittoshiyoo ebiyoommon, masheree shaaweyemmo ittoshine; ittoshi etteenaꞌo waanee aashe ittoshi wodemmi xaaꞌoon qaawemmo ittoshine.
12Ittoshi mishigeenaꞌo bulli, shuurikkigaata, ashi kookkooch holliibeeti, shiichii aafeti balaasee michi aafoomminaꞌone. 13Ittoshi ginee naayinaꞌo maacheyoomminaꞌone; ittoshi showooch giyeebeeti kelleenaꞌo, ittoshi etteenaꞌoyich gamichaa qecheetinaꞌone. Boonoshi tuggeenaꞌon qaaqqoo michii aalliitone.
14Ittoshi etteenaꞌo ittoshi katemoon giichii yechiyoobich, ittoshi uchemmi aacon kitote; ittoshi mishigoon manjiibote; nuuqqoo beetooch hamiree, dengoon kotebote; xuuboon shuunebote. 15Qaaqqoo ittoshin maayemmone; goraadoo ittoshin ciichemmone; gechoo maayoon aalliyoommon ittoshin aalliyemmone. Ittoshiyoo gechoo meetoommon meettito ittoshine. 16Shimaayooch beeti xojjeneenaꞌoyee beshoon, giixechinaꞌon ittoshi daggooch meechito ittoshine; tunebaani gechoo gaaxii aalliichii qoshoon yaggiꞌi biittii bi hamoommon hammitinaꞌone. 17Ittoshin quyechinaꞌo gechoommi meetinaꞌo, ittoshi taatoochi naayinaꞌo, showoo aqqehooba xaqqee uxerooch koteebeeti dofee gechoomminaꞌone; aabo kechimmona biittii hammiyeete; amooch boonoshi hammito gaata, koniyoona ariyaache.
18Asooree taatoocho, ne iraasheenaꞌo qititinaꞌone. Ne woraaferasheenaꞌo yacheetinaꞌone. Ne asheenaꞌo guudi toommooch shacetinaꞌone; boonoshin kicemmo koniyoona aalloone. 19Ne mayo wodaachemmone; oogeti tiishoon tiisheto neene; ashi toommooch ne tuniiti kuxeyaani gonde mooyoochee, muriccito koniyoona aallo bi tunetoyich, ne aallee woroon waayemmo bulli, emiroona kishoon koppemmone.
Currently Selected:
Naahoomi 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
