Yaasi 22
22
Aabi-keyo Waani Yoodeenaꞌo Wotto
1Ebiyooba Yaasi Roobeelinaa Gaadinochi yoodeenaꞌonaa Minaasi yoodoochee qatinaꞌonon ceeggiꞌi 2ishichiye: “Doono Yeeri guuno Muusi gettito bullin quyeto ittoshine; ta getteto bullinoo ceechito ittoshine.#Had. 32:20-32; Yaas. 1:12-15 3Ittoshi Nuggishoo Doono Yeerichi getoon manjiiꞌi quyeto ittoshine. Hanaach beddaahaa, ebi shaahe meeti aaboon, ittoshi maneenaꞌon dufaano ittoshine. 4Andoo ittoshi Nuggishoo Doono Yeeri boonoshich bi gibenikkiti gibenoommon, ittoshi maneenaꞌon kashiitone. Ebich Doono Yeeri guuno Muusi Yoordaanoosi aachee beqach ittoshich iristo tuniiꞌi bi immiti showooch beeti ittoshi kexooch wottebote. 5Ittoshi Nuggishoo Doono Yeerin ittoshi shunnemmoyich, bi gommo bullin ittoshi dabbemmoyich, bi getoon ittoshi ceechemmoyich, biin manjiiree ittoshi yechemmoyich, ebiyoommon ittoshi ceeni mulloonaa ittoshi ceeni kashoona biich ittoshi maddemmoyich, Doono Yeeri guuno Muusi ittoshich bi gettiti getoonaa sheeroonon quyoyich, ittoshi qelloon ariibote” iye.
6-8Yaasi daakkiꞌi boonoshich ishichiye: “Wodde gijjoon, ebiyoo oogeti meeti miimon, birewoonaa aachoonon, gooshoonaa xuuroonon, wodde tahoonoo yeshiree wottebote. No etteenaꞌo waanee daneti kecoon ittoshi maneenaꞌona tookki qoodeebote” iye. Aroochee boonoshin diiriꞌi daachiihe. Boonoshiyoo boonoshi kexooch wotteheete.
Muusi Minaasi yoodoochee qatinaꞌoyich Bashaanee showooch boonoshi hajjoo tuneti showoon immitone. Echeti qatinaꞌoyich wotta, Yaasi Yoordaanoosi aacoochaa aabi-gimo waani showoochee boonoshi maneenaꞌona tookkii boonoshi hajjoo tuniiꞌi immitone.
9Ebich Roobeelinaa Gaadinochi yoodeenaꞌo, ebiyoommon Minaasi yoodoochee qatinaꞌo Kanaanee showooch beeti Shiloohi katemoochaa Israꞌeeleenaꞌo waanee bariꞌi, Doono Yeeri Muusina bi gettitoommon, boonoshi kochii yechiti, boonoshi hajjoo tuneti showoo Gilaad wotteheete.
Yoordaanoosi Gashooch Shuuneeti Deejjee Gudo
10Roobeelinaa Gaadinochi yoodeenaꞌonaa Minaasi yoodoochee qatinaꞌona wotteebee, Kanaanee showoo waan beeti Yoordaanoosi aachi gaꞌooch beeti xaaꞌooch shaggiꞌi, are aachi gashooch ikke ooge deejjee gudoon shuuneheete. 11Roobeelinaa Gaadinochi yoodeenaꞌo, Minaasi yoodoochee qatinaꞌoo Israꞌeeleenaꞌo showoo tuneti, Kanaanee showee daarooch, Yoordaanoosi aachi gashooch, deejjee gudoon boonoshi shuunoon echeti Israꞌeeleenaꞌo waayeheete. 12Ebich boonoshin kocha, Israꞌeeleenaꞌo bulli Shilooha kiceeheete.
13-14Arooba Israꞌeeleenaꞌo qeeshoo Elazaari bushoo Finihaasinaa ikkikke Israꞌeelee yoodoochee kaacheti aashire iraasheenaꞌonon Gilaadee showooch beeti Roobeelinaa Gaadinochi yoodeenaꞌonaa Minaasi yoodoochee qatinaꞌona waan wochee daachiiheete. Ebi aashire yoodee iraasheenaꞌo boonoshi yari yaree daggooch aricheti asheenaꞌone.
15Eboshiyoo Gilaadee showooch beeti Roobeelinaa Gaadinochi yoodeenaꞌonaa Minaasi yoodoochee qatinaꞌona waan hammii shaggiꞌi, boonoshich ishichiyeete: 16“Doono Yeerichi asho bulli ishichii beetone: Ebi shaahoon Israꞌeelee Nuggishoyich gibeneyoon ittoshi qajjito amoyichiye? Doono Yeerin dabboochee gubb ittoshi wotteto, amoyichiye? Aabichiꞌi hanaach Doono Yeeri toommooch hukkoon shuuneꞌi, ittoshi qellich deejjee gudoon shuunehote?#Yibba. 12:13-14 17Doono Yeeri bi asheenaꞌon naxoona bi yexxemmoyich tuniiti, Feꞌoori guudoochaa no shuuneti axaaxoo bedaache? Ebi are axaaxoochee hanaach beddaahaa xalleyaano noone.#Had. 25:1-9 18Ittoshi andoo Doono Yeerichi gommon dabboochee gubb wotteeniye ittoshi beeto? Hanaach Doono Yeeri toommooch hukkoon ittoshi shuunegaata, bi wotta yaach Israꞌeeleenaꞌo bulli toommooch bi kaaroon kindiyemmone. 19Ittoshich icheti showoo eeꞌeto tunegaata, Doono Yeerichi yaafee duukkaanoo xoggeeti Doono Yeerichi showooch waaree, no daggooch, no showoochee qoodeebote. Tunebaani no Nuggishoo Doono Yeerichi deejjee gudoyee besh bare deejjee gudoon shuunoona Doono Yeeri toommooch hukkoon shuuneyaahote; noonoo hukkechon tuniyaahote. 20Zaari kechi asheenaꞌoochee ikkoo tuneti Akaani Yeerich gibeneyoon qajjiꞌi, timeeti mooyon bi daammitoyich, Israꞌeeleenaꞌo bulli toommooch Yeerichi naxo kinditone. Bi shuuneti axaaxoyich qitito, bi ikkeeto baach toonoone” iyeete.#Yaas. 7:1-26
21Aroochee Roobeelinaa Gaadinochi yoodeenaꞌonaa Minaasi yoodoochee qatinaꞌona Israꞌeelee yoodee yaree ukkireenaꞌoyich ishichiyeete: 22“Giidechi Nuggishoo, Doono Yeeri beege! Giidechi Nuggishoo, Doono Yeeri beege! Aroo arii beetone. Israꞌeeleenaꞌoo ebin ariibeete. Ebin no tuniito, hukkoona woyee Doono Yeerich gibeneyee qayona bi tunegaata, hanaach noon maariyaahote. 23Deejjee gudoon no shuuneto, Doono Yeerin dabboochee gubb wotteree, micciibeeti deejjoonaa maayi buuroonon giddiyoyich woyee ikkittinee deejjoon deejjoyich bi tunegaata, Doono Yeeri bi qelloona no toommooch nallibe.
24“No, ebin no tuniito, gubbich ittoshi shiijjereenaꞌo no shiijjereenaꞌoyich, ‘Israꞌeelee Nuggishoo Doono Yeerina tookkii amee yesho ittoshich beete? 25Roobeelinaa Gaadinochi shiijjereenaꞌote, Doono Yeeri Yoordaanoosi aacon no gutte daggooch danoon tuniiꞌi bi gedditoyich, Doono Yeer waanee qoodoo ittoshich aalloone’ getona, ittoshi shiijjereenaꞌo no shiijjereenaꞌon Doono Yeerin boonoshi shataachemmon tuniyemminaꞌone, iyaꞌa no shattetoyichiye. 26Ebich deejjee gudoon shuunehone; tunebaani ebi deejjee gudoon no shuuneto, micciibeeti deejjoon woyee bare deejjoon giddiyoyich toonoone. 27No, ebi deejjee gudoon no shuuneto, Doono Yeerichi yaafee duukkaanee aafoochaa biich goyinneebee, micciibeeti deejjoonaa bare deejjoonon, ebiyoommon ikkittinee deejjoon giddiibee no beemoyich, noonnaa ittoshina daggooch malletoo bi tunemmoyichiye; wotta gubbi no shiijjereenaꞌoyich miixoo bi tunemmoyichiye. Ebiyoo gubbi ittoshi shiijjereenaꞌo no shiijjereenaꞌon ‘Doono Yeer waanee qoodoo ittoshich aalloone’ geton boonoshi hakkaachemmoyichiye.
28“Nooch tuneba gubbi no shiijjereenaꞌoyich ebin boonoshi getigaata, ‘Ebi no niheenaꞌo shuuneti Doono Yeerichi deejjee gudoommi deejjee gudoon ciinote. Ebi aroon boonoshi shuuneto, noonnaa ittoshina daggooch miixoo bi tunemmoyichani, micciibeeti deejjoon woyee bare deejjoon giddiyoyich toonoone’ getiree wochemmo noone.
29“Bi yaafee duukkaanee aafooch beeti, no Nuggishoo Doono Yeerichi deejjee gudoyee baroon micciibeeti deejjoyich woyee maayi buuroyich woyee bare deejjoon giddiyoyich tunemmi deejjee gudoon shuuneree hanaach Doono Yeeri toommooch hukkoon shuuno, biin dabboocheenoo wotto no waanee wohe” iyeete.
30Qeeshoo Finihaasinaa biinna tookkii beeti, aashire yoodee iraasheenaꞌona, eboshiyoo Israꞌeelee yoodee yaree ukkireenaꞌo Roobeeli, Gaadinaa Minaasinochi yoodee asheenaꞌo gettiton boonoshi waayehooba, emiriyeete. 31Qeeshoo Elazaari bushoo Finihaasiyoo Roobeeli, Gaadinaa Minaasinochi yoodeenaꞌoyich “Ebi mooyona Doono Yeeri toommooch hukkoon shuuneyaano ittoshi tunetoyich, Doono Yeeri noonna tookkii bi tunoon hanaach ariito noone; Israꞌeeleenaꞌon Doono Yeeri kaaroochee wodiito ittoshine” iyeete.
32Aroochee qeeshoo Elazaari bushoo Finihaasinaa Israꞌeelee iraasheenaꞌona Roobeelinaa Gaadinochi yoodeenaꞌo waanee, Gilaadee showoochee Kanaanee showooch wotteꞌi, tuneti mooyon Israꞌeeleenaꞌoyich gettiyeete. 33Israꞌeeleenaꞌo ishin waayee emiriꞌi, Yeerin galleteheete; Roobeelinaa Gaadinochi yoodeenaꞌo beeti showoon ginoona kochii aalliyoyich hammi mooyon wochinnoon tiijjaaneenaꞌone.
34Roobeelinaa Gaadinochi yoodeenaꞌoo, “Ebi deejjee gudo no bullich Doono Yeeri Nuggishoo bi tunee miixoone” iꞌi, deejjee gudoon Miixoo ii shigiiheete.
Currently Selected:
Yaasi 22: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
