Woraaferasheenaꞌo 8
8
Israꞌeeleenaꞌo Miidiyameenaꞌon Ciirooch Beddaahaa Kochii Wochoo
1Aroochee Efreemi yoodo Geediyoonin, “Ebi no toommooch ne tuniiti mooyo amoone? Miidiyameenaꞌon koyoyich ne hammehooba, noon ceegon ne qajjeto, amoyichiye?” iyeete. Kupphiiꞌinoo biinna kaareheete.
2Tunebaani Geediyooni boonoshich wochiꞌi, “Ta tuniitoyee ittoshi tuniito beshaache? Efreemi butteti woyinee butto Abezeeri macii giijjitoyee beshaache? 3Yeeri Miidiyamee iraasheenaꞌo Oreebinaa Zeebinon ittoshi kishooch beshiiꞌi immitone. Ebina tookkii bi tacheegaata, ta tuniiti mooyi am beddaane?” iye. Ebin bi gettimmona, boonoshiyoo tooqqiꞌi kaaroon qajjiyeete.
4Geediyooninaa biinna tookkii beeti keejje balle asheenaꞌona Yoordaanoos shaggiꞌi, aacon kimmiyeete. Boonoshi maraatetaanona, andoo ebi ettoon yookkii dabbiiniye boonoshi beeto. 5Sukoot shaggiꞌi, are katemeexi asheenaꞌon, “Miidiyamee taateenaꞌo Zebaahinaa Tsalmuninon yookkaa dabbaa ta beetaa, taan dabbiti ta asheenaꞌo maraatetoyich, koshon boonoshich imbote” iꞌi qollehe.
6Tunebaani Sukooti katemee iraasheenaꞌo wochiꞌi, “Ne ginee naayinaꞌoyich koshon no immemmoyich, Zebaahinaa Tsalmunina ne kishooch dihiteete?” iyeete.
7Geediyooniyoo “Eke tunebe; Doono Yeeri Zebaahinaa Tsalmuninon ta kishooch beshiiꞌi bi imiyooba, ta ittoshi qeddoon barahee angixonaa guccinona gaxxemmo taane” iye.
8Aroochee Phiniꞌeel shaggiꞌi, are katemeexi asheenaꞌoyich ebiyoommon gettiye. Phiniꞌeeli asheenaꞌo wotta Sukooti asheenaꞌo wochitoommon biich wochiyeete. 9Biyoo Phiniꞌeeli asheenaꞌoyich “Diggoona ta wottehooba, hini xaqqee dilaaloon happemmo taane” iye.
10Areegaata, Zebaahinaa Tsalmunina aaraa uuche hume boonoshi ginee naayinaꞌona tookkii Qariqoori katemoochiye boonoshi beeto. Eboshi baachiye aabi-keyo waanee waati asheenaꞌo bulli daggoochee echetinaꞌo. Goraadoon cuyeebeeti balli hiye hume asheenaꞌo qititinaꞌone. 11Aroochee Geediyooni tiyii, Nobaahinaa Yogibaahinoochaa aabi-keyo waan beeti, wodde gommechinaꞌo ikkottee hammiibeeti gommona hammiꞌi, diqqeꞌi boonoshi beetaa boonoshin kochiye. 12Ebi gutte Miidiyamee taateenaꞌo Zebaahinaa Tsalmunina woccii aalleheete. Tunebaani Geediyooni yookkii dabbiꞌi boonoshin yechiye; boonoshi ginee naayinaꞌonoo keqqoona betiihe.
13Aroochee Yoꞌaashi bushoo Geediyooni Hereesi deshee dambee kaattoona koyoochee wotteebee, 14Sukooti katemee asho tuneti ikke gurimaashoon yechiꞌi bi echetaa, shabaa shabaatte Sukooti katemee iraasheenaꞌonaa showee geeneenaꞌonochi shigoon biich koorii immiye. 15Geediyooni Sukooti asheenaꞌo waan waaꞌi, “ ‘Maraateti ne asheenaꞌoyich koshon no immemmoyich Zebaahinaa Tsalmunina ne kishooch dihiteeta?’ getona ta toommooch ittoshi cooqqiriti Zebaahinaa Tsalmunina eboshiyoche” iye. 16Biyoo are katemeexi iraasheenaꞌo woyemmoyich tuniihe; barahee angixonaa guccinonon deebiꞌi boonoshin sheeriye. 17Ebiyoommon wotta Phiniꞌeeli katemee xaqqee dilaaloon happiye; are katemeexi anaaminaꞌon wuxiye.
18Aroochee Geediyooni Zebaahinaa Tsalmuninon “Taaboori guudoochaa ittoshi wuxiti asheenaꞌo, am shaaheenaꞌone?” iꞌi echehe.
Boonoshiyoo “Boonoshi bulliyona neen shaaheenaꞌone; taatoochi bushiishoonoo shaaheenaꞌone” iyeete.
19Geediyooniyoo “Boonoshi ta maneenaꞌo, ta indeechi bushiisheenaꞌone. Beeyechi Doono Yeeri beege; boonoshin ittoshi wuxaanigaata, tawoo ittoshin wuxaachesho taane” iye. 20Aroochee bi gutenee bushoo Yeteerin “Tiyiree eboshin wuxibe” iye. Tunebaani Yeteeri batt bushoo bi tunetoyich, shattiꞌi goraadoon kaaccemmon qajjiye.
21Aroochee Zebaahinaa Tsalmunina Geediyoonich “ ‘Ashi giidoo bi anaamittinoommone;’ ne tiyiree noon wuxibe” iyeete. Geediyooniyoo tiyiꞌi Zebaahinaa Tsalmuninon wuxiye. Boonoshi gaaleenaꞌo qettooch tippeꞌi beeti shashoon kichii deqqiye.
Geediyooni Efoodoon Shuuno
22Ebiyee gubb, Israꞌeeleenaꞌo Geediyoonin “Miidiyameenaꞌo kishoochee noon wodiito neene; ebich ne, ne bushoonaa ne bushaa bushoona noon hajjibote” iyeete.
23Tunebaani Geediyooni boonoshich “Ta ittoshin hajjaache; ta bushoo ittoshin hajjaache. Ittoshin hajjemmo, Doono Yeerine” iye.
24Biyoo boonoshin “Eke ikke mooyon ittoshi waanee qollebona; kecoochee ittoshi daneti, ittoshi ikkikkoochi aachee koliboon taach imbote” iye. Ebiyoo aachee koliboon gedo Ishmaꞌeeleenaꞌochi doyoo bi tunetoyichiye.
25Boonoshiyoo wochiꞌi, “Emiroona neech immemmo noone” iyeete. Tahoon arooch yaggiyeete. Asheenaꞌo boonoshi ikkikkoona kecoochee boonoshi daneti koliboon deebii arooch duppiyeete. 26Geediyooni echetaa biich icheti aachee koliboo humaa shabaatte balle sheqeelee aachoone. Ebiyoo baribare qiiceenaꞌon, qetteexi aachoon, Miidiyamee taateenaꞌo taheebeeti damere tahoonaa boonoshi gaaleenaꞌo qettooch boonoshi tippiibeeti shashoonon gedaanooniye. 27Geediyooniyoo ebi are aachoochee efoodoon shuuneꞌi, bi katemoo tuneti Ofira kotiihe. Israꞌeeleenaꞌo bulli Yeerin qajjiichii, ebi aroyich hammii goyinneheete. Ebi efoodo Geediyooninaa bi kechi asheenaꞌonoyich olloon tunehe.
28Ebina Miidiyameenaꞌo Israꞌeeleenaꞌo aafooch giisheheete. Illa ebiyee aafichoommon qettimixon kaachoon hakkaaneenaꞌone. Geediyooni kashoona beeti yemeenoon showoo aabbe nati wottoon kashehe.
Geediyooni Qitoo
29Yoꞌaashi bushoo Yerubaꞌali bi kexooch wottee hammiꞌi arooch kotehe. 30Geediyooni meeti mecheenaꞌon bi shaaggitoyich, shabe bushiisheenaꞌo biich shiijjetinaꞌone. 31Shekeem beeti bi naamacheyoo wotta anaami bushoon biich shiyaa, Abimeleeki iꞌi shigiitone. 32Yoꞌaashi bushoo Geediyooni geenee baayee qitiꞌi Abezeerichi yareenaꞌo beeti showooch, Ofira, bi nihoochi maashooch duukkehe.
33Geediyooni qitii yagaan beetaa Israꞌeeleenaꞌo Yeerich gibeneyoon qajjiꞌi wochinnoon Baꞌaaleenaꞌoyich goyinnooch giyiyeete; Baꞌaal Beriitinoo boonoshi nuggishoon tuniiheete. 34Boonoshi guudoona beeti boonoshi etteenaꞌo kishoochee boonoshin shiwee wodiiti boonoshi Nuggishoo Doono Yeerin shalligaaneenaꞌone. 35Ebiyoommon wotta Yerubaꞌali getteeti Geediyooni boonoshich bi tuniiti gaawe mooyo bullich bi kechi asheenaꞌoyich deꞌe mooyon tuniyaaneenaꞌone.
Currently Selected:
Woraaferasheenaꞌo 8: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
