Woraaferasheenaꞌo 7
7
Geediyooni Miidiyameenaꞌon Kochii Wochoo
1Yerubaꞌali getteeti Geediyooninaa biinna tookkii beeti asheenaꞌo bullina maaddoona tiyii hammii, Haroodi aachi xuuphee gaꞌooch kaamboon geddiꞌi koteheete. Miidiyameenaꞌo kaamboon geddiꞌi koteti xaaꞌoo beeto, boonoshiyee dambi-waan, Mooreehi geppee gaꞌooch beeti bamboochiye.
2Doono Yeeri Geediyoonich ishichiye: “Neenna tookkii beeti asho meettitone. Israꞌeeleenaꞌo ‘No hajjee giidoonane no wodito’ getiree ta toommooch boonoshi geecaachemmoyich, Miidiyameenaꞌon boonoshi kishooch beshiiree imaachemmo taane. 3And illa ‘Shattii keqqito bi beegaata, Gilaadi geppoochee bi kexooch wottebe’ getiree asheenaꞌoyich awaajjibe” iye.#Yibba. 20:8 Ebich asheenaꞌo daggoochee hiyaa gutte humeenaꞌo wotteechaa, aashire humeenaꞌo baach echeheete.
4Aroochee Doono Yeeri Geediyoonich ishichiye: “Andoo asho meettitone. Boonoshin aacooch yeshiree hambe; aroochaa ta boonoshin baribara qoodemmo taane. Tawoo ‘Ebi neenna tookki hambe’ ta immo, aroo neenna tookki hammemmone. Tunebaani ‘Ebi neenna tookki hammaaye’ ta immo, aroo neenna tookki hamaachemmone” iye.
5Ebina Geediyooni asheenaꞌon dugilla aacooch daammiye. Doono Yeeriyoo Geediyoonich “Kunaanoo bi heciyoona gawucoommon aacon boonoshi heciyoona gawuccii uchii beetinaꞌon, guteneechii uchii beetinaꞌoyee bariibe” iye. 6Ebina boonoshi kishee koppoona aacon oobbii boonoshi noonooch giddiiꞌi boonoshi heciyoona gawuccii uchitinaꞌo keejje balleenaꞌo tuneheete. Tunebaani echetinaꞌo bulli aacon uyoyich guteneheete.
7Doono Yeeriyoo Geediyoonich ishichiye: “Aacon kishoona oobbii gawuccii uchiti, ebi keejje balle asheenaꞌona ittoshin wodiyemmo taane; Miidiyameenaꞌonoo ittoshi kishooch beshii immemmo taane. Ebich echeti asheenaꞌon boonoshi kexooch wochi daachiibe” iye. 8Geediyooni keejje balleenaꞌon baach bi waan echiichii, echeti Israꞌeeleenaꞌon boonoshi kexi kexooch boonoshi wottemmoyich tuniihe. Bi waan echeti asheenaꞌo shohoonaa tiroonon ebi wotteti asheenaꞌo waanee deqqiyeete.
Miidiyameenaꞌo kaamboon geddiꞌi koteti xaaꞌoo beeto, boonoshi baata beeti bamboochiye. 9Aroobee xum Doono Yeeri Geediyoonich ishichiye: “Kaamboon geddiꞌi boonoshi beeti xaaꞌooch tiyi hamiree koye. Tawoo boonoshin ne kishooch beshiyaꞌa immeto taane. 10Tunebaani hammiꞌi koyon ne shatigaata, ne naayo Furaahina tookki boonoshi kaambooch hambe. 11Aroochaa boonoshi yibbaatoon waayemmo neene. Ebiyee gubb, are kaambo beetooch hammii koyoyich ne mochoo kupphemmone” iye. Ebich Geediyooni bi naayo Furaahina tookkii ginee naayinaꞌochi kaambee gocooch hammiye. 12Gechoommon dofeenaꞌo tuneti Miidiyameenaꞌo, Amaleeqeenaꞌonaa aabi-keyo waani asheenaꞌo bullina are bambooch beetinaꞌone. Boonoshi gaaleenaꞌochi haddoo baharee gasheexi qacoochoommon haddaa ciyaanoone.
13Geediyooni arooch bi shaggaahaa, ikke uro bi nuuchoyich bi gummiti gumon maaccii beehe. Biyoo “Gumona ta beeggaa beetaa, ikke xekee sheqee kosho Miidiyameenaꞌo kaambooch gederee kindiye; kindiꞌi duukkaanoon yexxiye; duukkaanoo gugummii dihiye” iye.
14Bi nuuchoo wochiꞌi, “Ebi mooyo Israꞌeelee asho tuneti, Yoꞌaashi bushoo Geediyoonichi goraadoani bare mooyo toonoone. Yeeri Miidiyameenaꞌonaa boonoshi ginee naayinaꞌo bullinon bi kishooch beshiiꞌi immitone” iye.
15Geediyooniyoo ebi gumonaa bi biishonon waayeꞌi, Doono Yeerich goyinnehe. Israꞌeeleenaꞌochi kaambooch wotteꞌi, “Tibote! Doono Yeeri Miidiyameenaꞌochi ginee naayinaꞌon ittoshi kishooch beshiiꞌi immitone” iye. 16Keejje balle asheenaꞌonoo keejj beera qoodiye; asheenaꞌo boonoshi ikkikkoona tiroon, wotta ceechoo bi daggooch geddeti qulloon boonoshi yechemmoyich tuniihe.
17Boonoshichoo ishichiye: “Asheenaꞌochi kaambee gocooch ta shaggetoyee gubb, ta waan manjii ciiniree, ta tuniyaa beetoommon tuniibote. 18Taannaa taanna tookkii beetinaꞌona tiroon no hugigaata, ittoshiyoo kaambee guudo bulliichaa tiroon hugibee, ‘Doono Yeerinaa Geediyooninoyich’ getibee cookibote” iye.
19Ebina Geediyooninaa biinna tookkii beeti balle asheenaꞌona xumee gutte qellimoo shagoyee shiichiꞌi, quyechinaꞌo quyee kaalloon boonoshi deqqiti katinooch, hammii ebi asheenaꞌochi kaambee gocooch shaggiyeete. Boonoshiyoo tiroon huggiyeete; boonoshi kishi kishooch beeti qulloon tiichiyeete. 20Ebi keejje kaattoona waati asheenaꞌo bulli tiroon huggiyeete; qulloonoo tiichiyeete. Boonoshi yooche kishoona ceechoon, boonoshi qanne kishoonoo tiroon yechiꞌi huggiibee, “Doono Yeerinaa Geediyooninoyich koyeebeeti koyo!” iꞌi cookiyeete. 21Boonoshi bulliyoo ebi boonoshi neexeti, kaambee guudoona beeti xaaꞌooch neexeꞌi beetaa, boonoshi etteenaꞌochi ginee naayinaꞌo cookiibee wocee aalleheete.
22Keejje balle tiroon boonoshi huggimmona, Doono Yeeri ebi etteenaꞌo boonoshinaa boonoshina wochiree goraadoona koye boonoshi ciiremmoyich tuniihe. Ebi ginee naayinaꞌo Tsereree showoo waan beeti, Beet Shixaaha beddaahaa, Xabaati katemee gaꞌooch beeti Abeel Meholi katemee gocooch beddaahaanoo wocciyeete. 23Israꞌeeleenaꞌo Nifitaali, Aseerinaa Minaasinochi yoodeenaꞌo showoo bulliichee ceegaa waaꞌi, Miidiyameenaꞌon yookkii dabbiyeete.
24Geediyooniyoo geppechi Efreemee showoo bulliich wochoon daachiiꞌi, “Dugilla waaree Miidiyameenaꞌon koyote; aacon boonoshi kimaachemmoyich, Beet Baari katemooch beddaahaa beeti, Yoordaanoosi aachi kimeenaꞌo bullin yeshote” iye. Ebina Efreemi yoodo ceegaa waaꞌi, Beet Baari katemooch beddaahaa beeti aachi kimeenaꞌon yechiye. 25Gutte Miidiyamee iraasheenaꞌo Oreebinaa Zeebinon yechiyeete. Boonoshiyoo Oreebin Oreebichi xaqqoochaa, Zeebinoo Zeebichi woyinee hiicci oppoochaa wuxiyeete. Aroochee Miidiyameenaꞌon yookkii dabbiibee Oreebinaa Zeebinochi qelloon Yoordaanoosi aachee beqach beeti Geediyoonich deebiyeete.
Currently Selected:
Woraaferasheenaꞌo 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
