Woraaferasheenaꞌo 15
15
Filsixeemeenaꞌo Toommooch Samsooni Nichoon Kichoo
1Giisheche aabo beshetoyee gubb, teepphee qeci goorooch, Samsooni ikke emmishee bushoon yechiꞌi bi mecheen beegga hammiye. Biyoo “Ta mechee beetooch gibona” iye. Tunebaani busheechi nihoo bi giyemmoyich daaggaanoone.
2Busheechi nihoo Samsoonich “ ‘Biin ciroona shixxeto neene’ iyaa gabaꞌa, ne miyaatoyich immeto taane. Tunebaani bi guuche manee biyee beshe mallet gaaweene. Biin shaage” iye.
3Samsooniyoo “Illa ebiyee damba Filsixeemeenaꞌo toommooch ta tuniimmi mooyoyich ta echeyaachemmo taane” iye. 4Aroochee kechii hammiꞌi, keejje balle boqqelleenaꞌon yechiye. Ebi boqqelleenaꞌon gutti guttoon ceeroona ikkooch xaaqqiꞌi cuchiye. Ikkooch tuucceti kakkoon daammiꞌi guttoo ikkooch xaaqqeeti boqqelleenaꞌo ceerooch cuchiye. 5Ebi kakkooch qaaqqoon ceechii geddiꞌi, Filsixeemeenaꞌo maayi daggooch gashehe. Qaaqqoo batti qecceyaani maayoonaa qecceetonon michiye; wotta zayitee mixonaa woyinee qomboonon michiye.
6Filsixeemeenaꞌo “Ebin tuniito, konine?” iꞌi echeheete. Boonoshiyoo ebin tuniito Samsooni tunoon, ebiyoo Timinaahi asho tuneti bi abboo bi mecheen daammii bi miyaatoyich bi shaakkiitoyich tunoonoo ariiheete. Ebina Filsixeemeenaꞌo hammii, ureenaa bi nihoonon qaaqqoona goggii wuxiyeete.
7Samsooniyoo “Ittoshi ebin tuniito ittoshine; illa ittoshi toommooch nichoon kichaanoon kasheyaache” iꞌi wogehe. 8Biyoo boonoshin billbillayii yexxiꞌi meeti asheenaꞌon wuxiye. Aroochee dugilla hammiꞌi, Exaami xaqqee goggini daggooch kotehe.
Filsixeemeenaꞌon Samsooni Kochii Wochoo
9Aroochee Filsixeemeenaꞌo waa Yihudee showooch kaamboon geddiꞌi koteechii, Lehi katemoon kochiyeete. 10Yihudee asheenaꞌo boonoshin “Noon ittoshi kochiibeeto, amoyichiye?” iꞌi echeheete.
Boonoshiyoo “No waato Samsoonin cuyoyich, wotta no toommooch bi tuniitoommon bi toommooch tuniyoyichiye” iyeete.
11Ebich keejje hume Yihudee asheenaꞌo Exaami xaqqee goggino beetooch, dugilla hammiꞌi, Samsoonich “Ebi no toommooch ne tuniyaabeeti mooyo amoone? Noon hajjii beetinaꞌo Filsixeemeenaꞌo tunoon ariyaachine?” iyeete.
Biyoo wochiꞌi, “Boonoshi toommooch ta tuniito, ta toommooch boonoshi tuniitoommoniye” iye.
12Boonoshiyoo biich “And hiniich no waato, neen cuyi Filsixeemeenaꞌoyich beshiiree immane” iyeete.
Samsooniyoo “Ittoshi qelloona ittoshi taan wuxaachemmo ittoshi tunoon wogebote” iye.
13Boonoshiyoo “No, neen wuxaachemmo noone; cuyiree baachiye boonoshich beshii no immemmo” iyeete. Ebina biin gutte andire woderoona cuchiꞌi, xaqqee goggini daggoochee kichiyeete.
14Lehi katemooch bi shaggimmona, Filsixeemeenaꞌo cookeebee bi waan waaheete. Areegaata, Doono Yeerichi Ayaano giidoona Samsooni toommooch kindiye. Bi kishoo cucheti woderoo qaaqqoo yechiti, muttee tuppoochee yokkeeti yokkoommon tuneꞌi bi kishoochee holliye. 15Biyoo katinoon qititi kuree gammon daneꞌi, bi kishoon yaggii tiijjiye. Ebi aroona ikke hume asheenaꞌon wuxiye. 16Ebich Samsooni:
“Ikke kuree gammona boonoshin ikkooch tummeto taane;
ikke kuree gammona hume asheenaꞌon wuxito taane”
ii kokkoriye. 17Ishin gettii bi ciichitoyee gubb, ebi kuree gammon bi kishoochee duppiye. Ebich ebi xaaꞌee shigo Ramaat Lehi#15:17 Ramaat Lehi geto, “Gammi geppoo” getone. getaa ceekkehe.
18Aroochee Samsooni oogeton shachewehe. Biyoo “Ne guuno ta kishoona ebi shaahe oogeti wodiyoon tuniito neene; tunebaani and ta, shachewoona qitiya iyaabeeto taane; hini dokireyaani asheenaꞌo kishoochoo dihiya iyaabeeto taane” iꞌi Doono Yeer waan corootiye. 19Aroochee Doono Yeeri Lehi katemooch beeti showoon bi gaahaa, aaco aroochee kechiye. Samsooniyoo aroochee uchiꞌi kupphehe; bi giidoo wochinnoon andirehe. Ebich are aachi xuupho En Hakoori getaa ceekkehe. Ebi aachi xuupho hanaach beddaahaa Lehi katemooch beetone.
20Filsixeemeenaꞌo yemeenooba Samsooniyoo Israꞌeeleenaꞌon hiye naton qeejjiye.
Currently Selected:
Woraaferasheenaꞌo 15: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
