Woraaferasheenaꞌo 14
14
Timinaah Beeti Busheen Samsooni Shuno
1Ikke areddoon Samsooni Timinaahi katemooch hammiye. Aroochaa ikke Filsixeemee busheen beeggiye. 2Aroochee bi kexooch wotteꞌi bi nihoonaa bi indeenoyich “Timinaahi katemooch beeti Filsixeemee busheen beeggeto taane. Areen taach and shaakkiibote” iye.
3Tunebaani bi nihoonaa bi indeena “Hini dokireyaani Filsixeemeenaꞌo waan mechee qaawooch ne hammeto, no xibeenaꞌo daggooch woyee no asheenaꞌo bulli daggooch neech tunemmi bushee aalletenane?” iyeete.
Tunebaani Samsooni bi nihoon “Ta mullo shunnito areen bi tunetoyich biin taach shaakkiibe” iye.
4Ebi yemeenooba Israꞌeeleenaꞌon qeejjii beetinaꞌo Filsixeemeenaꞌone. Ebich Filsixeemeenaꞌona tookki kaaro tiyemmoyich, ebi mooyo tunee bi beeto, Doono Yeer waanee bi tunoon bi nihoonaa bi indeena ariyaaneenaꞌone.
5Aroochee Samsooni bi nihoonaa bi indeena tookkii Timinaahi katemooch dugilla hammiye. Hammiibee ikke woyinee goyoo beetooch boonoshi shaggaahaa, more daaheroo ciddiibee bi waan waahe. 6Bekkech Doono Yeerichi Ayaano giidoona bi toommooch kindiye. Biyoo, emmishee bushoon muucmuucayii kuxoommon, shokke kishoona are daaheroon muucmuucayii kuxxiye. Tunebaani ebi bi tuniiti mooyon bi nihoonaa bi indeenoyich getaanoone.
7Dugilla hammiꞌi busheena tookkii yibbaatehe; busheenoo oogichiꞌi shunniye. 8Giisheche aabo beshetoyee gubb, biin shaagga wotteꞌi hammiye. Hammiibee bi wuxiti daaheree meeshoon beegga gommoochee ikke badd wottehe. Ebi meeshooch maxo macciꞌi beeton beeggiye; eeyonoo eejjitone. 9Ebi eeyon kishoona qoopphii kichiꞌi maabee gommona hammiye. Bi nihoonaa bi indeena beetooch hammii shaggiꞌi, aroochee boonoshich bi imaa maaheete. Tunebaani ebi eeyon bi daneto, daaheree meeshoochee bi tunoon boonoshich getaanoone.
10Samsooni nihoo busheechi kexooch hammiye. Samsooniyoo gurimaasheenaꞌo doyiti doyoommon, arooch gaaroon geddiye. 11Filsixeemeenaꞌo biin beeggiꞌi shaashe asheenaꞌon biinna tookki boonoshi tunemmoyich deebiyeete. 12Samsooniyoo boonoshich ishichiye: “Eke turitoon turitebone; hini gaaree shabaattooch biichiꞌi ittoshi getigaata, muttee tuppoochee shippeti shaashe gaaboonaa shaashe kittee qamisoonon ittoshich immemmo taane. 13Tunebaani biichii geton ittoshi mawiigaata, muttee tuppoochee shippeti shaashe gaaboonaa shaashe kittee qamisoonon taach immemmo ittoshine” iye.
Boonoshiyoo “Eke turitoon nooch ne getaa waayebone” iyeete.
14Samsooniyoo:
“Maabeeto waanee manjeyemmi mooyo kechiye;
giidecho waanee shaawi mooyo kechiye” iye.
Boonoshiyoo keejje qemi wottoon ebi turitoon biichemmon mawiiheete.
15Awuddinnee#14:15 Hibiree Yaafe Macaafo “Shabaattinnee” iye. qemooba asheenaꞌo Samsooni mecheen “Ne kenoon dachiree ebi turito ama geto gaata nooch bi gettemmoyich tuniibe. Ebi tuno qayigaata, neennaa ne nihoochi kechi asheenaꞌonon qaaqqoona goggemmo noone. Noon ittoshi ceeggito, boggane?” iyeete.
16Ebina Samsooni mechee eeppaabee bi waan hammaꞌa, “Taan shunaano neene; halla taan shixxaabeeto neene. Ta showee asheenaꞌoyich turitoon turitaꞌa, ebi turitoon taach biichaa getaano neene” iyan.
Biyoo “Ta nihoonaa ta indeenoyich getaano taane; ishigaata, aabichireeshiye neech ta gettemmo?” iye. 17Biyoo shabaatte qemi gaaree aabo bullin bi aafooch eeppahan; oogichaa biin bi duꞌitoyich, ciiroochaa shabaattinnee qemooba biich gettiye. Biyoo hammaa ebi turitee biishon bi showee asheenaꞌoyich gettahan.
18Shabaattinnee qemooba aabe aafe giyaan beetaa, are katemeexi asheenaꞌo:
“Eeyoyee beshe shaawo, amoone?
Daaheroyee beshe kuppho, amoone?” iyeete.
Samsooniyoo wochiꞌi,
“Ta gidereena ittoshi goyaano gaata,
Ta turitoon biishaachesho ittoshine” iye.
19Aroochee bekkech Doono Yeerichi Ayaano bi toommooch giidoona kindiye. Biyoo Ashiqeloona hammiꞌi shaashe asheenaꞌon wuxiye. Boonoshi tahoon shoottii daammiꞌi, bi turitoon biichiti asheenaꞌoyich immiye. Ebi mooyona oogeton ippeebee bi nihoo kexooch wotteꞌi hammiye. 20Bi mecheenoo bi miyaatoo shaaggiye.
Currently Selected:
Woraaferasheenaꞌo 14: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
