Hosee'i 4
4
Doono Yeeri Israꞌeeleenaꞌon Ittibato
1Israꞌeeleenaꞌote, gibeneyoo, shoodeyoonaa Doono Yeerin ariyoona showee toommoochee bi aalletoyich, showee toommooch beetinaꞌon Doono Yeeri ittibatee beetone. Ebich Doono Yeerichi qaaroon waayebote! 2Ufo, kooto, wuxoo, gaayonaa yahoona woddee hammiye. Damee ukkoo beshii beshii qeyiye. 3Ebich showoo eeppemmone. Arooch beeto bulliyoo mandaachemmone. Kubbi cooxinaꞌo, shimaajji kafeenaꞌo, bahareexi haasheenaꞌooch beddaahaa ciiremminaꞌone.
Doono Yeeri Qeesheenaꞌon Ittibato
4Doono Yeeri ishichiye: “Qeesheenaꞌote, ta ittibataabeeto ittoshin bi tunetoyich, koniyoona asheenaꞌon taggaaye; ittibateshoo gettaaye. 5Qeesheenaꞌote, ittoshi, areddee aaboona daafeebeeto ittoshine; keemechinaꞌoo ittoshina tookkii xumoona daafee beetinaꞌone. Ebich ittoshi indee tuneti Israꞌeelee showoon aalliyemmo taane. 6Ta asheenaꞌo ariyee muccoochee tiyitona aalletinaꞌone. Ariyoon qaawoo ittoshi qajjitoyich, tawoo taach qeeshoo ittoshi tuneyaachemmoyich ittoshin qajjoye. Ittoshi Nuggishoo ta sheeroon ittoshi battetoyich tawoo wotta ittoshi bushiisheenaꞌon battemmo taane.
7“Qeesheenaꞌo meettii meettii boonoshi hammimmona, taan boonoshi xuqqiibeeti xuꞌo meettii meettii hammiye. Tawoo boonoshi oogoon giishiyemmo taane. 8Ta asheenaꞌochi axaaxoo boonoshich maayo bi tunetoyich, axaaxoon meechiree boonoshi shuunemmoyich qaawiyeete. 9Qeesheenaꞌo asheenaꞌoyee baritinaꞌo tooneenaꞌone. Bullinolla boonoshi gommi gommoommona sheeremmo taane. Boonoshi shuuni shuunoommonoo qoccemmo taane. 10Bare nuggisheenaꞌon dabboona taan boonoshi qajjitoyich, maayemminaꞌone; tunebaani miyaachemminaꞌone. Yahemminaꞌone; tunebaani shiijje meetaachemminaꞌone” iye.
Doono Yeeri Shahalloyich Goyinnoon Shixo
11Doono Yeeri ishichiye: “Yahoo, yagiti woyinee uyoonaa andire woyinee uyoona shalligoon keccii beetone. 12Mixoochee shuuneeti shahalloon keemiiheete. Boonoshi gumboo boonoshich wochii gettiye. Yahee ayaanoo boonoshin muriciihe. Boonoshi Nuggishoo tayee wokkiꞌi yahitinaꞌone. 13Guudinaꞌo toommoochaa deejjiyeete; geppeenaꞌo toommoochaa, boonoshi yiiroo gaaweto bi tunetoyich, wodde waajjechi ogooge mixinaꞌochi baatoochaanoo deejjii cufiiheete. Ebich boonoshi maache bushiisheenaꞌo yahechinaꞌo, boonoshi naamecheenaꞌo shunimaayeenaꞌo tunemminaꞌone. 14Ittoshi maache bushiisheenaꞌo yahechinaꞌo, ittoshi naamecheenaꞌo shunimaayeenaꞌo boonoshi tunegaata boonoshin sheeraachemmo taane. Ebiyoo doonjo ittoshi yaafee kechi yahechinaꞌona tookkii yahii, boonoshina tookkii boonoshi nuggisheenaꞌoyich deejjii ittoshi beetoyichiye. Shalligaalli asho aallemmone.
15“Israꞌeeleenaꞌote, ittoshi shaddi gaatoona Yihudee asheenaꞌo ebiyoommi mooyon tuniyoona boonoshi xuqqemmoyich tuniyaahote; Galigala hammaahote; Beet Aweenoo#4:15 Beet Aweeni geto, “Gonde moochi kexo” woyee “Shahallee kexo” getone. Ebi shigo bi bekkiibeeto, Yeerichi kexo getteebeeti Beeteeli katemooniye. kechaahote; ‘Beeyechi Doono Yeeri beege’ getishoo wogeyaahote. 16Israꞌeeleenaꞌo babbere gidereyoomminaꞌone. Ishigaata, Doono Yeeri boonoshin bagee baaddeenaꞌochoommon gamini gaddooch bi quyemmo aabichireeshiye? 17Efreemi shahalloona tookkii yeshecho bi tunetoyich, ittoshi qayaa bi gaba hambe. 18Uchii masheechii shunee mamooch giyitinaꞌone. Boonoshi ukkireenaꞌoo yeelliibeeti mooyon oogichii shunniyeete. 19Yubee yoongo boonoshin hidi daammemmone; boonoshi deejjoonoo yeellemminaꞌone.
Currently Selected:
Hosee'i 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
